Santiago 1
1
Tu'c saludu
1Ʉ̱ Santiago. Tʉnservia̱jtap Dios mit el Señor Jesucristu. Tʉnsaluda̱tcʉs̈p nu'pʉjʉn judíujat jeme tsʉ̱ngapay s̈is̈cada'guic jʉmba'tu.
Dios nas̈actujawigap nu'pʉjʉn
2Tʉnhermanujat, ma ji'jca injo̱jtat cuandu is̈mingajáj may pruebajat. 3Injawigap ni'c is̈mingajap pruebajat pa pi jawiga te micupʉjcap iyacs̈ta'cway, ni'c we'n oyáj is̈majmóyga más. 4Po siguiá̱tca majmóyga pa impichingawa'n oy, neti ma is̈catogoygac, pi tsʉ̱nga nu'tsic.
5Te tu'c jayau mam intsʉ̱nga iguitogoyp pa iguijawiwa'n más, ma yo'jta Dios mit Dios iguimo'áj, ni'c Dios nas̈moygap pa najawiga nu'pʉjʉn, mit igache'cp nepʉn. 6Po ma cupʉc jeme iyo'támpay, mit magaduda̱t nes̈ʉ̱n. Ni'c jeme duda̱tpay ayé as̈am tu'c nʉ-ola lama̱tni'cway jeme iguicus̈újipay s̈e'm, mit jʉmgapa'tu iguimunʉcs̈p. 7Ayé jayau duda̱tpay magapensa̱t ni'c iguimo'áj tanti el Señor. 8Ayé jayau ipensa̱tpay mechc cosa ca-oyap iyo'y en tu'gu to̱u.
9Ayé hermanu pro̱wijway ma ji'c ijo̱jt ni'c Dios igui-ajca's̈ʉ'cway. 10Po jeme tsʉ̱napay ricu ma ji'c ijo̱jt cuandu Dios igui-acmanagáj. Ni'c tu'c ricu iguijatáj as̈am tu'c ma'jts ipijic ica'u. 11Ni'c ipichijn s̈ʉjw mit ijajic, i-actʉ̱tsp ayé ma'jts mit ipijic cuca'p, mit togoyp i-oymanacway. Wename-ey icʉs̈wa'n tu'c ricu nu'pʉjʉn iwatpay.
Namajmóyga pruebajat
12Tsʉ̱náj oy ayé jayau jeme imajmoypay pruebajat. Ni'c jeme pichimpay oy mit ayé pruebajat, ipʉctsowáj tu'c premiu, mit ayé premiu inʉmo'jcʉp vida cacʉs̈ámpay, ni'c Dios iprometia̱tp iguimoygʉs̈wa'n jeme je' iguiwangapay. 13Cuandu tu'c jayau tenta̱tic pa iguiwatwa'n mal, maganʉm ni'c Dios iguitenta̱tp. Ni'c Dios ca-oyap itsʉ̱na tenta̱tic mit ma̱jlat, mit je' igatenta̱tp nepʉn. 14Ni'c cada jayau tenta̱tic cuandu ijo̱jt iguiyo'jtap pa iguiwatwa'n mal, mit iguijo̱tju'p ayé ma̱jlat. 15Mit iguitajnáj ayé mal iwampay, más iwa'náj ayé ma̱jlat, mit ayé ma̱jlat iye'cwa'n más mʉj, cʉs̈wa'n igui-actogoyáj.
16Tʉnhermanujat jeme tʉwangʉs̈pay, pi is̈cawe̱jta̱jcac nepʉn. 17Dios yucmay nas̈moygap nu'pʉjʉn cosa oyway mit nu'pʉjʉn más oymanacway. Je' nas̈acmingajap nu'pʉjʉn, mit je' iyac nu'pʉjʉn ta'cs̈capay yucm. Mit je' catigatsp as̈am tu'c amu̱jʉc itigats. 18Dios nas̈wayjatcau ni'c nacupʉjcajau ipalabra jeme iyacs̈ta'cway pa ʉjtsat natsʉ̱́nga as̈am nas̈primerwajyat, ni'c we'n je' iguiwajn.
Wátca lo que inʉmpay Dios
19Tʉnhermanujat jeme tʉwangʉs̈pay, jawiga ni'c nu'pʉjʉn jayajwat ma cuji'cs̈iga iguimaraugawa'n, mit magacotsca jaran, ne maga-awa'niga-ey jaran. 20Ni'c te tu'c jayau awa'nip, igawatp oy as̈am Dios iguiwa'n. 21Jemni'c cuyáguiga nu'pʉjʉn mal mit niju'pcʉjʉ mam i-it ma̱jlat. Pʉctsóuga oymanac ayé palabra Dios is̈yajcajaway mijchat, mit ayé oyap is̈salva̱tcap.
22Po watca lo que inʉmpay Dios, caje' pa is̈maraugawa'nu, caje' inyiwe̱tcʉjʉwa'n mijchatu. 23Ni'c te tu'c jayau imarap lo que inʉmpay Dios mit igajayaumayp, ayé as̈am tu'c jayau jeme i-e'pay iwindugʉt is̈ticni'c. 24Ni'c je' ni-ís̈ʉu mit cʉs̈ nʉcs̈, mit pe'beto'gatu iguinijawiyo'jt nat ini-ís̈ʉj. 25Po tsʉ̱náj oy tu'c jayau jeme iganijawiyo'tpay Dios iley, ni'c Dios iley yacs̈igo'c mit nas̈libra̱tcap. Je' imutamp ijo̱tni'c, mit iganijawiyo'tp lo que imaraway, po iwatp lo que Dios imanda̱tpay.
26Te tu'c jayau inʉmp ni'c i-adora̱tp Dios po igadomina̱tp lo que inʉmpay, ayé je'yu niwe̱jtʉp, mit jalmanu iguinʉm ni'c i-adora̱tp Dios. 27Jeme i-adora̱tpay Dios iyacs̈ta'cway mit camotic mit ma̱jlat mam Dios Nate̱jat igui-e'p ma wat yename: ma majyigʉs̈ cuya̱macwájat mit cu-o'cwájat cuandu iguitunas̈ca, mit ma nicuida̱jtʉ maganijijnʉ mit ma̱jlat itpay en ayʉ̱́j mundu.
Currently Selected:
Santiago 1: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
