Romanos 14
14
Jiñi c'uño' bʌ ti' ñopol Dios
1Ch'ʌmʌla ti la' wenta jiñi c'uño' bʌ ti' ñopol Dios, pero mach cha'añic mi caj la' cʌlʌx pejcan che' bajche' woli la' ña'tan ti la' pusic'al.#Rm 15.7 2Añ mu' bʌ i ñop cha'añ uts'at mi laj c'ux pejtelel chuqui tac añ;#Col 2.16-17 yam bʌ maxto bʌ añic tsi' wen ñopo Dios, cojach mi' c'ux pimel tac. 3Jiñi mu' bʌ i c'ux pejtelel chuqui tac añ, mach mi' ts'a'len jiñi mach bʌ añic mi' c'ux; jiñi mach bʌ añic mi' c'ux, mach i lon al ti' pusic'al añ i mul jiñi mu' bʌ i c'ux ti pejtelel, come Dios mi' ch'ʌm ti' wenta.#14.3 Pablo mi' yʌq'ueñonla lac ch'ʌmben isujm cha'añ yom mi lac p'is lac bʌ ti' wenta che' bajche' mi' ña'tan jiñi yaño' bʌ, come laj coltʌntel añ jach ti' yutslel i pusic'al Dios. 4¿Jatet majquiyet, cha'añ ma' melben i wiñic yam bʌ yumʌl? I wentajʌch i yum cha'añ mi' q'uel mi uts'at añ o mi mach uts'atic; pero xuc'ul mi caj i yajñel, come añ i p'ʌtʌlel lac Yum cha'añ mi' xuc'chocon.#14.4 Cojach Dios mi caj i mel x'e'telob i cha'añ, v. 10 (2 Cor 5.10; Stg 4.11-12).
5Añ mu' bʌ i q'uel ti ñumen ñuc jump'ejl q'uiñ bajche' yam bʌ, yaño' bʌ junlajal jach mi' q'uel pejtelel q'uiñ tac. Ti jujuntiquil la' i ña'tan ti jump'ejl i pusic'al bajche' yom.#Col 2.16-17 6Jiñi mu' bʌ i q'uel jump'ejl q'uiñ ti ñumen ñuc che' bajche' yan tac bʌ q'uiñ, mi' c'ʌñ cha'añ mi' ñuq'uesan lac Yum. Jiñi junlajal jach bʌ mi' q'uel jiñi q'uiñ tac, ma'añic mi' ñuq'uesan lac Yum.#14.6 Jiñi junlajal jach bʌ mi' q'uel jiñi q'uiñ tac, ma'añic mi' ñuq'uesan lac Yum: Ili t'añ ma'añic mi lac taj ti yan tac bʌ Biblia. Jiñi mu' bʌ i cha'len we'el, mi' ñuq'uesan lac Yum, come mi' su'ben wocolix i yʌlʌ Dios; jiñi mach bʌ añic mi' cha'len we'el, mi' ñuq'uesan lac Yum che' ma'añic mi' cha'len we'el, come mi' su'ben wocolix i yʌlʌ Dios ja'el.#1 Cor 10.31; 1 Tm 4.4
7Ma'añic majqui cuxul cha'añ i bajñel jach yom, yic'ot ma'añic majqui mi' chʌmel cha'añ i bajñel jach yom.#2 Cor 5.15 8Mi cuxulonla, cuxulonla cha'añ mi' q'uejlel ti ñuc lac Yum; yic'ot mi woli lac chʌmel, woli lac chʌmel cha'añ mi' q'uejlel ti ñuc lac Yum. Jiñi cha'añ mi cuxulonla, o mi woli lac chʌmel, i cha'añonla lac Yum. 9Come jiñʌch cha'añ tsa' chʌmi Cristo, tsa' cha' ch'ojyi, yic'ot tsa' cha' cuxtʌyi: Cha'añ mi' yochel ti' Yum#Fil 2.11 jiñi chʌmeño' bʌ yic'ot jiñi cuxulo' bʌ.
10Jatet che' jiñi, ¿chucoch woli a q'uel ti xmulil a wermañu? Yic'ot ¿chucoch ma' q'uel ti lolom a wermañu? Come ti lac pejtelel mi caj lac wa'tʌl ba' mi' caj i melonla Cristo,#Rm 2.5-6; 2 Cor 5.10 11come ts'ijbubil:
“Cuxulon, che'en lac Yum,
mi caj i ñocchocoñob i bʌ tic tojel
pejtelel wiñicob x'ixicob, yic'ot
ti pejtelelob mi caj i su'bob i ñuclel Dios”,#Is 45.23; Fil 2.10-11 che'en.
12Jiñi cha'añ ti jujuntiquilonla mi caj lac su'b lac bʌ ti' tojel Dios.
13Jiñi cha'añ, mach yomix mi lac chʌn q'uel ti xmulil lac pi'ʌlob,#Mt 7.1; Lc 6.37 la' jach laj q'uel lac bʌ cha'añ ma'añic mi lac yʌsan ti mulil lac quermañujob. 14Cujil cha'añ ma'añic chuqui bi'bi' ti' bajñelil,#Mc 7.14-19; Hch 10.15; 1 Tm 4.4; Tit 1.15 come che'ʌch tsa' pʌsbentiyon ti lac Yum Jesús, pero jiñi mu' bʌ i ña'tan cha'añ añ chuqui bi'bi', bi'bi'ʌch ti' bajñel wut jiñi wiñic. 15Pero mi woli' a techben i ch'ijiyemlel i pusic'al a wermañu cha'añ ti' caj i bʌl a ñʌc', ma'añic woli' a c'uxbin che' bajche' yom. Mach a wʌc' ti sajtel cha'añ ti' caj i bʌl a ñʌc' jiñi a wermañu come Cristo tsa' chʌmi cha'añ a wermañu.#1 Cor 8.9-13; 10.23-24 16Wen ña'tan bajche' yom ma' mel ame q'uejlic ti leco jiñi uts'at bʌ mi la' mel, 17come ti' yumʌntel Dios ma'añic mi' coltañonla chuqui mi lac c'ux mi chuqui mi lac jap; cojach toj bʌ lac pusic'al, yic'ot i ñʌch'tʌlel; yic'ot i tijicñʌyel lac pusic'al ch'oyol bʌ ti Ch'ujul bʌ Espíritu.#1 Cor 8.8; Gl 5.22; Heb 13.9 18Pero jiñi mu' bʌ i melben i ye'tel Cristo yic'ot i c'ʌjñibal che' bajche' jiñi, mi' q'uejlel ti uts'at ti Dios yic'ot ti wiñicob.
19Jiñi cha'añ la' lac ña'tan chuqui tac yom cha'añ ñʌch'ʌl mi la cajñel yic'ot cha'añ mi laj comol colel majlel ti Cristo. 20Mach a jisʌben i ye'tel Dios cha'añ i bʌl a ñʌc', come isujm sʌc pejtelel chuqui tac añ;#Mc 7.18-19; Hch 10.15 pero jiñi mach bʌ uts'atic jiñʌch che' añ chuqui mi laj c'ux mu' bʌ i yʌc' ti yajlel yaño' bʌ. 21Ñumen uts'at ma'añic mi lac c'ux we'elʌl yic'ot ma'añic mi lac jap vino mi yam bʌ mu' bʌ i tic'lʌben i pusic'al o mu' bʌ i yʌc' ti yajlel a wermañu. 22Mi añ chuqui wola' ñop, ñopo ti' xuc'tʌlel a pusic'al ti' wut Dios. Tijicña jiñi mach bʌ añic mi' tejchel tilebixel bʌ i pusic'al cha'añ i melbal mu' bʌ i q'uel ti uts'at.#Gl 5.13; 1 Jn 3.21 23Pero jiñi am bʌ tilebixel bʌ i pusic'al cha'añ chuqui woli i c'ux, mi' taj i mul, come mach ti jump'ejlic i pusic'al woli i c'ux; come ti' pejtelel mu' bʌ lac mel che' mach ti jump'ejlic lac pusic'al, jiñʌch mulil.#14.23 Come ti' pejtelel mu' bʌ lac mel che' mach ti jump'ejlic lac pusic'al, jiñʌch mulil: Che' ba' ora juntiquil xñopt'añ mi' añ chuqui tsi' mele che' mach che'ic mi' ñop; mi' yajlel ti mulil.
Currently Selected:
Romanos 14: NTCH
Highlight
Share
Compare
Copy
Want to have your highlights saved across all your devices? Sign up or sign in
Biblia de Estudio en Ch´ol de Tumbalá, Chiapas, México © Sociedad Bíblica de México A.C.
