Romanos 14
14
Cammalninʉ́mga inhermanujat
1Pʉctsouga nu'pʉjʉn jeme cupʉjcapay. Te tu'c cupʉcpay caniyo'yp mʉgʉc mit Dios, cammalninʉ́mga. 2Por ejemplu, tu'c hermanu icupʉcp ni'c oyap iguicay nu'pʉjʉn, po jatu'c hermanu jeme canicupʉcpay mʉgʉc, inʉmp ni'c ca-oyap iguicay nu'pʉjʉn. 3Jeme icaypay nu'pʉjʉn magayac menus jeme ca-oyapay iguicay. Mit jeme igacaypay nu'pʉjʉn magamalninʉ́m jeme oyapay iguicay, ni'c ayé Dios iguipʉctso̱u. 4Ca-oy iguimalninʉm ayé hermanu ni'c je' iservia̱jtap Dios, mit Dios ijawip te ayé iwatp oy o te iwatp mal. Mit je' pichináj oy ni'c el Señor ijtʉp poder, mit imo'áj maj ayé hermanu pa ma pichin oy.
5Tu'c hermanu iguarda̱tp tu'c s̈ʉjw, mit jatu'c hermanu niwe'nu igui-e'p nu'pʉjʉn s̈ʉjwat. Cada hermanu ma jawi te oy lo que iwatpay. 6Jeme iguarda̱tpay tu'c s̈ʉjw, iwatp we'n pa el Señor ma tsʉ̱na oyninʉmic. Mit jeme igaguarda̱tpay tu'c s̈ʉjw, iwatp we'n ni'c iwamp iguijayaumaywa'n el Señor. Jeme icaypay nu'pʉjʉn iwatp we'n pa el Señor ma tsʉ̱na oyninʉmic, ni'c inʉjmap Dios ni'ctiyu̱s̈. Mit jeme igacaypay nu'pʉjʉn iwatp we'n pa el Señor ma tsʉ̱na oyninʉmic, mit inʉjmapey Dios ni'ctiyu̱s̈.
7Nagatsʉ̱ngap en ayʉ̱́j mundu pa nas̈watcawa'n lo que ʉjtsatu nawangapay, ne naga-o'jcáj cuandu ʉjtsatu nas̈wangawa'n. 8Te natsʉ̱ngap en ayʉ̱́j mundu, nawatcáj lo que iwampay el Señor, mit te na-o'jcap, na-o'jcáj iguinʉmwa'n el Señor. Jemni'c te natsʉ̱ngap o te na-o'jcap, ʉjtsat nas̈wajyat el Señor. 9Ni'c Cristu o'c mit jutucta̱c, pa we'n oyap iguimanda̱tcʉs̈ o'guijcatway mit jeme tsʉ̱ngapnajway. 10Ca-oy nas̈malninʉm nahermanu ne ca-oyap nas̈yac menus nahermanu. Ni'c ʉjtsat nanu'pʉjʉjnat nanipresenta̱tcʉjʉ̱́j mam Cristu pa nas̈juzga̱tcáj je'. 11Ni'c ja'yic itsʉ̱na Dios ilibruni'c:
Inʉm el Señor: Ʉ̱ tʉtsʉ̱nap pa siempre mit nu'pʉjʉn jayajwat nicos̈atenda̱jcʉjʉ̱́j mam ʉ̱ tʉtsʉ̱nawa'n,
mit nu'pʉjʉn jayajwat tʉs̈-oyninʉmgáj. We'n iguinʉjm Dios.
12Jemni'c ʉjtsat nanu'pʉjʉjnat nanʉmgajáj Dios ti nawatcaway yam.
Naga-actuwat mal nahermanu
13Jemni'c nagajamalninʉ́mga nahermanu. Más oy napensá̱tca ni'c nagawatcáj neti te icutu'mpʉcp nahermanu, ni'c oyap ica'u mit ma̱jlat. 14Tʉnmutʉgʉyp el Señor Jesús, jemni'c tʉtsʉ̱nap seguru ni'c ca-itp cayan ca-oyway nas̈caywa'n. Po jeme ipensa̱tpay ni'c ca-oy iguicaywa'n tu'c cayan, magacaywit ni'c ipensa̱táj ni'c iwat mal. 15Oy nawanga nahermanu. Po te inhermanu icutu'mpʉgáj ni'c incaygap tu'c cayan, ingajawangap inhermanu te inwatcap we'n. Ca-oy is̈actupʉ́jca mal to̱u ayé hermanu solo ni'c inwangap tu'c cayan, ni'c Cristu o'c pa ayé jayau. 16Mijchat inyʉmgap ni'c oy lo que inwatcapay, po cammoyga laj is̈malninʉmgáj ni'c we'n is̈watca. 17Te Dios nas̈manda̱tcap, caje' neti ayé nacaypay ne ayé na-u̱cpay. Más oy nawatca cuenta cosa oyway, natsʉ̱́nga en paz mit ma ji'c najo̱jtat ni'c Espíritu Santu tsʉ̱nap najo̱tni'jcat. 18Te tu'c jayau iservia̱jtap Cristu wename, je' i-acji'jcap Dios ijo̱jt, mit jayajwat igui-oyninʉmgap. 19Jemni'c nache'nga pa ma tsʉ̱nga en paz nu'pʉjʉn jayajwat, pa we'n nanimajyigʉjʉ̱́j mit napʉjcáj maj mit Dios. 20Ca-oy is̈actogoydá̱jca lo que Dios iwatpay por tu'c cayan. Iyacs̈ta'cway oy nu'pʉjʉn cayan, po malo'c ayé jayau i-actuwatcʉs̈pay mal japu̱t jayajwat por tu'c cayan. 21Más oy nagacay s̈is̈, ne naga-u'c vinu, ne nagawat neti te icutu'mpʉcp nahermanu, ni'c oyap ica'u mit ma̱jlat mit ca-oyáj icupʉc mʉgʉc. 22Te najawigap ni'c oy lo que nawatcapay, Dios ijawip lo que napensa̱tcapay. Ma ji'c ijo̱jt ayé jayau jeme caduda̱tpay cuandu iguiwat tu'c cosa. 23Te tu'c jayau duda̱tp cuandu iguicay tanti, je' culpa̱tic itsʉ̱nawa'n ni'c iduda̱tp lo que iwatpay. Mit te iduda̱tp lo que iwatpay, ayé jayau iwatp mal.
Currently Selected:
Romanos 14: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
