Rôm 2

Tơlơi Ơi Adai Phat Kơđi

1 # Mat 7:1; Luk 6:37. Tui anŭn, Ơ mơnuih anŭn, măk ai hlơi ih jing, tơdang ih phat kơđi kơ arăng ih ƀu dưi pơgăl pơgang kơ ih pô ôh. Yua kơ tơdang ih phat kơđi kơ arăng, ih ăt klă kơđi kơ ih pô yơh; yua kơ ih phat kơđi kơ arăng, samơ̆ ih ăt ngă kar hăng gơñu mơ̆n. 2Ƀing ta thâo tơlơi Ơi Adai phat kơđi kơ ƀing mơnuih ngă khul bruă tui hăng anŭn jing gal djơ̆ yơh. 3Ơ mơnuih anŭn, tơdang ih phat kơđi kơ ƀing ngă soh tui anŭn, samơ̆ ih pô ăt ngă kar kaĭ mơ̆n, ih pơmĭn ih či dưi klaih mơ̆ng tơlơi Ơi Adai phat kơđi hă? 4Ƀôdah ih mưč mač tơlơi hiam klă rơbeh blai Ơi Adai, tơlơi Ñu thâo pap, tơlơi Ñu gir? Ih ƀu thâo ôh hă tơlơi hiam klă Ơi Adai kiăng ba ih kơ tơlơi kơhmal kơ tơlơi soh? 5Samơ̆ ih hmâo pran jua khăng, ƀu kơhmal kơ tơlơi soh ôh, jing ih pơkom pioh tơlơi hil či truh kơ ih pô ƀơi hrơi tơlơi hil, ƀơi hrơi Ơi Adai phat kơđi tơpă hơnơ̆ng či pơrơđah. 6#Adoh 62:12; Bơrt 24:12.Yua kơ Ơi Adai klă kơđi kơ rĭm čô mơnuih tui hăng bruă ñu ngă. 7Ơi Adai či brơi tơlơi hơdip hlŏng lar kơ ƀing ngă tơlơi hiam nanao, hơduah tơlơi ư-ang, tơlơi pơpŭ laih anŭn tơlơi ƀu thâo djai. 8Bơ kơ ƀing et klih, ƀu gưt kơ tơlơi sĭt, samơ̆ gưt kơ tơlơi wĕ wŏ, Ơi Adai či tuh kơ gơñu tơlơi kreñ laih anŭn tơlơi hil. 9Či hmâo tơlơi tơnap hăng tơlơi rŭng răng kơ rĭm čô mơnuih ngă tơlơi sat ƀai, blŭng hlâo kơ ƀing Yuđa laih anŭn wơ̆t kơ ƀing Grek mơ̆n. 10Samơ̆ či hmâo tơlơi ư-ang, tơlơi pơpŭ, laih anŭn tơlơi rơnŭk rơnua kơ rĭm čô mơnuih ngă tơlơi hiam, blŭng hlâo kơ ƀing Yuđa, tơdơi anŭn kơ ƀing Grek. 11#Mơñă 10:17.Yua kơ Ơi Adai ƀu lăng mơnuih phara phara ôh.

12Abih bang hlơi pô ngă soh gah rơngiao kơ tơlơi juăt,#2:12 Kiăng laĭ: tơlơi juăt Môis. gơñu ăt či răm rơngiă gah rơngiao tơlơi juăt mơ̆n. Laih anŭn abih bang hlơi pô ngă soh gah yŭ tơlơi juăt, tơlơi juăt anŭn či phat kơđi kơ gơñu. 13Yua kơ ƀu djơ̆ ôh ƀing hmư̆ tơlơi juăt jing tơpă ƀơi anăp Ơi Adai, samơ̆ ƀing ngă tui tơlơi juăt či hmâo tơlơi yap tơpă. 14Ƀing djuai tuai ƀu hmâo tơlơi juăt hơđăp amơĭ, samơ̆ gơñu juăt ngă tui tơlơi juăt pơtă, gơñu pơjing kơ tơlơi juăt kơ gơñu pô yơh, wơ̆t dah gơñu ƀu hmâo tơlơi juăt tŭ mơ̆n. 15Gơñu pơrơđah hơgĕt bruă tơlơi juăt pơtă hmâo čih laih amăng pran jua gơñu, pran jua tơpă hiam gơñu ăt pơsĭt brơi tơlơi anŭn mơ̆n, laih anŭn tơlơi pơmĭn gơñu tăp năng kơčut ƀuah gơñu tăp năng pơgăl pơgang brơi gơñu. 16Tơlơi anŭn či pơrơđah brơi ƀơi hrơi Ơi Adai phat kơđi mơ̆ng Yêsu Krist abih bang bruă hơgơ̆m mơnuih ngă, tui hăng Tơlơi Phrâo Hiam kâo hmâo pơtô.

Ƀing Yuđa Laih Anŭn Tơlơi Juăt

17Samơ̆ tơdah ih yap ih pô jing mơnuih Yuđa, ih hơ-ĭn kơnang kơ tơlơi juăt, pơ-ư kơ ih pô yua kơ Ơi Adai ih, 18thâo hluh tơlơi Ñu kiăng, laih anŭn thâo ruah mă hơgĕt jing hiam, yua kơ tơlơi juăt hmâo pơhrăm ih laih, 19laih anŭn tơdah ih thâo sĭt ih jing pô ba jơlan kơ ƀing bum mơta, jing tơlơi bơngač kơ ƀing dŏ amăng tơlơi kơnăm mơmŏt, 20pô pơhrăm ƀing mlŭk, nai pơtô kơ ƀing mơnuih ƀu thâo phe pho, amăng tơlơi juăt ih hmâo abih tơlơi čih kơ tơlơi thâo hluh laih anŭn tơlơi sĭt. 21Tui anŭn, Ơ pô pơtô kơ arăng, yua hơgĕt ih ƀu pơtô kơ ih pô lĕ? Ih pơtô kơ arăng anăm klĕ dŏp ôh, samơ̆ hyư̆m ih pô klĕ dŏp? 22Ih pơtô kơ arăng anăm klĕ pyu ôh, samơ̆ hyư̆m ih pô klĕ pyu? Ih bơrơmŭt kơ rup trah, samơ̆ hyư̆m ih pô klĕ mă gơnam tam mơ̆ng sang kơkuh pơpŭ? 23Ih pơ-ư pơang kơ ih pô yua kơ tơlơi juăt, samơ̆ hyư̆m ih pô ngă pơmlâo Ơi Adai hăng tơlơi ih ngă gao tơlơi juăt? 24Kar hăng tơlơi hmâo čih laih: “Yua kơ ƀing gih yơh ƀing djuai tuai pơhiăp ƀrưh hmiah kơ anăn Ơi Adai.”#Êsai 52:5.

25Tơdah ih gưt kơ tơlơi juăt, tơlơi khăt klĭ jing yom; samơ̆ tơdah ih ngă gao tơlơi juăt, tơlơi khăt klĭ ih anŭn jing kar hăng ƀu khăt klĭ ôh. 26Tui anŭn tơdah mơnuih ƀu tŭ khăt klĭ ôh samơ̆ ñu gưt hơgĕt tơlơi juăt pơtă pơtăn, ƀu djơ̆ ôh hă Ơi Adai či yap tơlơi ñu ƀu khăt klĭ anŭn kar hăng khăt klĭ laih? 27Tui anŭn ƀing mơnuih ƀu hmâo khăt klĭ tui hăng asar đeh samơ̆ gưt tơlơi juăt či phat kơđi ih, pô hmâo hră tơlơi juăt laih anŭn khăt klĭ samơ̆ ngă gao tơlơi juăt. 28Yua kơ sa čô mơnuih kơnơ̆ng gah rơngiao đôč jing mơnuih Yuđa, ñu anŭn ƀu djơ̆ mơnuih Yuđa sĭt ôh, bơ kơ tơlơi khăt klĭ gah kơ asar đeh gah rơngiao, ñu ƀu djơ̆ tơlơi khăt klĭ sĭt ôh. 29Samơ̆ arăng jing sa čô Yuđa sĭt tui hăng jing amăng lăm, laih anŭn tơlơi khăt klĭ sĭt arăng ngă amăng pran jua, amăng Yang Bơngăt Hiam, ƀu djơ̆ ƀơi drơi jan ôh. Sa čô Yuđa kar hăng anŭn či hmâo tơlơi bơni mơ̆ng Ơi Adai ƀu djơ̆ mơ̆ng mơnuih ôh.#Mơñă 30:6.

Currently Selected:

Rôm 2: JRA2016

Highlight

Copy