2 Korinto 1

1Keplekpaa lia ya kɛdɔ ní mɛ Paulo gi menu Kristo Yesu yɛ ɔnɔkpɛkpɛ ɛ, gani Aya yɛ kupɛ́pɛ onu ani blɔ onemi ye Timoteo klɔ. Kí Aya yɛ ɔsɔli ha lɔ ní Korinto kɔpɔni kí Aya yɛ banima petee ní Axaya kesea mɛ:

2Atɔ Aya blɔ Ɔka ani blɔ Ɔkaɛ Yesu Kristo baki mlɔ lipomepɛpɛ ni kusuyɔ.

Aya yɛ Izɛyɔ Ɔnɔ Kakaa yɛ Ɔna

3Mlaki tɔ kudo Aya gi onu blɔ Ɔkaɛ Yesu Kristo Yɛka ɖase e. Ɔka gi izedi banɔ asigaga a, xe yɛ izɛki ɔnɔ kakaa ɔnadɔdɔ ɛ! 4Yɛ izɛɛpɔni blɔ ní blɔ baxixa ʋa petee me tɔ blɔ kwitani banama gi beku baxixa ede ede na mɛ ɛ, kupɔnɔ, kiliɛ gi blɔ fɛ Aya apɔni blɔ ɛ. 5Lɛ ese linu si kiliɛ gi Kristo yɛ ɔzia mɔmɔ nɔ ɛgbigba eku kpaŋu ní blɔ agbã́ na mɛ ɛ, nite ke gani Kristo me e, blɔ ɔnadɔdɔ lɔ aagbigba. 6Xegi kuli ní kuyeʋiyeʋi me e, linu mlɔ ɔnadɔdɔ ni kubúbú; lɛ xegi bɛyɔ blɔ ɔna ɛ, linu ɔnadɔdɔ ɛki mlɔ, gi lɔ izɛɛmani litɔplɛplɛkese ní igyidodo me ki mlɔ ní ɔzia nɔ ke gi kwimɔ mɛ ɛ. 7Lɛ blɔ kudeonudidi yo ki mlɔ kuli gagla lɛ ese linu si kwite si ŋwisi kiliɛ gi mlɛɛmɔ ɔzia nɔ ɛpɔni blɔ ɛ, nite ke mlamɔ ɔnadɔdɔ ni blɔ.

8Kúpɛ si mleze ní litumu me benemi ba a, ní kupepe uliɔ gi kwiba blɔ aʋa ní Asia kesea mɛ su u. Bemi ní blɔ aʋa gbɛgbɛ gi lisani blɔ kututu si ɔna óze ni blɔ lipo tɔ ɔ, si kwiaze ligbã́ kyɛ. 9Ní anukwarɛɛ mɛ ɛ, kwimɔ egyesi si bɛtsa kutsépia ɛki blɔ. Pɔ̀ liboe lɛ ya liba lɛ mɛ nite tɔ kukíkɔ aŋu atrɔ ní blɔ isu ya aʋa a, pɔ̀ tɔ kukɔ trɔ ní Aya aʋa a, gi yɛ izɛɛyɔni bekpo ʋa ɛ. 10Yɛ ebu blo adɔ ni kuxixa ʋidi uliɔ ya mɛ ɛ, lɛ aabu blo o. Lɛ loso e, kwikɔ blɔ kudeonudidi yo ɛtrɔ ní yɛ aʋa si aatrɛ lɛ aʋa gi aabu blo o, 11kiliɛ gi mlɛpɔni blɔ ɔ, gani mlɔ Aya kuxwaxwa mɛ. Kɔ banɔ glegle biado ɖase ní blɔ litukpo kɔkpɛ lipomepɛpɛ nɛ kupɔnɔ liɔ gi bɛki blɔ ɔ, gi banɔ glegle bɛxwa Aya loso o.

Paulo Atsrɛ Yɛ Batrɔtrɔ ʋa

12Abla ɛ, liboe lɛ ya aʋa kwidɔ isu ya; blɔ ina nɛ iisi blɔ si kwivu isu ya mumɔ ní kelea lia ya mɛ. Liveve le, ní blɔ ni mlɔ siŋanɛ sɛ mɛ, ní kudradra ni anukwarɛɛ gi bidɔ ní Aya kɔ mɛ ɛ. Kwibitɛ lɛ aní gani kelea mɛ kuboete me e, pɔ̀ gani Aya yɛ lipomepɛpɛ nɛ mɛ ɛ. 13Lɛ ese linu si aní eboe dzedze gi mlatrátani la kukla a loo gi mlatrátani la ese kunu i, la kwiŋwlimi kí mlɔ. Lɛ meedi kudeonu si i 14ŋwisi kiliɛ gi mlenu blɔ ese kapɛ ni kapɛ ɛ, mlaba nu blɔ ese mɔmɔmɔ tɔ mlaatani isu kudɔ ní blɔ aʋa ŋwisi kiliɛ gi kwiadɔ isu ní mlɔ aʋa a, ní Ɔkaɛ yɛ liwe le aʋa kinɛ ɛ.

15Gi maka ní lɛ aʋa loso e, matrɔ si maaba di mlo kpɛ ɔtɔ, atɔ mlɔamɔ ebibubu taʋa. 16Matrɔ si maaba di mlo xegi mɛɛtrɛ ní Makedonia ɛ, lɛ xegi madɔ ní Makedonia ɛ, maga mlɔ klɔ tɔ mlaakpɛ mɛ kude ní mɛ kudegaga trɛ ní Yudea mɛ. 17Gi mɛɛbitɛ batrɔtrɔ ba ya ʋa ɛ, mábitɛ lɛ ŋwisi liwaʋíboe kinɛ ɛ. Lɛ mábitɛ mɛ batrɔtrɔ ʋa ní kelea lia mɛ bapɛ́pɛ ʋa onu u, xe maatani kupani ní onugu tole ɔlɔ klɔ mɛ si Ee, Ee, loo Owo, owo o.

18Pɔ̀ kikakaa elue e, gi Aya onu anukwarɛ onete e, blɔ liboe le kí mlɔ línu Ee ni Owo. 19Lɛ ese linu si Aya Yebi ye Yesu Kristo, gi Sila, Timoteo ani mɛ kwisɔli ní mlɔ kusi i, ónu ɔnɔ gi onu “Ee” ani “Owo”, boŋu i, yɛ liboe le lipoe kakaa linu si “Ee.” 20Lɛ líbitɛ liboeboe xe Aya aka aplɛ tasɛ tasɛ ɛ, la petee enu “Ee” ní Kristo me. Lɛ loso e, gani Yesu Kristo me e, kuzeedo si “Liba lɛ mɛ” ki Aya yɛ kusudra a. 21Abla ɛ, Aya izɛki si blɔ ni mlɔ kuzɛɛlɛɛ gagla ní Kristo me. Yɛ asra kumu yɔ aki blɔ 22lɛ akpɛ blɔ lixaŋu nɛ si kunu yɛ banɛ ɛ, lɛ akɔ yɛ Ɔfuɛfuɛ Dradra lɔ akpɛ ní blɔ ina nɛ mɛ ɛ, tɔ bize ŋwisi bidɔ gi bɛtsa ɛplɛ ní blɔ litukpo o, gi biitrɔ likla ni kidiliɛ gi kitraba ɛ, aʋa.

23Maxwa Aya si yɛ ɔŋa katsalia ɔki mɛ si médzi aba Korinto tɔ ɔ, atɔ mibu mlo ní kunugu me. 24Aní kipɛ́ kwipɛ si kutrɔ ɛki mlɔ kidiliɛ gi kɛ aʋa mlaziŋa; pɔ̀ kwiwa axwɛ na ni mlɔ kí mlɔ isami i, lɛ ese linu si gani kuziŋaa mɛ mlalɛɛ gagla a.

Currently Selected:

2 Korinto 1: avn

Highlight

Copy