Jabura 50
50
Ala la kiiti telendeŋɛ la ko
1Asafu la beete do le ka.
Marige Alatala sɛnbɛ tige bata a kulɛ labɔɔ,
a ka dunuya bɛ makele ka bɔɔ tele yɛlɛ han tele jige.
2Ala be a la nɔɔra makɛnɛnna Siyɔn saa tɔ,#50:2 Darisalamu tɔgɔ do le mu Siyɔn na.
a todula min majabuta, kɔnɔ bele a la.
3Wo mɔ Marige Ala be nala,
a te nɔ a mɔdɛla.
Ta be tiɲare mala a ɲatɔ;
fɔɲɔ sɛnbɛma be a la miliŋɛ tɔ.
4A be saŋɛ nun duge makelela kabɔɔ kantɔ,
anu ni ma seedenu la a la mɔgɛnu la kiiti sa la ko la.
5A ko: «Wo ni n batulanu madɛn,
minnu ka lahire kiti n ɲɛ, anu be sarika bɔɔla n ɲɛ.»
6Wo butɔ, saŋɛ ni seede bɔɔ ka a fɔla Ala le telenta,
bayi ale le mu kiiti sa mansa la.
Beeti bɔɔlá la suleŋɛ donden.
7Alatala ko: «N na jama, wo tolomasɔ; n si naa kuma.
Wole bani Isirayila jama, n si wo la tantaŋɛnu makɛnɛn.
Nde Ala le mu wo la Ala la.
8N bele dumɛnden wo la sarika le la ko la,
bayi wo be wo la sarikanu bɔɔla ka sube bintan n ɲɛ wagate bɛ.
9N haju bele tuuranu jigan koe ma wo la wɔɔrɛ tɔ,
ka wo ma sikule minnu be bɔɔren wo la kulanu tɔ.
10Burun butɔ sube bɛ mu n tɛŋɛ le la,
anun dalifeŋɛ bɛ minnu be kɔnkɛnu tɔ.
11Kɔnkɛnu kunma kondeŋɛnu tugun, n be a bɛ lɔnden,
burun butɔ sube bɛ be nde le bolo.
12Ka kɔnkɛ be n na nun, n te dɔmɔ ko fɔ wo ye nun,
bayi dunuya nun a butɔ feŋɛ bɛ mu n tɛŋɛ le la.
13N be tuura sube dɔmɔla ba?
N be baa base minna ba?
14Wo ni nde Ala la walisa, wolo si ma sarika yati yati la.
Awa wo ka lahire minnu jigan n ɲɛ, nde Ala min mayɛlɛta, wo ni anu lakamali.
15Iyon, wo be tɔɔrɛ tɔ wagate min tɔ, wo ni wo kulɛ labɔɔ n ma.
Wo butɔ, n si wo lakisi; wo si n matɔgɔ.»
16Kɔnɔ ko koron malanu kan, Ala be a fɔla wondelen ye, a ko:
«Bɔ, wo be n na yamɔrenu durusila ba,
n na lahire la ko ni to wo da tɔ ba?
17Adun, wo be balanna n na ko latɔndeŋɛnu ma,
wo mɛn be n na yamɔrenu kɔnden.
18Wo tini kankante yen, wo ni wo ma wo bareŋɛ la;
wo nun jeenantenu be ko dɔndɔ tɔ.
19Wo be kuma koroŋɛ le tun nabɔɔla wo da tɔ;
wo te sikkɛ foniya fɔ koe la tun.
20Wo ni natá sa wo bareŋɛ kunma,
wo ni naa wo nɛɛnɛdɔndɛ tɔɲɛgɛ.
21A fɛlɛ wo be min maren. N si nɔ wo tola ɲɔ ba?
A toren wo ye, ka a fɔla wo mɔ bɛ si kan ba?
Kɔnɔ n si wo labɔɔ kɛnɛ tɔ, ka wo la ko koroŋɛnu bɛ sa kɛnɛ ma.
22Wole minnu be ɲinaren nde Ala ma, wo hakkili to a ma,
ka wo ma, n si wo la ko tiɲa le, mɔgɔ yo te wo latanga.
23N na walisa koe, wolo mu sarika yati yati la;
min tini wo ma, wo tigi bata n biliya.
Min be tagamanna ɲɔgɔnna, n si wo tigi lakisi.»
Currently Selected:
Jabura 50: MOG
Highlight
Share
Compare
Copy
Want to have your highlights saved across all your devices? Sign up or sign in
