Насигьятар 2
2
1Йиз бай, эгер уву кьабул гъапӀиш йиз гафар ва гъюрхиш гъянаъ йиз насигьятар,
2аькьвлихъ иб хъивиш, юкӀвра фагьмихьна илбициш,
3эгер уву гъач гъапиш аьгъювалариз, фагьмиз дих апӀури гъашиш,
4арсси уву думу ккун гъапӀиш, ва хазнаси абгури гъашиш –
5РАББИЙИХЬАН гучӀ хьайивал фу вуш аьгъю хьибдивуз ва Заанурикан вуйи аьгъювалар гъадагъидива.
6Фицики РАББИЙИ тувра аькьюл, ва Дугъан мелзналан ву аьгъюваларна фагьум;
7Гьадгъу гьязур дапӀна гъалибвал гьякьлуйириз, ва гъалхан – марцциди яшамиш шулайидариз.
8Гьадгъу уьрхюра жилгъйир, гьякьвалин; Гьадгъан уликк кка рякъяр, Чаз вафалударин.
9Гьадмуган аьгъю хьибдивуз дюзвал, гьякьвал, дугъривал ва гьарсаб ужуб жилгъа.
10Гьаз гъапиш яв кӀваъ убчӀвди аькьюл, ва аьгъювалари апӀидивуз мани.
11Аьяндарвал яв гъайгъушнаъ хьибди, фагьми уву уьрхиди.
12Аькьвли уву уьрхиди чӀуру жилгъайихьан, ва ушвниъ кучӀал айи ксарихьан;
13мучӀушнан жилгъйириъди гъягъбан бадали, диш рякъяриан удучӀвру ксарихьан,
14Аькьвли уву уьрхиди чӀуру ляхнариин шад шлу ксарихьан, писвалинна улдугнайивалин кефнаъ айи ксарихьан,
15ва кьяни жилгъйириъди чарх йивури, чпин шилнаъди гъярайи ксарихьан.
16Гьамци уьрхидива жвув жарарин хпирихьан, жилирихь хьайирин мани гафарихьан,
17чан жигьил вахтнахъанмина айи жилир гатӀахьу, Заанурин йикьрар кӀваълан гьарху думу дишагьлийихьан.
18Фицики думу дишагьлийин хал – аьжалин ичӀ ву, дугъан жилгъа жиликк ккайи дийихнарихьна гъябгъюра.
19Фуж дугъахьна учӀвиш, кьяляхъ гъидар, сарун уьмрин жилгъайиъ лик ивидар.
20Гьаддиз гъарах рякъюъди гъянидарин, дис жилгъйир гьякьлударин.
21Фицики дугъри кас хьиди яшамиш жилиин, кацӀну адрур гъузди душвʼин.
22Хъа жили терг апӀиди гьякьсузар, хаинкрар ччиварианзина уьчӀюргъиди.
Currently Selected:
Насигьятар 2: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
