1 Korinto 16

Bidɔ kɔkɔ ki Aya yɛ banima ní Yerusalem

1Abla ní mlɔ beʋiʋi ʋa ní bidɔ kɔkɔɛ ʋɛ gi bɛkpɛ likpɔ ɛki Aya yɛ banima su i, lilɛ si mlabitɛ kiliɛ gi masi ɔsɔli ha lɔ ní Galatia si babitɛ ɛ. 2Mlɔ mɛ ɔnɔ kakaa ɔbla kibɔɛ liɛ gi mlɛmɔ ɛ, kɛ kapɛatɔ ní ogle no lɔ liwe tɔpu nɛ aʋa a, atɔ likízia tɔɔ si mlaazɛ gyɔ bibɔ xe maba a. 3Xegi maba ɛ maŋwlimi kuplekpa gi kwiabu banama a, gi mlaakya ɛbasɛ ɛ, lɛ ba biakɔ mlɔ bidɔ kɔkɔ ʋɛ ɛtsini Yerusalem. 4Lɛ xegi liaziã ɛ, mɛ ni ba kwiaga kudeo trɛ.

Paulo yɛ ɔtutɔ yɛ kupɛpɛ ɔ

5Maaba mlɔ klɔ xegi mazɛga Makedonia ɛ, lɛ ese linu si mabitɛ kutrɔtrɔ si mizɛɛga Makedonia. 6Nyafɛ maaze ní mlɔ su taʋɛ, loo nyafɛ kublɔ lipoe le petee, atɔ mlaatani mɛ kupɔnɔ ní mɛ kude gaga mɛ tsinɔ níklɔ gi matradzɛ ɛ. 7Mápɛ si miba edi mlo ko o, tɔ mitsa ɛza; mapɛ si miba eze ní mlɔ su lipoe gblamadza a, xe Ɔkaɛ aki kude e. 8Maaze ni ya ní Efeso zɛkɔna ni Pentekoste liwe le aʋa. 9Lɛ ese linu si kudeonu kwidra ɛki mɛ ni ya kí axwɛ gbã kuwawa, linya ɛli lɛ mɛ si banɔ glegle bɛyɔ kedu ní mɛ su.

10Xegi Timoteo aba mlɔ klɔ ɛ, mlakíki lifu liku ye e, gi ɔlɛ ní mlɔ kusi i, lɛ ese linu si Ɔkaɛ yɛ axwɛ ɛɛwa, ŋwisi kiliɛ gi mɛ fɛ mɛɛwa la kinɛ ɛ. 11Mlakígbe si mlátrazi yɛ ɛ, boŋu i, mlapɔni yɛ tɔ odziba ní mɔ klɔ ní kusuyɔ mɛ; meedi yɛ kudeonu si aaba nì baʋaziŋa dzedze ba.

12Abla ní blɔ onemi ye Apolo su i, mɛɛkpɛ yɛ kunugu yo veve si tɔ ɔbadi mlo ni baʋaziŋa gɔgɔ ba, pɔ̀ ɔ́pɛ si yiba ní lipoe lɛ ya mɛ ɛ. Xegi amɔ kudeonu dzedze e, aaba di mlo.

13Mleze ní aŋu, tɔ mlalɛɛ mumɔ ní kuziŋaa mɛ, ɔna oze ní mlɔ lipo tɔ mleze gagla. 14Mlabitɛ kidɔ kakaa ní kulɔlɔ mɛ.

15Mlete sì Stefana ni yɛ kepea ɛ; ba beze baʋaziŋa tɔpu ba ní Axaya, lɛ bɛkɔ litɔ lɛ mɛ ɛki Aya yɛ banima a. Maki mlɔ litukpo, mɛ benemi ba si, 16mlakɔ isu akpɛ ní banɔaklɔ elu ese e, ani ɔnɔ kakaa gi ɛɛwa axwɛ na a, xe eesumu ni ba ese e. 17Isami iku me si Stefana ni Fortunato ani Axaiko bɛba lɛ ese linu si bɛmani mɛ kidiliɛ gi kíma ní mɛ awla ɛ. 18Lɛ bɛkpɛ mɛ ɔna nɔ nì mlɔ ina nɛ kyɛ isami i. Banɔaklɔ ʋa elue e, lilɛ si ba kiboebitɛɛ kiku aŋu u.

Paulo yɛ kunɔpanɔ gɔgɔɔ

19Isɔliha lɛ ní Asia kesea mɛ ɛ, ipani mlɔ, Akwila ni Priskila ani ɔha lɔ gi izɛɛtsa ní ba kepea mɛ ɛ, bɛpani mlɔ mɔmɔmɔ ni isami. 20Benemi ba pɔ́ ní ya a, bɛpani mlɔ. Mlakpɛ mlɔ ahanuglɔ ba wolaa ní sinemi me.

21Mɛ Paulo mɛ maŋwlimi kunɔpanɔ liɔ ya nì mɛ awla la.

22Xe ɔnutɔ ɔ́lɔ blɔ Ɔkaɛ ɛ, ifixoxo igbani yɛ kpɛ. Oo Ɔka ba!

23Blɔ Ɔkaɛ Yesu yɛ lipomepɛpɛ nɛ lize ni mlo.

24Mɛ kulɔlɔ ki mlɔ petee ní Kristo Yesu me e. Atɔ liba lɛ mɛ.

Currently Selected:

1 Korinto 16: avn

Highlight

Copy