Насигьятар 3
3
1Йиз бай, адашдин илим магьархан, йиз насигьятар кӀваъ уьрх.
2Фицики миди ярхи апӀиди яв йисар-йигъар ва артухъ апӀидивуз ужувлар.
3Гъит гьякьну ва рягьми уву гатӀатӀахьри: гавагьирарси яв гардандиъ ахь дурар, бикӀ яв кӀвак –
4хъа хьибди увуз масанвал ва гьюрмат Заанурихьан ва адмийирихьан.
5Вари юкӀв хъипну, РАББИЙИН ихтибарнаъ учӀв, жвуван хусуси фагьмиин хъугъʼвал мапӀан.
6Фунуб жилгъайиъди гъярашра, РАББИ аьгъю апӀин, дюз алаиди Дугъу яв рякъяр.
7Жвув аькьюл айирси, гьисаб мапӀан, гучӀ апӀин РАББИЙИХЬАН, йихь ярхла писвалихьан –
8му хьибди сагъʼвал яв бедендиз, ва артухъ апӀиди кьувват яв кӀурбарин.
9РАББИЙИЗ яв айибдикан тув, гьарсаб ляхнин сабпи бегьернаканра тув,
10ва ацӀди ккунибдихьди яв танхар, таза чяхрихьди улдузури хьиди чяхир апӀрушвар.
11Насигьятар РАББИЙИН, йиз бай, нигь мапӀан, Дугъан кирчу тахсрарихьан мугьудучӀван.
12Фицики РАББИЙИ тахсир кипра Чав ккун дапӀнайирик, адашди кипруганси ккуни балик.
13Бахтавар ву аькьвлин эйси гъашир ва фагьум гъазанмиш гъапӀур.
14Аькьюл гъазанмиш апӀуб ужу ву арстӀан, даршуз думу багьа ву гъизилтӀан;
15заан ву думу багьа гъванартӀан; жвуваз ккуниб фукӀара дидихь ттевуз шлуб дар.
16Арччул хилиъ дидин уьмрин ярхи йисар а, хъа девлетна гьюрмат гагул хилиъ а.
17Рякъяр дидин – рякъяр шадвалиндар ву, вари дидин жилгъйир хатӀасузвалиндар ву.
18Дидик карснайириз думу уьмрин гьар ву, ва дидхьан жара даршлур хушбахтавар ву.
19РАББИЙИ аькьвлихьди жилин бина ккивну, Чан фагьмихьди аьршар дерккну,
20штун деринар Дугъан аькьвли арццра, ва дифари чиг крубзура.
21Жан бай, ваъ, гьитӀитӀибкӀри увхьан аьяндарвална ужувлан фикир ва гъит дурари уву уьрхри.
22Дурари увуз уьмур тувди, адмийирин масанвал увуз жавагьирси хьибди.
23Гьадмуган хатӀасуз хьибди яв рякъ, ва алдакидарву.
24Дахъдива ахуз гучӀ дарди, ахидива – нивкӀра хьибди мегьел.
25ГучӀ мапӀан хабарсуз хатӀайихьан, ва гьякьсузариин алабхъру пучʼвалихьан;
26фицики РАББИ – яв терефнаъ а, Дугъу гъитдар ахъуз уву ичӀазди.
27Ужʼвал апӀбахьан мугьудучӀван, дидикк ул ккайидариз, эгер думу удубкьруб вуш яв хилʼан;
28увухьна гъафириз макӀан: «Гъарах, хъа гъидива, закур тувдизавуз» – эгер увуз тувуз аш ужуб.
29ЧӀуру кьаст мапӀан адмийиз – увʼин хъугъвал алириз.
30Дав гьюжатар мапӀан дарапӀурихъди увуз чӀуруб.
31Инсафсузвал апӀурайириин бахил махьан ва рякъяр макадагъан дугъан,
32фицики хявир ву чӀуру кьастар айир РАББИЙИЗ, хъа дюзвалиндар Дугъан хъугъвалиъ а.
33Гьякьсузрин хулариин ал РАББИЙИН агь, хъа гьякьлударин Дугъу ужувлакк ккапӀра ужагъ.
34Кялхърудариин Думу аьлхъиди, хъа фурс ктру ксариз бахш апӀура масанвал.
35Аькьюл айидари апӀиди гъазанмиш ад, хъа абдлар арсди аьйибнаъ.
Currently Selected:
Насигьятар 3: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
