Psalmyn 91
91
PSAL. 91.
Qui habitat.
1Quoi-erbee ta cummal fo coadey yn Fer smoo ard:
nee eh tannaghtyn fo scaa yn Ooilley-niartal.
2Jirr-ym rish y Chiarn, Uss my hreishteil, as my hoor lajer:
my Yee, ersyn ver-ym my varrant;
3Son nee eh dty livrey veih ribbeh yn shelgeyr:
as veih’n chramp baasoil.
4Nee eh uss y choadey fo e skainyn, as bee oo sauchey fo ny fedjagyn echey:
e irrinys as e ynrickys vees dty eïlley as dt’endeil.
5Cha bee aggle ort roish atchim erbee ’syn oie:
ny roish y tiyde ta lhiggit ’sy laa:
6Roish y chramp ta shooyll ’sy dorraghys:
ny roish y chingys ta stroie ec y vun-laa.
7Nee thousane tuittym rish dty lhiattee, as jeih thousaneyn ec dty laue yesh:
agh cha jig eh dt’aar.
8Dy-jarroo, lesh dty hooillyn ver oo my-ner:
as hee oo leagh ny mee-chrauee.
9Son t’ow uss, Hiarn, my yerkal:
t’ow er hoiaghey yn thie ayd dy chemmyrk feer ard.
10Cha jean olk erbee taghyrt dhyt:
cha-moo nee chingys trome erbee cheet faar dty chummal;
11Son ver eh currym da e ainleyn harryd:
dy dty reayll ayns ooilley dty raaidyn.
12Nee ad oo y ymmyrkey ayns nyn laueyn:
nagh gortee oo dty chass noi clagh.
13Nee oo shooyll er y lion as yn adder:
stampee oo yn lion aeg as y dragon fo dty chassyn.
14Er-yn-oyr dy vel eh er hoiaghey e ghraih orrym, shen-y-fa livrey-ym eh:
nee’ms eh y hoiaghey seose, er-y-fa dy vel enney echey er m’Ennym.
15Nee eh geamagh orrym, as ver-ym clashtyn da:
dy-jarroo, ta mee mârish ayns seaghyn; livrey-ym eh, as ver-ym lhiam eh gys onnor.
16Lesh bea liauyr nee’ms eh y yannoo booiagh:
as soilshee-ym da my haualtys.
Currently Selected:
Psalmyn 91: PS1765
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society
