Tơlơi Bơrơđah 16

Tơjuh Boh Čơlŭ Tơlơi Ơi Adai Hil

1Giơ̆ng anŭn kâo hmư̆ asăp kraih tơbiă mơ̆ng sang kơkuh pơpŭ laĭ kơ tơjuh čô ling jang: “Nao tuh bĕ pơ lŏn tơnah tơjuh boh čơlŭ tơlơi Ơi Adai hil.”

2 # Tơb 9:10. Tui anŭn ling jang tal sa nao laih anŭn tuh čơlŭ ñu pơ lŏn tơnah. Laih anŭn hmâo teng akăm ruă biă mă truh kơ ƀing mơnuih hmâo laih gru mơ̆ng hlô laih anŭn kơkuh pơpŭ kơ rup hlô.

3Ling jang tal dua tuh čơlŭ ñu amăng ia rơsĭ, laih anŭn ia rơsĭ jing hĭ hrup hăng drah mơnuih djai, laih anŭn abih bang mơnơ̆ng hơdip dŏ amăng ia rơsĭ leng kơ djai hĭ soh sel.

4Ling jang tal klâo tuh čơlŭ ñu amăng ia krong laih anŭn ƀơi khul akŏ ia, laih anŭn gơñu jing hĭ drah.#Tơb 7:17-21; Adoh 78:44. 5Kâo hmư̆ ling jang wai lăng ia rơsĭ laĭ:

“Ơ Pô Rơgoh Hơčih, Pô Hlăk Hmâo, Pô Hmâo Laih, Ih jing tơpă.

Yua kơ Ih hmâo phat kơđi laih abih bang tơlơi anai.

6Yua kơ ƀing gơñu hmâo ngă tuh drah laih kơ ƀing rơgoh hiam laih anŭn kơ ƀing pô laĭ lui hlâo,

Yua kơ anŭn Ih hmâo brơi laih kơ ƀing gơñu mơñum drah.

Ƀing gơñu năng lăp yơh kơ tơlơi anŭn!”

7Laih anŭn kâo hmư̆ asăp pơhiăp mơ̆ng kơƀang ngă yang laĭ:

“Sĭt biă mă, Ơ Khua Yang jing Ơi Adai Dưi Kơtang,

Tơlơi Ih phat kơđi jing sĭt laih anŭn tơpă!”

8Ling Jang tal pă tuh čơlŭ ñu ƀơi yang hrơi, yang hrơi hmâo tơlơi dưi yua apui čuh ană mơnuih. 9Tơlơi pơ-iă kơtang čuh hĭ ană mơnuih, laih anŭn ƀing gơñu hơtơ̆m pah kơ anăn Ơi Adai, Pô hmâo tơlơi dưi ƀơi tơlơi răm ruă anŭn. Samơ̆ ƀing gơñu ăt ƀu kơhmal tơlơi soh gơñu ôh, kiăng ngă guh kơang kơ Ơi Adai.

10Ling Jang tal rơma tuh čơlŭ ñu ƀơi gre pơtao hlô, laih anŭn dêh čar pơtao hlô jing hĭ kơnăm mơmŏt; laih anŭn ană mơnuih kĕ jơlah gơñu pô yua kơ ruă nuă biă mă.#Tơb 10:21. 11Ƀing gơñu hơtơ̆m pah kơ Ơi Adai amăng adai yua kơ tơlơi ruă nuă laih anŭn yua kơ teng gơñu, samơ̆ ƀu kơhmal ôh kơ khul bruă gơñu ngă.

12 # Êsai 11:15. Ling jang tal năm tuh čơlŭ ñu ƀơi ia krong prŏng Ơphrat, ia krong anŭn thu hĭ, kiăng pơkra jơlan brơi kơ ƀing pơtao mơ̆ng čar gah ngŏ. 13Kâo ƀuh mơ̆ng amăng bah ana grai, mơ̆ng amăng bah hlô, laih anŭn mơ̆ng amăng bah pô laĭ lui hlâo ƀlor klâo čô yang grĭ hơƀak hrup hăng ajĭ tơbiă rai. 14Gơñu jing bơngăt yang sat, ngă khul gru kơnăl, nao pơ ƀing pơtao kơ abih bang lŏn tơnah, kiăng pơƀŭt glaĭ gơñu kơ tơlơi pơblah ƀơi hrơi prŏng Ơi Adai Dưi Kơtang. 15#Mat 24:43,44; Luk 12:39,40; Bơrđ 3:3.“Anai nê, kâo rai hrup hăng mơnuih klĕ! Mơyun hiam yơh kơ hlơi pô dŏ kơčăng laih anŭn wai lăng sum ao gơñu kiăng kơ ñu ƀu rơbat amăng tơlơi mơhlŭn ôh, laih anŭn arăng ƀu ƀuh ôh tơlơi mlâo hañ ñu!” 16#II Pơtao 23:29; Sak 12:11.Ƀing yang sat anŭn pơƀŭt glaĭ ƀing pơtao ƀơi sa anih arăng pia amăng tơlơi Hêbrơ Harmagêdôn.

17Ling jang tal tơjuh tuh čơlŭ ñu amăng angĭn, laih anŭn hmâo asăp kraih tơbiă mơ̆ng gre pơtao amăng sang kơkuh pơpŭ, laĭ: “Giơ̆ng laih yơh!” 18#Bơrđ 8:5; 11:13,19.Laih anŭn hmâo kơmlă, dơnai pơhiăp, dơnai grơ̆m, laih anŭn lŏn tơnah pơpư̆ kơtang biă mă, aka hmâo djơ̆ ôh tơlơi pơpư̆ lŏn tơnah kơtang kar hăng anŭn čơdơ̆ng mơ̆ng hmâo mơnuih ƀơi lŏn tơnah. 19#Êsai 51:17.Plei prŏng čơđang pơpha hĭ jing klâo črăn, laih anŭn khul plei prŏng amăng abih bang lŏn čar tơglưh hĭ, laih anŭn Ơi Adai hơdơr kơ plei prŏng Babilôn, kiăng brơi ñu mơñum čơlŭ tơpai tơlơi Ơi Adai hil kơtang. 20#Bơrđ 6:14.Abih bang plao ia rơsĭ đuaĭ kơdŏp laih anŭn khul bul čư̆ arăng ƀu ƀuh dơ̆ng tah. 21#Tơb 9:23; Bơrđ 11:19.Hmâo hơjan pler prŏng, boh kơtraŏ ñu sa boh rơma pluh kilôgram, mơ̆ng adai lĕ trŭn ƀơi ană mơnuih, tơl ană mơnuih hơtơ̆m pah kơ Ơi Adai yua kơ tơlơi răm ruă mơ̆ng hơjan pler anŭn, yua kơ tơlơi răm ruă anŭn krip yip biă mă.

Currently Selected:

Tơlơi Bơrơđah 16: JRA2016

Highlight

Copy

Compare