Rôm Tơlơi pơthâo hlâo
Tơlơi pơthâo hlâo
Hră Pôl Čih Mơit kơ Ƀing Rôm kiăng pơthâo brơi laih anŭn prăp rơmet brơi kơ bruă ñu či nao čuă ngui kơ Phung Sang Ơi Adai anŭn. Pôl pơmĭn či nao čuă ngui laih anŭn ră ruai Tơlơi Phrâo Hiam pơ Rôm hlâo, giơ̆ng anŭn kơnang kơ tơlơi ƀing gơñu djru ñu či nao pơ čar Españ. Amăng hră anŭn, Pôl pơblang kơ tơlơi đaŏ kơ Krist laih anŭn khul tơlơi khŏm răk ngă tui amăng tơlơi hơdip kơ ƀing djru đaŏ. Amăng hră Rôm hmâo čih glaĭ tơlơi pơblang tum num hloh kơ abih bang kơ tơlơi ñu pơtô kơ Tơlơi Phrâo Hiam.
Tơdơi kơ tơlơi pơhiăp kơkuh tơña bla kơ ƀing đaŏ amăng Sang Ơi Adai Rôm laih anŭn laĭ hăng ƀing gơñu thâo ñu nanao iâu laĭ brơi kơ ƀing gơñu, Pôl laĭ nao kơ akŏ phŭn kơ hră ñu čih: “Amăng Tơlơi Phrâo Hiam Anai, tơlơi tơpă hơnơ̆ng Ơi Adai dưi pơrơđah rai mơ̆ng tơlơi đaŏ truh pơ tơlơi đaŏ, kar hăng tơlơi hmâo čih laih: Mơnuih tơpă hơnơ̆ng či hơdip yua mơ̆ng tơlơi đaŏ” (1:17).
Tơdơi kơ anŭn, Pôl čaih rơđah akŏ prŏng kiăng ngă pơrơđah kơ tơlơi abih bang mơnuih, wơ̆t hăng mơnuih Yuđa wơ̆t hăng mơnuih tuai leng kơ kiăng dưi hmâo tơlơi yap jing tơpă ƀơi anăp Ơi Adai soh sel, yua kơ abih bang mơnuih mơnam leng kơ dŏ gah yŭ kơ tơlơi dưi kơtang kơ tơlơi soh sat. Ană mơnuih dưi hmâo tơlơi yap tơpă jing yua mơ̆ng tơlơi đaŏ amăng Yêsu Krist. Tŏ tui dơ̆ng, Pôl pơblang tơlơi hơdip phrâo kơ ƀing đaŏ amăng tơlơi lir pơgop hăng Khua Yang Yêsu, anŭn jing tơlơi boh than mơ̆ng tơlơi pơgop pơlir phrâo hrŏm hơbĭt hăng Ơi Adai. Mơnuih đaŏ kơ Khua Yang hmâo tơlơi hơdip rơnŭk rơnua laih anŭn yua mơ̆ng Yang Bơngăt Hiam gơñu či dưi klaih mơ̆ng tơlơi dưi kơtang kơ tơlơi soh sat laih anŭn tơlơi djai. Mơ̆ng črăn 5 truh pơ črăn 8, Pôl pơtô kơ tơlơi kơñăm kơ Tơlơi Juăt Ơi Adai laih anŭn tơlơi dưi mơyang Yang Bơngăt Hiam amăng tơlơi hơdip ƀing djru đaŏ. Tŏ tui dơ̆ng, khua ding kơna anai pơblang kơ tơlơi ngă hyư̆m pă ƀing mơnuih Yuđa hăng ƀing tuai dưi hmâo tơlơi năng lăp hăng hơdră jơlan kơ tơlơi Ơi Adai pơklaih pioh brơi kơ ană mơnuih. Ñu pơđŭt hră ñu tơdang ñu laĭ tơlơi ƀing ană Yuđa hơngah kơ Khua Yang Yêsu jing sa črăn amăng hơdră Ơi Adai kiăng ba abih bang mơnuih mơnam glaĭ kơ tơlơi Ơi Adai pơklaih amăng Khua Yang Pô Pơklaih Yêsu. Pôl ăt mơ̆n amăng hrơi hnal tuč ƀing Yuđa ƀu či hơngah kơ Khua Yang Yêsu dơ̆ng tah. Črăn hnal tuč amăng hră Pôl čih pơtă pơtăn kơ tơlơi dŏ dơ̆ng ƀơ̆ng huă kơ ƀing mơnuih đaŏ kơ Krist, phŭn blŭng jing khŏm dŏ hơdip amăng tơlơi khăp kơ tơdruă, tơlơi gơñu dŏ dơ̆ng ƀơ̆ng huă hrŏm hăng ƀing kơnuk kơna, laih anŭn kơ pran jua tơpă. Pôl pơđŭt hră ñu čih hăng boh pơhiăp kơkuh tơña bla kơ rĭm čô phara phara laih anŭn bơni hơơč kơ Ơi Adai.
Jar pơpha
Tơlơi pơthâo hlâo laih anŭn akŏ prŏng (1:1-17)
Tơlơi kiăng khŏm hmâo tơlơi pơklaih brơi kơ ană mơnuih (1:18 – 3:20)
Hơdră jơlan Ơi Adai kơ tơlơi pơklaih (3:21 – 4:25)
Tơlơi hơdip phrâo amăng Yang Krist (5:1 – 8:39)
Mơnuih Yuđa hăng amăng hơdră jơlan kơ tơlơi pơklaih Ơi Adai (9:1 – 11:36)
Tơlơi hơdip pô đaŏ kơ Krist (12:1 – 15:13)
Klaih čŭn laih anŭn pơhiăp kơkuh tơña (15:14 – 16:27)
Currently Selected:
Rôm Tơlơi pơthâo hlâo: JRA2016
Highlight
Share
Compare
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.