Romanos 12
12
Na-entregá̱tca navidajat mit Dios
1Hermanujat, nijawi-í̱jca lo que tʉnʉmgʉs̈away, ni'c Dios nas̈-ayo̱wis̈cap. Jemni'c na-entregá̱tca navidajat mit Dios pa najayaumayga je'. Ambanu icotscajau Dios tu'c aníma̱t o'guicway, po jinap ʉjtsat nacotscajap Dios navidajat nijutuc, mit Dios ji'cp ijo̱jt nas̈pʉctsougáj. Te nawatcap we'n, na-adora̱tcáj Dios mit nu'pʉjʉn najo̱jtat, ni'c we'n iguiwa'n Dios nawátca. 2Nagawátca as̈am jayajwat iwangapay mal costumbre itpay en ayʉ̱́j mundu. Je'jat solo ipensa̱tcap ayé cosajat i-e'pcapay, po ʉjtsat oy napensá̱tca nam cosajat pa ma tigats navidajat. Mit we'n na-is̈capcáj ti ayé iwampay Dios. Na-is̈capcáj ti ayé oyway, ti ayé igui-acji'jcapay Dios ijo̱jt, mit ti ayé más oyway.
3Dios tʉs̈moy favor pa tʉtsʉ̱nawa'n encarga̱tic, mit jemni'c tʉnyʉjmap cada jayau tsʉ̱napay mam mijchat magapensa̱t ni'c je' más i-is̈cap po ma pensa̱t as̈am imerecia̱t, mit cada jayau ma pensa̱t oy, ni'c Dios imoyp cada jayau nat icupʉcwa'n. 4Ni'c nacuerpu ijtʉp may partejat, po cada parte igawatp nije'yu yos̈. 5We'ney ʉjtsat. Namayo'jcat po natsʉ̱ngap as̈am tu'c cuerpu ni'c namutʉgʉygau Cristu. Mit nanipʉjcʉjʉp nanu'pʉjʉjnat ni'c natsʉ̱ngap tu'gu. 6Mit ʉjtsat tigatsic nas̈moygau Dios ti nawatcámpay, ni'c je' imoyp favor cada jayau as̈am je' iguijawi. Jeme i-ajque's̈pay lo que inʉmpay Dios, ma ajque's̈ yacs̈ic lo que nacupʉjcapay as̈am Dios iguimoy. 7Te Dios nas̈moygau pa naserviá̱tcaja jayajwat, naserviá̱tcaja oy. Te Dios imoyp tu'c jayau ma ajque's̈a ipalabra, ma cuji'cs̈i i-ajque's̈wa'n. 8Te imoyp tu'c jayau ma anima̱tcʉs̈ jayajwat, we'n ma wat. Te tu'c jayau i-acpas̈amp lo que ijtʉpay, ma acpas̈an we'nujyu. Jeme manda̱tpay, ma manda̱t oy. Jeme imajyipay pro̱wijat, ma ji'c ijo̱jt cuandu iguimajyigʉs̈wa'n.
Ti iwatcámpay cupʉcpajyat
9Cupʉcpajyat ma niwangʉjʉ mit nu'pʉjʉn ijo̱jtat, ma siguiá̱tcaja jeme oyway, mit magawatca cuenta ma̱jlat. 10Niwangʉjʉ minu'pʉjʉjnat as̈am hermanujat ni'c mitu'jcatu. Majyiga japu̱t hermanujat, mit camche'nga neti pa mijchatu.
11Camcandʉ'nyújca po siempre cuji'cs̈iga, mit serviá̱tcaja el Señor mit nu'pʉjʉn injo̱jtat.
12Ma ji'c injo̱jtat ni'c inatsʉ̱ngap vida cacʉs̈ámpay. Majmoyga is̈tunas̈cawa'n, mit ora̱tí̱jca.
13Majyiga Dios ijayajwat jeme tsʉ̱ngapay nesita̱tic, mit pʉctsouga oymanac nu'pʉjʉn tʉcyo'ypajyat.
14Oyninʉ́mga jeme is̈po'ctangapay, mit cammalninʉ́mga.
15Ma ji'c injo̱jtat mit jeme ji'jcapay ijo̱jtat. Jʉ́yga mit jeme jʉygapay.
16Tsʉ̱́nga en acuerdu minu'pʉjʉjnat. Camnimʉjninʉ́mgʉjʉ, po munipʉ́jcʉjʉ pro̱wijwájat. Mit camnʉmga ni'c más mijatcʉjʉp.
17Camwátcaja mal jeme is̈watcajapay mal. Cuji'cs̈iga is̈watcawa'n oy mam igui-e'pca nu'pʉjʉn jayajwat, pa Dios ma tsʉ̱na oyninʉmic. 18Oy pi pensa̱tca más pa intsʉ̱ngawa'n en paz mit nu'pʉjʉn jayajwat. 19Mijchat tʉwangʉs̈pay, camacpítujca nejʉmay mal, más oy pi moyga laj Dios ma castiga̱t maljayajwat, ni'c ja'yic itsʉ̱na Dios ilibruni'c: “Ʉ̱ tʉncastiga̱tcʉs̈áj maljayajwat, mit tʉnactutso̱jcʉs̈áj. We'n iguinʉjm el Señor.” 20Mit inʉmwey el Señor: “Te inmutsuguin cayo'jcʉp, mo' ma cay. Te nʉ-u̱go'jcʉp, mo' ma u'c. Ni'c te inwatcap we'n, inactu'ngajáj ijo̱jt mit winchu̱gáj inmutsuguin.” 21Camtsʉ̱nga vencia̱tic mit ayé mal, po watca oy pa is̈vencia̱tcawa'n ayé mal.
Currently Selected:
Romanos 12: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
