Romanos 10
10
1Quermañujob, jiñi com bʌ ti pejtelel c pusic'al, yic'ot jiñi mu' bʌ c'ajtiben Dios ti oración jiñʌch cha'añ mi' coltʌntelob israelob, 2come mic su'b ti isujm, cha'añ wen ch'ejlob i pusic'al ti ye'tel Dios, pero mach yujilobic i melol chuqui yom Dios. 3Come mach yujilobic bajche' mi lac taj toj bʌ lac pusic'al ti Dios, woli jach i ñopob i bajñel wa'chocoñob i bʌ ti toj,#Rm 9.31-32; Fil 3.9 ma'añic mi' ch'ʌmob ti' wenta i tojel i coltʌntel chajpʌbil bʌ i cha'añ Dios, 4come ti Cristo tsa' jili i c'ʌjñibal mandar,#10.4 Ti Cristo tsa' jili i c'ʌjñibal mandar: Ti Cristo tsa' ts'ʌctiyi pejtelel jiñi mandar (Mt 5.17; Rm 8.3-4) yic'ot tsi' jisʌbe i c'ʌjñibal ti lac tojlel (Rm 7.4-6; Gl 3.24); jiñi cha'añ Dios ma'añix mi chʌn ch'ʌm ti' wenta jiñi mu' bʌ i lon ñop i jac' jiñi mandar, cojach jiñi mu' bʌ i ñop Cristo mi caj i q'uejlel ti toj ti' tojlel Dios (Rm 1.16-17; 9.30; 1 Cor 1.30; Gl 3.24). mi yʌq'uentel toj bʌ i pusic'al majqui jach mi' ñop.
5Moisés tsi' ts'ijba bajche' mi' tajob toj bʌ i pusic'al ti' jiñi mandar. Tsi' yʌlʌ: “Jiñi wiñic mu' bʌ i jac' ti ts'ʌcʌl jiñi mandar cuxul mi caj i yajñel”,#Lv 18.5; Neh 9.29; Ez 11.13,21; Gl 3.10-12 che'en. 6Pero yambʌyʌch isujmlel jiñi toj bʌ lac pusic'al mu' bʌ la cʌq'uentel che' mi lac ñop Cristo, mi yʌl che' bajche' iliyi: Mach mi la' wʌl ti la' pusic'al: ¿Majqui mi caj i letsel ti panchan? (Iliyi jiñʌch, cha'añ mi' pʌy ju'bel Cristo). 7Mi yomic ma' wʌl, ¿majqui mi caj i ju'bel ochel ti' yajñib chʌmeño' bʌ? (Iliyi, jiñʌch cha'añ mi' pʌy letsel Cristo ba'añ chʌmeño' bʌ). 8Pero ¿chuqui mi yʌl? “Lʌc'ʌl añ jiñi t'añ ba'añet, añ ti a wej yic'ot añ ti a pusic'al”. Jiñʌch jiñi wen t'añ mu' bʌ c su'b lojon cha'añ mi la' ñop.#10.6-8 Q'uele Dt 30.12-14. Jiñi t'añ tsa' bʌ i c'ʌñʌ Moisés, tsi' c'ʌñʌ Pablo ja'el cha'añ mi' yʌq'ueñonla lac ch'ʌmben isujm cha'añ jiñi wen t'añ mach wocolic ti ch'ʌmbentel isujm yic'ot ti jac'ol; jiñi cha'añ ma'añic majqui mi mejlel i sʌclan ti panchan o ti' tojlel chʌmeño' bʌ cha'añ mi' mejlel laj cʌñ, come ti' lac pejtelel mi' mejlel lac cu'bin cha'añ mi lac ch'ʌm ti lac wenta jiñi lac coltʌntel. 9Mi tsa' su'bu ti a wej a Yumʌch Jesús,#Jn 20.28; 1 Cor 12.3; Fil 2.9-11 mi tsa' ñopo ti a pusic'al cha'añ Dios tsi' teche ch'ojyel ba'añ chʌmeño' bʌ, mi caj a coltʌntel.#Hch 16.31 10Come ti lac pusic'al mi lac ñop cha'añ mi la cʌq'uentel toj bʌ lac pusic'al; pero ti la quej mi lac su'b cha'añ tsa'ix lac ñopo, che' jiñi mi laj coltʌntel.
11Come i Ts'ijbujel Dios mi' yʌl: “Pejtelel jiñi mu' bʌ i ñop lac Yum Jesús ma'añic mi caj i yu'bin quisin”,#Is 28.16 che'en. 12Come junlajalob jach judíojob yic'ot griegojob, come juntiquil jach lac Yum ti lac pejtelel, mi yʌq'ueñob oñ bʌ i yutslel i pusic'al pejtelel mu' bʌ i pejcañob.#Gl 3.28; Col 3.11 13Come majqui jach mi' pejcan lac Yum ti' c'aba' mi taj i coltʌntel.#Jl 2.32
14¿Bajche' mi' mejlel i pejcañob lac Yum wiñicob x'ixicob che' maxto añic tsi' ñopoyob? ¿Bajche' mi mejlel i ñopob lac Yum che' maxto añic tsi' yu'bibeyob i t'añ? ¿Bajche' mi caj i yu'bibeñob i t'añ mi ma'añic majqui mi' su'beñob? 15¿Bajche' mi mejlel i cha'leñob subt'añ mi mach chocbilobic majlel? Che' bajche' ts'ijbubil: ¡Wen i t'ojol jax i yoc jiñi mu' bʌ i su'bob jiñi wen t'añ mu' bʌ i yʌq'ueñonla i ñʌch'tʌlel lac pusic'al!#Is 52.7; Nah 1.15
16Mach ti' pejtelobic tsi' jac'ʌyob jiñi wen t'añ, come Isaías tsi' yʌlʌ: “C Yum, ¿majqui tsi' ñopo jiñi t'añ tsa' bʌ c su'bu lojon?”#10.16 Q'uele Is 53.1, ili texto tsi' cha' alʌ ti Jn 12.38. Che'en. 17Jiñi cha'añ mi lac ñop che' mi la cu'bin yic'ot mi lac cu'bin i t'añ Dios che' mi lac su'bentel.#10.17 I t'añ Dios: Ti yan tac bʌ Biblia mi yʌl “i t'añ Cristo”.
18Pero mij c'ajtibeñetla: ¿Mach ba tsa'ic i yu'biyob? Tsa' cu. Come ts'ijbubil:
Tsa' pam pujquiyob i t'añ ti pejtelel pañimil,
c'ʌlʌl ba' jaxʌl i lum jiñi israelob
tsa' pam pujqui i t'añob.#10.18 Pablo tsi' c'ʌñʌ jiñi Sal 19.4.
19Mic cha' c'ajtibeñetla: ¿Mach ba añic tsi' ch'ʌmbeyob isujm jiñi israelob? Ñaxan Moisés tsi' su'bu jiñi tsa' bʌ i yʌlʌ Dios:
“Mi caj j coltañ yaño' bʌ mach bʌ c cha'añobic
cha'añ mic techbeñetla i tsʌytsʌyñʌyel la' pusic'al;
mi caj j coltañ jiñi mach bʌ añobic i ña'tʌbal
cha'añ mic techbeñetla la' mich'ajel”,#Dt 32.21; Rm 11.11-14 che'en Moisés.
20Ch'ejl i pusic'al Isaías tsi' c'ajtesa ili t'añ tsa' bʌ i yʌlʌ Dios:
“Tsi' tajayon jiñi mach bʌ añic tsi' sajcayoñob,
tsa' cʌc'ʌ c bʌ ti cʌjñel ti' tojlel
jiñi mach bʌ añic tsi' ña'tayob i cʌñon”,#Is 65.1; Rm 9.30 che'en Dios.
21Pero cha'añ israelob tsi' yʌlʌ: “Ti pejtelel q'uiñ tsa' c sʌts'ʌ j c'ʌb ti' tojlel mach bʌ xjac't'añobix, mu' bʌ i contrajiñob c t'añ”,#Is 65.2 che'en.
Currently Selected:
Romanos 10: NTCH
Highlight
Share
Compare
Copy
Want to have your highlights saved across all your devices? Sign up or sign in
Biblia de Estudio en Ch´ol de Tumbalá, Chiapas, México © Sociedad Bíblica de México A.C.
