Psalmyn 92
92
PSAL. 92.
Bonum est confiteri.
1Te red gerjoilagh dy chur booise da’n Chiarn:
as dy ghoaill arraneyn-moyllee gys dt’Ennym’s, O Uss smoo syrjey;
2Dy insh jeh dty chenjallys-ghraihagh dy-moghey ’sy voghrey:
as jeh dt’ynrickys ayns traa ny hoie.
3Er greïe-chiaull dy yeih strengyn, as er y lute:
er greïe ard, as er y chlaasagh.
4Son t’ow uss, Hiarn, er my yannoo gennal trooid dt’obbraghyn:
as goym boggey ayns coyrt moylley son obbraghyn dty laueyn.
5O Hiarn, cre cha gloyroil as ta dt’obbraghyn:
ta dty smooinaghtyn feer dowin!
6Cha vel dooinney neu-chreeney cur tastey mie da shoh:
as cha vel ommydan dy hoiggal eh.
7Tra ta’n vee-chrauee glass myr y faiyr, as tra t’adsyn ooilley ta gobbraghey olkys bishaghey:
eisht bee ad er nyn stroie son dy-bragh; agh uss, Hiarn, yn Fer smoo syrjey son dy-bragh.
8Son cur-my-ner, nee dty noidyn, O Hiarn, cur-my-ner, nee dty noidyn cherraghtyn:
as bee adsyn ooilley ta gobbraghey mee-chraueeaght er nyn stroie;
9Agh bee my chione’s er ny hroggal seose myr eairk unicorn:
son ta mee er m’ooïllaghey lesh ooïll noa.
10Hee my hooill neesht e aigney er my noidyn:
as nee my chleaysh clashtyn e yeearree er ny mee-chrauee ta girree magh m’oï.
11Nee yn dooinney cairagh blaaghey myr y billey-palm:
as skeayley dy-lhean myr y billey-cedar ayns Libanus.
12Nee nyn lheid as t’er nyn soiaghey ayns thie yn Chiarn:
bishaghey ayns cooyrtyn thie yn Jee ain.
13Ver ad magh neesht ny smoo dy vess ayns nyn shenn eash:
as bee ad roauyr as jeeaghyn dy-mie.
14Dy vod ad soilshaghey cre cha firrinagh as ta’n Chiarn my niart:
as nagh vel veg y neu-ynrickys aynsyn.
Currently Selected:
Psalmyn 92: PS1765
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society
