Psalmyn 90
90
MORNING PRAYER.
PSAL. 90.
Domine, refugium.
1Hiarn, t’ow uss er ve nyn gemmyrk:
veih sheeloghe gys sheeloghe.
2Roish my daink ny sleïtyn rish, ny rieau yn thalloo as y seihll er nyn groo:
she uss Jee er dy-rieau, as seihll gyn jerrey.
3T’ow chyndaa dooinney gys toyrt-mow:
reesht t’ow gra, Tarr-jee reesht, shiuish chloan gheiney.
4Son cha vel thousane blein ayns dty hilley’s agh myr y laa jea:
fakin dy vel shen er n’gholl shiaghey myr arrey ’syn oie.
5Cha leah as t’ow dyn skeayley ad, t’ad dy-jarroo myr cadley:
as fioghey ersooyl chelleeragh myr y faiyr.
6Ayns y voghrey te glass, as gaase seose:
agh ayns yn astyr te giarit sheese, te creen as fiojit.
7Son ta shin lheïe ersooyl ayns dty yymmoose:
as ta aggle orrin roish dty chorree hrome.
8T’ow er hoiaghey nyn ghrogh-yannoo kiongoyrt rhyt:
as nyn beccaghyn follit ayns soilshey dt’eddin.
9Son tra t’ow uss corree, ta ooilley nyn laghyn er n’immeeaght:
ta ny bleeantyn ain ec kione myr skeeall t’er ny insh.
10Ta laghyn yn eash ain three-feed blein as jeih; as ga dy vod deiney ’ve cha lajer as dy roshtyn kiare-feed blein:
ny-yeih cha vel y troshid oc eisht agh deïnys as trimshey; cha leah shen te er n’gholl shiaghey, as ta shin goit jeh.
11Agh quoi ta toiggal pooar dty yymmoose:
son dy-jarroo myr ta dooinney goaill aggle, shen myr ta dty chorree.
12Ynsee dooin myr shen dy earroo nyn laghyn:
dy vod ny creeaghyn ainyn ve soit er creenaght.
13Chyndaa uss reesht, O Hiarn, ec y jerrey:
as bee graysoil da dty harvaantyn.
14O jean shin y yannoo magh lesh dty vyghin, as shen dy-leah:
myr shen nee mayd boggey ’ghoaill, as bee mayd gennal ooilley laghyn nyn mea.
15Gerjee shin reesht, nish lurg y traa t’ow er cherraghey shin:
as son ny bleeantyn ayndoo ta shin er hurranse seaghyn.
16Soilshee dt’obbyr da dty harvaantyn:
as da nyn gloan dty ghloyr.
17As dy row Ard-ooashley gloyroil y Chiarn yn Jee ain orrin:
bishee uss obbyr nyn laueyn orrin, O bishee uss ny ta shin dy ghoaill ayns laue.
Currently Selected:
Psalmyn 90: PS1765
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society
