Romanos 11
11
Añob to israelob yajcʌbilo' bʌ i cha'añ Dios#11.1-10 Q'uele Rm 9.1-33. Ti capítulo 11, mi lac taj cha'añ Dios ma'añic chocbil i cha'añ israelob, cha'añ ti' caj jiñi israelob mach bʌ añic mi' jac'ob jiñi wen t'añ, tsa' su'bentiyob i coltʌntel ja'el jiñi gentilob; pero iliyi mach yomic mi yʌl cha'añ Dios tsa'ix i choco i tejclum; lajal mi laj q'uel ti yorajlel Elías, Dios tsa' toj i cʌnta wucp'ejl mil i wiñicob (v. 4); che'ʌch ja'el ti' tojlel jiñi judíojob añ yajcʌbilo' bʌ i cha'añ mu' bʌ caj i ñopob Jesucristo (v 5).
1Jiñi cha'añ mi j c'ajtibeñetla: ¿Tsa' ba i choco Dios i tejclum? ¡Ma'añic mi ts'ita'ic!, come joñon ja'el israelon, i p'olbalon Abraham, tilemon ti' p'olbal Benjamín.#Fil 3.5 2Dios ma'añic tsi' choco i cha'año' bʌ come wʌn cʌmbilob i cha'añ c'ʌlʌl ti wajali.#11.2 Come wʌn cʌmbilob i cha'añ c'ʌlʌl ti wajali: Ili t'añ yom mi yʌl: Che' ba' ora Dios tsi' loc'sa israelob ti majtañ e'tel ya' ti Egipto (Ex 19.5-6; Dt 4.20; 14.2; 26.18). ¿O mach ba la' wujilic chuqui tsi' yʌlʌ i Ts'ijbujel Dios cha'añ Elías,#11.2 Elías: Jiñʌch x'alt'añ tsa' bʌ i mele i ye'tel che' ti yorajlel i yumʌntel jiñi rey Acab, che' ba' ora jiñi israelob tsi' cʌyʌyob Dios cha'añ mi' ch'ujutesañob i dios tac Canaán (1 R 16.29—19.18). che' ba' ora tsi' c'ajtibe Dios cha'añ mi' contrajin israelob? Tsi' yʌlʌ: 3“C Yum, tsa'ix i tsʌnsayob x'alt'añob a cha'añ, tsa'ix i jemeyob i yajñib tac ba' ma' wʌq'uentel a majtañ; c bajñel jax tsa' cʌleyon, yom i tsʌnsañoñob ja'el”,#1 R 19.10,14 che'en Elías. 4Pero ¿bajche' tsi' jac'be Dios? “Woli j cʌntan ojlil i waxʌclujumbajc' (7,000) wiñicob mach bʌ añic tsi' ñocchocoyob i bʌ ti' tojlel Baal”,#11.4 Q'uele 1 R 19.18. Baal: Jiñʌch i dios cananeojob; i c'aba' yom mi yʌl: Lac yum. che'en. 5Che' ja'el wʌle añ israelob yajcʌbilo' bʌ i cha'añ Dios ti' yutslel i pusic'al.#11.5 Q'uele Rm 9.27. Añ israelob xuc'ulo' bʌ ti' ñopol Dios, jiñʌch mu' bʌ caj i tajob i coltʌntel ti Dios, che' bajche' mi laj q'uel ti Oñiyi bʌ Wen T'añ (Is 1.9; 4.2-6; Miq 5.7-8). 6Jiñi cha'añ mi Dios tsi' yajcayob ti' yutslel i pusic'al, che' jiñi mach cha'añic wen bʌ i melbalob. Tsa'ic i yajcayob cha'añ wen bʌ i melbalob, che' jiñi mach i majtañobic, i tojolobʌch i ye'tel. [Mi Dios tsi' yajcayob cha'añ wen bʌ i melbalob, che' jiñi mach i yutslelix Dios; mach cha'añic wen bʌ lac melbal mi lac taj lac wenlel.]#11.6 Mi Dios tsi' yajcayob cha'añ wen bʌ i melbalob, che' jiñi mach i yutslelix Dios; mach cha'añic wen bʌ lac melbal mi lac taj lac wenlel: Ili t'añ ma'añic mi lac taj ti yan tac bʌ Biblia.
7¿Chuqui mi lac cʌl che' jiñi? Jiñi tsa' bʌ i sajcayob jiñi israelob ma'añic tsi' tajayob, pero jiñi yajcʌbilo' bʌ tsi' tajayob. Jiñi yaño' bʌ tsa' tsʌts-esʌbentiyob i pusic'al;#Rm 9.31 8che' bajche' ts'ijbubil: “Dios tsi' yotsayob ti tonto, cha'añ ma'añic mi' c'otelob i wut, yic'ot cha'añ ma'añic mi' yu'biñob t'añ ti' chiquin, c'ʌlʌl wʌle”,#Dt 29.4; Is 29.10 che'en. 9David ja'el tsi' yʌlʌ:
“La' pʌntʌyic i q'uiñijelob
ti yac ba' mi' yajlelob
cha'añ mi' tojob i mul.
10La' yajpicob i wut
cha'añ ma'añic mi' q'uelob pañimil,
yic'ot c'uchchocobeñob i pat ti pejtelel ora”,#Sal 69.22-23 che'en.
I coltʌntel jiñi gentilob
11Pero joñon mi c'ajtibeñetla: ¿Tsa' ba i jats'ʌyob i yoc israelob cha'añ mi' junyajlel yajlelob? ¡Ma'añic mi ts'ita'ic! Cha'añ ti' caj tsi' ñusʌbeyob i t'añ Dios tsa' tili i coltʌntel#Hch 13.46; 28.24-29 jiñi gentilob, cha'añ mi' techbentelob i tsʌytsʌyñʌyel i pusic'al. 12Mi cha'añ ti' caj i ñusa t'añ jiñi israelob tsi' tajayob i wenlel jiñi año' bʌ ti pañimil yic'ot mi cha'añ ti' caj tsa' yajliyob jiñi israelob tsi' tajayob i wenlel jiñi gentilob, ¿mach ba ñumen ca'bʌlic mi caj i tajob i wenlel che' ba' ora mi' caj i cha' coltʌntelob?
13Wʌle mic pejcañetla gentilet bʌ la. Come chocbilon majlel ti subt'añ ti' tojlel gentilob,#Hch 9.15; Rm 1.5; 15.16-18; Gl 2.7-9; Ef 3.7-8 mij q'uel ti wen ñuc que'tel. 14Muq'uic i mejlel c techbeñob tsʌytsʌyña bʌ i pusic'al c pi'ʌlob#Rm 10.19 che' mi la' ñop Dios, cha'añ mi' tajob i coltʌntel lamital, 15come tsa' poj tʌjts'iyob loq'uel jiñi israelob cha'añʌch mi' yuts-esʌntelob wiñicob x'ixicob ti pañimil, ¿chuqui mi caj i tajob jiñi israelob che' ba' ora mi cha' ch'ʌjmelob ti' wenta ti' tojlel Dios? Mi caj i yʌq'ueñtelob i cuxtʌlel come cʌn chʌmeñobix yu'bil.#11.15 Mi caj i yʌq'ueñtelob i cuxtʌlel come cʌn chʌmeñobix yu'bil: Ili t'añ yom mi yʌl cha'añ chʌmeñob ti' ch'ujlel pero ba' ora mi ñopob Dios mi caj i yʌq'ueñtelob i cuxtʌlel ti' ch'ujlel (Ez 37.1-14).
16Mi la cujil ch'ujulʌch jiñi ñaxan bʌ waj mu' bʌ la cʌq'uen Dios, che'ʌch ja'el ti' junc'ojlel jiñi sa'; mi la cujil ch'ujul i wi' jiñi te', che'ʌch ja'el i c'ʌb tac.#11.16 Ili texto woli i taj ti t'añ jiñi am bʌ ti (Nm 15.17-21); ch'ujul i wi' jiñi te', i wut te' mu' bʌ lac cʌq'uen Dios che' bajche' ofrenda ch'ujulʌch yic'ot i te'el c'ʌlʌl ti' wi'. Isujmlel iliyi jiñʌch cha'añ woli i taj ti t'añ jiñi ñaxaño' bʌ che' bajche' Abraham, Isaac yic'ot Jacob temel yic'ot i p'olbalob come yajcʌbilob ti Dios. 17Mi añ lamital i c'ʌb jiñi te', tsa' bʌ jajqui loq'uel, ixcu jatet, i c'ʌbet olivo te' tsa' jach bʌ yʌlo coli ti mate'el;#11.17 Jiñi olivo te' che' bajche' mi yʌl ti Oñiyi bʌ Wen T'añ, i lajintel jiñi israelob (Jer 11.16; Os 14.6). Olivo te' tsa' jach bʌ yʌlo coli ti mate'el; tsa' jach ñʌjp'iyet ochel ba' tsa' jajqui loq'uel i c'ʌb: Jiñʌch i lajintel jiñi gentilob mu' bʌ i ñopob jiñi wen t'añ. Ti Ef 2.11-22, mi yʌl jiñi jach bʌ isujmlel pero mi' lajin tac yic'ot yan tac bʌ chuqui tac añ. tsa' jach ñʌjp'iyet ochel ba' tsa' jajqui loq'uel i c'ʌb, tsa' taja a p'ʌtʌlel ti' wi' yic'ot ti' yetsel jiñi wen bʌ olivo te'. 18Mach a su'b a bʌ ti ñuc ti' tojlel i c'ʌb te' tsa' bʌ jajqui loq'uel. Mi tsa' su'bu a bʌ ti ñuc, ña'tan mach jatetic wola' wʌq'uen i p'ʌtʌlel i wi' tac jiñi te', jiñi i wi' tac mi' yʌq'ueñet a p'ʌtʌlel.
19I tajol mi caj a wʌl: Tsa' jajqui loq'uel i c'ʌb te', cha'añ mic mejlel ti ñʌjp'el ochel. 20Isujmʌch; tsa' jajqui loq'uel come ma'añic tsi' ñopoyob, pero jatet ma' cʌytʌl ba' ochemet cha'añ jach tsa' ñopo. Jiñi cha'añ mach a q'uel a bʌ ti ñuc, cha'len bʌq'uen, 21mi Dios ma'añic tsi' ñusʌbeyob mul jiñi mero i c'ʌb olivo te', che'ʌch ja'el jatet ma'añic mi caj i ñusʌbeñet.
22Ña'tan che' bajche' añ i yutslel i pusic'al Dios yic'ot i mich'ajel; mi' pʌs i mich'ajel ti' tojlel jiñi tsa' bʌ yajliyob, pero i yutslel i pusic'al mi caj i yajñel ti a tojlel mi xuc'ul ma' wajñel ti' yutslel i pusic'al, che' machic jax jiñi, jatet ja'el mi caj a jajquel loq'uel. 23Jiñi tsa' bʌ jajqui loq'uel mi caj i cha' otsʌntel mi tsi' sutq'uiyob i bʌ cha'añ mi' ñopob Dios, come p'ʌtʌlʌch Dios cha'añ mi mejlel i cha' otsañob. 24Mi jatet tsa' tsejpiyet loq'uel ti jiñi olivo te' tsa' jach bʌ bajñel coli ti mate'el, mi tsa' mejliyet ti ñʌjp'el ochel ti jiñi wen bʌ olivo te', ¿Mach ba ñumeñic mi' mejlel ti cha' ñʌjp'el ochel ti' c'ʌb jiñi mero i c'ʌb olivo te' ya' ba' tsa' jajqui loq'uel?
I coltʌntel israelob
25Hermañujob, yom mi la' ña'tan jiñi t'añ mach bʌ tsictiyemic ti yam bʌ ora,#Rm 16.25; 1 Cor 2.7; Ef 1.9; 3.4-6; Col 1.26-27 ame ñuquic mi la' lon q'uel la' bʌ ti la' bajñel pusic'al,#Rm 12.16; Sal 131.1; Pr 3.7; Is 5.21 tsa' tsʌts-ayob i pusic'al lamital israelob jinto ts'ʌcʌl mi' yochelob jiñi gentilob ti' ñopol Dios. 26Che' jiñi, pejtelel israelob mi caj i coltʌntelob che' bajche' ts'ijbubil:
“Tal juntiquil xColtaya loq'uem bʌ ti Sión,
mi caj i jisʌben i jontolil i p'olbal Jacob.
27Jiñʌch xuc'ul bʌ c t'añ tsa' bʌ c su'beyob
che' ba' ora mic loc'sʌbeñob i mul”,#Is 59.20-21; Is 27.9; Jer 31.33-34 che'en Dios.
28Wʌle jiñi israelob woli' contrajiñob Dios cha'añ jiñi wen t'añ cha'añ mi' tajob i coltʌntel jiñi gentilob, pero cha'añ ti' caj yajcʌbilob, c'uxbibilob ti Dios, come i p'olbalob Jacob, 29Dios ma'añic mi' q'uextan i pusic'al che' mi' yʌq'ueñonla lac majtañ, yic'ot ma'añic mi' q'uextan i pusic'al che' mi' pʌyonla.
30Che' bajche' jatetla ja'el ti yam bʌ ora tsa' la' ñusa Dios, pero wʌle tsa'ix p'untʌntiyetla cha'añ ti' caj tsi' ñusayob Dios jiñi israelob, 31che' ja'el wʌle jiñi israelob tsa' bʌ i ñusayob Dios, che' bajche' tsa' p'untʌntiyetla che'ʌch ja'el mi caj i cha' p'untʌntelob, 32come Dios tsi' cʌyʌ pejtelel wiñicob x'ixicob ti mulil, cha'añ mi' pʌsbeñob i yutslel i pusic'al ti' pejtelelob.#Gl 3.22
I c'ʌyintel Dios cha'añ i ña'tʌbal
33Wen ca'bʌl i yutslel i pusic'al Dios,
ma'añic i p'isol i ña'tʌbal yic'ot i cʌmbal.
Mach mejlic laj cʌmben i ña'tʌbal
yic'ot mach mejlic lac ch'ʌmben isujm
jiñi mu' bʌ i mel,#Job 5.9; 11.7; 15.8; Is 55.8-9
34come, ¿am ba majqui tsi' cʌmbe i ña'tʌbal Dios?#Is 40.13; Jer 23.18; 1 Cor 2.16
¿O am ba majqui tsi' cʌntesa?
35¿Am ba majqui tsi' yʌq'ue Dios i majtañ ti ñaxan,
cha'añ mi' cha' ch'ʌmben i q'uexol?
36Come ch'oyol ti Dios pejtelel chuqui tac añ,
ti pejtelel cʌntʌbil i cha'añ,
yic'ot i cha'añʌch Dios pejtelel chuqui tac añ.#1 Cor 8.6; Ef 4.6; Col 1.16; Heb 2.10
La' sujbic i ñuclel Dios ti pejtelel ora.#Ef 3.21; Fil 4.20; 1 Tm 1.17; 2 Tm 4.18; 1 P 4.11; 2 P 3.18; Jd 25; Ap 1.6; 5.13; 7.12 Amén.
Currently Selected:
Romanos 11: NTCH
Highlight
Share
Compare
Copy
Want to have your highlights saved across all your devices? Sign up or sign in
Biblia de Estudio en Ch´ol de Tumbalá, Chiapas, México © Sociedad Bíblica de México A.C.
