Santiago 2
2
Ca-oy nas̈cupiugawa'n jayajwat
1Tʉnhermanujat, te incupʉjcap el Señor Jesucristu jeme tsʉ̱napay mʉjninʉmic, camcupiuga jayajwat. 2Ni'c te mam inyi-apʉcmújcʉjʉ coyp tu'c jayau jeme icompay cʉ'cum de oro mit icomp jamuc oyway, mit te coypey tu'c pro̱wijway jeme icompay na̱s̈jamuc, 3mit te más inatendia̱tcap ayé jeme icompay jamuc oyway, mit je' inyʉmgajap: “Tsʉ̱́na oyway-panguni'c.” Mit pro̱wijway inyʉmgajap: “Jeme'yu mi̱ téna, o tsʉ̱́na yam na̱s̈ni'c.” 4Te inwatcap we'n, incupiugap mijchat mit mijatcap as̈am juezat ipensa̱tcapay mal.
5Tʉnhermanujat tʉwangʉs̈pay, márauga. Dios icupiugʉs̈p pro̱wijat en ayʉ̱́j mundu, po je'jat itcʉjʉp riqueza ni'c icupʉjcap Dios mit ipʉctsougáj lugar mam imanda̱t Dios, ni'c je' iprometia̱tp ayé lugar pa nu'pʉjʉn iguiwangapay je'. 6Po mijchat ingawatcap cuenta pro̱wijwájat, mit ricujat ayé jeme is̈actunas̈capay mit is̈cotsnas̈capay. 7Mit ricujat ayé jeme itucotscapay Cristu jeme is̈je'jatcaway.
8Inwatcáj oy te iyacs̈ta'cway is̈cumplia̱tca ayé ley más oyway, as̈am itsʉ̱na ja'yic Dios ilibruni'c: Inwa'náj inmupro̱wije̱way as̈am mi̱ inyiwajnʉ. 9Po te incupiugap jayajwat, inwatcap mal, mit ayé ley is̈culpa̱tcap ni'c ingajayaumaygap. 10Ni'c pʉmba'tu ijayaumaypay nu'pʉjʉn ley, mit iguitogoyp pa iguicumplia̱twa'n tu'c parte, culpa̱tic itsʉ̱na de nu'pʉjʉn. 11Ni'c Dios jeme inʉmway: “Migachajyo'yáj”, inʉmwey: “Miga-ago'gáj.” Po te migachajyo'yp, po mi-ago'cp, ingajayaumajyap Dios iley. 12Cótsca oy mit watca oy ni'c Dios is̈-ucyo'tcáj te inwatcau oy, ni'c je' juzga̱táj mit ayé ley jeme nas̈libra̱tcapay. 13Ni'c Dios icondena̱táj jeme iga-ayo̱wis̈way imupro̱wije̱way. Po jeme ayo̱wis̈pay, pichináj oy cuandu Dios i-arregla̱twa'n.
Jeme cupʉcpay ma wat oy
14Tʉnhermanujat, ¿pa ti oy te tu'c jayau inʉmp ni'c je' cupʉcpay po igawatp oy? ¿Oyap itsʉ̱na salva̱tic te cupʉcpujyu? 15Mit te tu'c hermanu o tu'c hermana ca-ijtʉp ijamuc, mit ca-itcʉjʉp ti icaygámpay pa cada s̈ʉjw, 16mit te tu'c jayau mam intsʉ̱nga inʉmgʉs̈ap: “Nʉ́s̈ca oy pi jogos̈ta̱jca, pi tsʉ̱nga cu's̈i”, po igamoygʉs̈p lo que inesita̱tcapay, ¿pa ti oy ayé? 17We'ney te tu'c jayau cupʉcpujyu po igawatp oy, caservia̱tp pa neti ayé, ni'c cacupʉcp iyacs̈ta'cway.
18Po tu'c jayau tʉs̈nʉjmáj: “Mi̱ micupʉcp mit ʉ̱ tʉnwatp oy.” Po ʉ̱ tʉmpo'náj: Ca-oyap is̈actujawip ni'c micupʉcp iyacs̈ta'cway te ingawatp oy, po ʉ̱ oyap tʉ-actujawi ni'c tʉcupʉcp iyacs̈ta'cway ni'c tʉnwatp oy. 19Incupʉcp ni'c itp tu'gu Dios, oy is̈nʉm. Demo̱nyujat cupʉjcapey ni-as̈amu mit yaratcap. 20Mi̱ mi tu'c jayau tonto. Oy pi jawi ni'c te tu'c jayau igawatp oy, caservia̱tp pa neti ayé, ni'c cacupʉcp iyacs̈ta'cway. 21Dios ipʉctso̱u Abraham nate̱jtat ámbanuway ni'c iwat oy. Je' ijayaumay Dios cuandu igui-ago'cwa'nate iway Isaac mam ámbanu isacrifica̱tca. 22Mi̱ in-e'p ni'c Abraham cupʉc mit iwat oy, jemni'c najawigap ni'c je' cupʉc iyacs̈ta'cway. Je' icumplia̱t lo que icupʉcway. 23Mit jem icumplia̱jt jeme tsʉ̱napay ja'yic Dios ilibruni'c: “Abraham icupʉc Dios mit Dios iguipʉctso̱u as̈am tu'c jayau yacs̈icway”, mit Dios inʉm ni'c je' Abraham i-amigu.
24Mijchat in-e'pcap ni'c Dios ipʉctso̱p tu'c jayau te iwatp oy, caje' te cupʉcpujyu. 25We'ney Dios iyacs̈icninʉm ayé malto's̈ay Rahab ni'c iwat oy cuandu iguipʉctsougʉs̈ ayé mensajerujat mit i-acpichingʉs̈ pa jatu'c to̱u. 26Ni'c te nacuerpu ca-ijtʉp espíritu caservia̱tp, we'ney caservia̱tp te nacupʉcpujyu mit te nagawatp oy.
Currently Selected:
Santiago 2: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
