2 Korinto 2

1Lɛ loso matrɔ lɛ si mátraba ɛkpɛ mlɔ ɔnatata tɔ ɔ. 2Lɛ ese linu si xegi makpɛ mlɔ kuyeʋiyeʋi i, nyaŋwɛ aagɔ gi yɛ aakpɛ mɛ isami i, sani mlɔ banɔaklɔ ke gi mlɔ maki si mlenu kuyeʋiyeʋi yo e? 3Lɛ loso maŋwlimi keplekpaa kiliɛ gi maŋwlimi ka ɛ, tɔ xegi maba ɛ, lítraze ɔna nyipu iiki mɛ ɛ, ní mlɔ banama gi lilɛ si mlakpɛ mɛ isami nɛ ɛ, mlɔ aŋu mɛ tɔɔ. Lɛ maka ní mlɔ petee aʋa si xegi mɛɛmɔ isami nɛ ɛ, kɔlɔ mlɔ petee fɛ, isami nɛ iaku mlo. 4Lɛ ese linu si maŋwlimi aki mlɔ ni ɔna nyipu ni ɔnatata ani kube; aní mɛ kutrɔtrɔ linu si mikpɛ mlɔ asigaga a, pɔ̀ tɔ mibu mɛ kunɔlɔɔ kɔ kidzudzu ye me basɛ mlɔ ɔ.

Paulo abasɛ bidɔ ní kiliɛ gi biakɔ eboe zimizi na kɔkyɛ su u

5Abla xe ɔnutɔ aki si ɔnutɔ ɔmɔ ɔnatata ɛ, ɔ́bitɛ lɛ mani mɛ tete su u, pɔ̀ abitɛ lɛ amani mlɔ petee su u, lɛ ní kude kutɔ onu i, mápɛ si mibitɛ lɛ si linyani isanɔ ɔ. 6Lisrɛ si mlɔ banima kapɛ ʋidi a mlehe kutu kí oniliɛ klɔ. 7Boŋu i, lilɛ si mlakɔ akyɛ yɛ tɔ mlayɔ yɛ ɔna, atɔ ɔki wɔ ní asigaga la mɛ ɛ. 8Lɛ loso e, maki mlɔ litukpo si mlatrɔ likla ní lɛ aʋa aki yɛ si mlɛlɔ yɛ. 9Kidiliɛ gi kɛ loso maŋwlimi keplekpaa lia aki mlɔ ɛ, kɛ ese kinu si, mapɛ si mite xe mlɛtani kulɛɛ ní kufekedi uliɔ ya mɛ ɛ, ani xe mlenu kutu ní liboe kakaa mɛ ɛ. 10Xegi mlɛkɔ ɔnutɔ yɛ eboe zimizi na ɛkyɛ yɛ ɛ, mɛ fɛ makɔ la kukyɛ yɛ. Lɛ kidiliɛ gi makɔ akyɛ ɛ, xe kiditɔ kilɛ gi maakɔ kyɛ ɛ, makɔ kɛ akyɛ ní Kristo aŋu mɛ kɔkpɛ mlɔ loso, 11atɔ mitsi kude kí Ozimizi ye tɔ ɔkiŋa blɔ aʋa a. Lɛ ese linu si kwite yɛ batrɔtrɔ ʋa a.

Paulo nì Kunyanya Vuvu Yɔ ní Troa

12Agi mazeku Troa si mipani Liboe Gbã nɛ ní Kristo su i, mamɔ si Ɔkaɛ adra kudeonu akí axwɛ na ní klɔ. 13Pɔ̀ mɛ begyodi ʋa mɛ bádɔ ɔ, lɛ ese linu si mámɔ mɛ onemi ye Tito ní klɔ ɔ. Lɛ loso maklá banima ní iklɔ lɛ maza atrɛ ní Makedonia ɛ.

14Pɔ̀ kwido Aya ɖase e! Gi yɛ izɛgbani blɔ lipoe kakaa a, ní ɔga nɔ mɛ ní Kristo yɛ kuʋaŋaa kukli yɔ mɛ ɛ. Lɛ gani blɔ aʋa ɛ, Aya izeehle Kristo yɛ kisuwa flafla kɛ gi kinu yɛ kuteteo ní ɔkɔ kakaa a. 15Lɛ kulɛ ki Aya ŋwisi kidɔ gi kiinyɔfu flaflafla a, gi kinu Kristo yɛ kisuwaɛ kí banama gi ba beebu i, ni banama gi ba bɛɛkyrɔ ɛ. 16Kí ɔnutɔ ɛ, kunu ɔfu zimizi gi aaki kutse e; pɔ̀ ki ɔnɔ dzedze e, kunu ɔfu flafla gi aaki ligbã a. Lɛ nyaŋwɛ aatani lixwɛ nɛ ya onu kulɛ ɛ? 17Kúma ŋwisi banɔ glegle dzedze ba ɛ, kuʋída Aya yɛ liboe le ki kibɔ ɔ, boŋu i, ní Kristo me e, kuzɛɛpani Aya yɛ liboe le ní Aya aŋu mɛ ni anukwarɛɛ ŋwisi banɔ gi bɛkpɛ dɔni Aya kɔ kinɛ ɛ.

Currently Selected:

2 Korinto 2: avn

Highlight

Copy