Rôm 1

Tơlơi Kơkuh Tơña Bla

1Pôl jing sa čô ding kơna Yêsu Krist, Ơi Adai hmâo iâu laih kâo brơi jing khua ding kơna, pioh brơi kơ bruă pơtô Tơlơi Phrâo Hiam Ơi Adai. 2Tơlơi Phrâo Hiam anŭn Ơi Adai hmâo ƀuăn laih mơ̆ng đưm hlâo, găn mơ̆ng ƀing pô laĭ lui hlâo Ñu hmâo čih pioh laih amăng Hră Ơi Adai Pơhiăp. 3Tơlơi Phrâo Hiam anŭn djơ̆ kơ Ană Ñu, Yêsu Krist Khua Yang ƀing ta, gah kơ asar đeh Ñu hmâo tơkeng rai mơ̆ng kơnŭng djuai Đawit, 4laih anŭn gah kơ yang bơngăt rơgoh hiam,#1:4 Dưi hluh, Pôl kiăng laĭ nao kơ Yang Bơngăt Hiam. pơhaih pơrơđah kơ Ñu jing Ană Ơi Adai dưi mơyang yua kơ mơ̆ng tơlơi Ñu hơdip glaĭ mơ̆ng mơnuih djai, jing Yêsu Krist Khua Yang ƀing ta. 5Mơ̆ng Ñu yơh gơmơi hmâo mă tŭ laih tơlơi pap laih anŭn tơlơi dưi jing khua ding kơna, kiăng atăt ba mơnuih mơ̆ng abih bang djuai mơnuih truh kơ tơlơi thâo đup gưt kơ tơlơi đaŏ, yua kơ anăn Ñu. 6Amăng ƀing mơnuih anŭn, ƀing gih ăt jing ƀing Ơi Adai hmâo iâu laih kiăng jing lơ̆m kơ Yêsu Krist.

7Kâo čih mơit kơ abih bang ƀing Ơi Adai khăp hơeng amăng plei Rôm, ƀing Ơi Adai hmâo iâu laih brơi jing ƀing rơgoh hiam.

Rơkâo kơ Ơi Adai, Ama ƀing ta, laih anŭn Khua Yang Yêsu Krist pha brơi tơlơi pap laih anŭn tơlơi rơnŭk rơnua kơ ƀing gih!

Pôl Iâu Laĭ Bơni Hơơč

8Blŭng hlâo amăng anăn Yêsu Krist kâo bơni hơơč kơ Ơi Adai yua kơ abih bang ƀing gih, yua kơ arăng hmư̆ hing tơlơi đaŏ ƀing gih tar ƀar lŏn tơnah. 9Yua kơ Ơi Adai jing Pô kâo mă bruă hăng abih bơngăt jua hăng tơlơi pơtô Tơlơi Phrâo Hiam Ană Ñu, jing pô ngă gơ̆ng jơlan pơsĭt kơ kâo, nanao kâo hơdơr kơ ƀing gih 10rĭm wơ̆t kâo iâu laĭ. Kâo rơkâo kơ Ơi Adai tui hăng Ñu kiăng brơi kơ kâo dưi nao čuă ngui ƀing gih. 11Yua kơ kâo kiăng biă mă nao čuă ngui ƀing gih, kiăng kơ dưi pơpha brơi kơ ƀing gih tơlơi pha brơi mơ̆ng Yang Bơngăt Hiam, kiăng kơ ƀing gih kơjăp kơtang; 12Tơlơi anŭn kiăng laĭ, kiăng kơ ƀing ta dưi pơđĭ pran jua tơdruă hăng tơlơi đaŏ ƀing ta, anŭn jing tơlơi đaŏ ƀing gih laih anŭn tơlơi đaŏ kâo.

13 # Bruă 19:21. Ơ adơi ayŏng, kâo kiăng kơ ƀing gih thâo, hmâo lu wơ̆t laih kâo hmâo tơlơi pơmĭn kiăng nao čuă ƀing gih, kiăng kơ kâo dưi pĕ boh amăng ƀing gih kar hăng amăng djuai tuai pơkŏn mơ̆n; samơ̆ kâo ăt dŏ hmâo tơlơi gŭn truh kơ hrơi anai. 14Kâo đom hơnưh kơ ƀing mơnuih Grek wơ̆t kơ ƀing mơnuih glai, kơ ƀing thâo lu laih anŭn kơ ƀing mlŭk mơgu. 15Tui anŭn, kâo ăt hur har kiăng pơtô Tơlơi Phrâo Hiam wơ̆t kơ ƀing gih mơ̆n, ƀing dŏ amăng plei Rôm.

Tơlơi Dưi Mơyang Kơ Tơlơi Phrâo Hiam

16 # Mar 8:38. Sĭt biă mă, kâo ƀu mlâo ôh kơ Tơlơi Phrâo Hiam, yua kơ ñu jing tơlơi dưi mơyang Ơi Adai kiăng pơklaih rĭm čô hlơi pô đaŏ, blŭng hlâo kơ ƀing mơnuih Yuđa laih anŭn truh kơ ƀing mơnuih Grek#1:16 Dưi pơblang: ƀing mơnuih tuai. mơ̆n.#Mar 8:38. 17Yua kơ Tơlơi Phrâo Hiam anai bơrơđah tơlơi tơpă Ơi Adai hmâo mơ̆ng tơlơi đaŏ laih anŭn atăt kơ tơlơi đaŏ; tui hăng hmâo čih laih: “Mơnuih tơpă či hơdip hăng tơlơi đaŏ.”#Hab 2:4.

Tơlơi Soh Mơnuih Mơnam

18Tơlơi hil Ơi Adai mơ̆ng adai hmâo pơrơđah kiăng pơkơdơ̆ng glaĭ hăng abih tơlơi ƀu pơpŭ kơ Ơi Adai laih anŭn tơlơi wĕ wŏ mơnuih ngă, hăng tơlơi wĕ wŏ anŭn gơñu kơ̆ng khă tơlơi sĭt. 19Yua kơ hơgĕt tơlơi arăng dưi thâo krăn Ơi Adai jing klă rơđah laih kơ gơñu, yua kơ Ơi Adai hmâo pơrơđah laih tơlơi anŭn kơ gơñu. 20Čơdơ̆ng mơ̆ng hrơi hrih lŏn tơnah kơnuih mơyang Ñu, kiăng laĭ tơlơi dưi mơyang Ñu hlŏng lar laih anŭn tơlơi Ñu jing Ơi Adai, arăng dưi ƀuh rơđah tơ kơsem lăng mơnơ̆ng Ñu hmâo hrih laih. Tui anŭn gơñu ƀu dưi pơgăl pơgang gơñu pô ôh. 21Yua kơ wơ̆t dah gơñu thâo krăn laih Ơi Adai, gơñu ăt ƀu pơpŭ pơyom ôh kơ Ñu jing Ơi Adai, kŏn bơni hơơč kơ Ñu lơi; samơ̆ tơlơi pơmĭn gơñu jing hĭ đôč đač, laih anŭn pran jua mlŭk gơñu bă hăng tơlơi kơnăm mơmŏt.#Êph 4:17-18. 22Gơñu laĭ gơñu pô jing kơhnâo, samơ̆ gơñu jing hĭ laih mlŭk, 23gơñu hmâo pơplih hĭ tơlơi ang yang Ơi Adai ƀu thâo brŭ rai kiăng kơ mă tŭ rup mơnuih thâo brŭ rai, thâo dah rup čĭm, rup hlô mơnơ̆ng, ƀôdah hlô mơnơ̆ng hro rui.#Mơñă 4:16-18.

24Yua kơ anŭn yơh Ơi Adai jao lui hĭ gơñu kơ tơlơi grĭ grañ tui hăng pran jua gơñu amoaih hưp, tơl gơñu yua drơi jan gơñu pô ngă tơlơi pơmlâo hañ tơdruă gơñu. 25Yua kơ gơñu pơplih hĭ tơlơi sĭt Ơi Adai jing tơlơi ƀlor, laih anŭn gơñu kơkuh pơpŭ hăng mă bruă kơ mơnơ̆ng hmâo hrih laih, pơala kơ Pô Hrih Pơjing, jing Pô lăp kơ pơpŭ bơni hlŏng lar Amen!

26Yua kơ tơlơi anŭn yơh Ơi Adai hmâo jao hĭ gơñu kơ tơlơi amoaih rih mlâo hañ. Wơ̆t kơ ƀing đah kơmơi kar kaĭ mơ̆n hmâo pơplih hĭ tơlơi phiăn yang đar, samơ̆ ngă kơđai glaĭ hĭ tơlơi phiăn yang đar. 27Ƀing đah rơkơi ăt kar kaĭ mơ̆n, lui hĭ tơlơi phiăn yang đar đah rơkơi hăng đah kơmơi juăt ngă, laih anŭn pơčuh tơlơi amoaih rih tơdruă, đah rơkơi hăng đah rơkơi ngă tơlơi soh mlâo hañ, laih anŭn gơñu pô tŭ mă tơlơi pơkơhmal lăp hăng tơlơi soh gơñu.

28Yua kơ gơñu ƀu kiăng djă pioh ôh tơlơi thâo krăn Ơi Adai, tui anŭn Ơi Adai hmâo jao lui hĭ gơñu kơ tơlơi pơmĭn răm ƀăm tơl gơñu ngă lu tơlơi ƀu lăp. 29Gơñu bă hăng djŏp mơta tơlơi ƀu tơpă, tơlơi sat ƀai, tơlơi hưp ham, tơlơi hil, gơñu bă hăng tơlơi moañ, tơlơi pơdjai mơnuih, tơlơi pơrơdjơ̆ pơrơsao, tơlơi pleč ƀlor, tơlơi kreñ; tơlơi hil ruă; gơñu jing ƀing ruai tơlơi sat arăng, 30pơhiăp pơčeh, bơrơmŭt kơ Ơi Adai, ƀrưh hmiah, pơgao, pơ-ư pơang pô, kơhnăk ngă soh, khăng akŏ hăng amĭ ama, 31mlŭk mơgu, ƀu tŏng ten amăng hiăp ƀuăn, ƀu hmâo tơlơi khăp, ƀu hmâo tơlơi pap drap. 32Gơñu thâo tơlơi juăt Ơi Adai hmâo pơkă laih, kơ hlơi pô ngă tui anŭn jing lăp kơ djai yơh. Wơ̆t dah tui anŭn, ƀu djơ̆ kơnơ̆ng gơñu pô đôč ôh ngă tơlơi anŭn, samơ̆ gơñu ăt tŭ ư brơi ƀing pơkŏn ngă dơ̆ng mơ̆n.

Currently Selected:

Rôm 1: JRA2016

Highlight

Copy