Tơlơi Bơrơđah 14

Ană Triu Laih Anŭn Ƀing Mơnuih Ơi Adai Song Mă

1 # Êsê 9:4; Bơrđ 7:3. Kâo lăng, anai nê Ană Triu dŏ ƀơi čư̆ Siôn, laih anŭn hrŏm hơbĭt hăng Ñu hmâo sa rơtuh pă pluh pă rơbâo čô mơnuih hmâo anăn Ană Triu, laih anŭn anăn Ama kơ Ană Triu hmâo čih laih ƀơi athơi ƀing gơñu. 2Kâo hmư̆ asăp mơ̆ng adai kar hăng dơnai lu glung ia, laih anŭn kar hăng dơnai grơ̆m kơtang. Asăp kâo hmư̆ hrup hăng asăp gong ƀing pĕ gong hlăk dŏ pĕ gong gơñu. 3Laih anŭn gơñu adoh sa tơlơi adoh phrâo ƀơi anăp gre pơtao, ƀơi anăp pă drơi hlô mơnơ̆ng hơdip, laih anŭn ƀơi anăp ƀing kŏng tha. Ƀu hmâo ôh pô dưi hrăm tơlơi adoh anŭn, kơnơ̆ng ƀing sa rơtuh pă pluh pă rơbâo čô Ơi Adai hmâo song mă laih mơ̆ng lŏn tơnah. 4Ƀing anŭn yơh jing ƀing aka ƀu pơgrĭ gơñu pô hăng đah kơmơi ôh, yua kơ ƀing gơñu jing ƀing dra hmŭm. Pơpă Ană Triu nao, ƀing gơñu đuaĭ tui pơ anŭn mơ̆n. Ơi Adai hmâo song mă laih ƀing gơñu mơ̆ng mơnuih mơnam, kiăng kơ jing boh hlâo hlang kơ Ơi Adai laih anŭn kơ Ană Triu. 5#Sôph 3:13.Ƀu dưi hơduah ƀuh tơlơi ƀlor ƀơi amăng bah ƀing gơñu ôh, gơñu jing ƀing mơnuih ƀu hmâo anih dưi ƀuah ôh.

Klâo Čô Ling Jang

6Giơ̆ng anŭn kâo ƀuh sa čô ling jang pơkŏn pơr tơ̆ng krah adai. Ñu hmâo Tơlơi Phrâo Hiam hlŏng lar kiăng pơthâo brơi kơ ƀing dŏ ƀơi lŏn tơnah, kơ abih bang lŏn čar, kơ abih bang djuai mơnuih, kơ abih bang tơlơi pơhiăp, laih anŭn abih bang ană plei pla. 7Ñu laĭ hăng asăp kraih: “Hwĭ pơpŭ bĕ kơ Ơi Adai laih anŭn pơpŭ bơni kơ Ñu, yua kơ mông Ñu phat kơđi truh laih. Kơkuh pơpŭ bĕ kơ Ñu, Pô hrih pơjing adai, lŏn tơnah, ia rơsĭ laih anŭn abih bang akŏ ia.”

8 # Êsai 21:9; Yêr 51:8; Bơrđ 18:2. Sa čô ling jang pơkŏn, jing pô tal dua tui klon ñu laih anŭn laĭ: “Plei prŏng Babilôn tơglưh laih, tơglưh laih! Pô hmâo ngă brơi abih bang kơnŭng djuai mơnuih mơñum tơpai tơlơi hil kơtang kơ tơlơi rih răm ñu.”

9Sa čô ling jang pơkŏn, jing pô tal klâo, tui klon ñu laih anŭn laĭ hăng asăp kraih: “Tơdah hlơi kơkuh pơpŭ kơ hlô laih anŭn kơ rup ñu, laih anŭn mă tŭ gru ƀơi athơi ƀôdah ƀơi tơngan ñu, 10#Êsai 51:17; Čơd 19:24; Êsê 38:22.ñu anŭn či mơñum tơpai tơlơi Ơi Adai hil ƀu pơklai ôh, hmâo hling laih amăng kơčok tơlơi Ơi Adai hil, laih anŭn ñu či tŭ tơlơi tơnap tap amăng apui, laih anŭn boh pơtâo kơsŭm ƀơi anăp ƀing ling jang rơgoh hiam laih anŭn ƀơi anăp Ană Triu. 11#Êsai 34:10.Asăp apui tơlơi tơnap tap ƀing anŭn pơr đĭ nanao hlŏng lar. Ƀing mơnuih kơkuh pơpŭ kơ hlô laih anŭn rup ñu, laih anŭn abih bang hlơi pô mă tŭ gru anăn ñu, ƀing anŭn hrơi mlam ƀu hmâo tơlơi pơdơi ôh.”

12Anai yơh tơlơi gir kơ ƀing rơgoh hiam, jing ƀing djă pioh kơjăp tơlơi Ơi Adai pơtă laih anŭn tơlơi đaŏ kơ Yêsu.

13Kâo hmư̆ asăp mơ̆ng adai laĭ: “Čih bĕ tơlơi anai: Mơ̆ng ră anai pơ anăp, mơyun hiam yơh kơ ƀing djai jing ƀing djai amăng Khua Yang!” Yang Bơngăt Hiam laĭ: “Sĭt biă mă, gơñu či pơdơi mơ̆ng tơlơi gleh glăn gơñu, laih anŭn khul bruă gơñu đuaĭ tui gơñu.”

Bơyan Hơpuă Lŏn Tơnah

14 # Đaniel 7:13. Giơ̆ng anŭn kâo lăng, anai nê hmâo sa ƀŭt hiăng kŏ; ƀơi hiăng anŭn hmâo sa čô hrup hăng Ană Mơnuih hlăk dŏ ber. Akŏ Ñu đua mŭk pơtao mah, tơngan Ñu djă sa ƀĕ mơnek ƀơ̆ng biă mă. 15#Yôel 3:13.Sa čô ling jang pơkŏn tơbiă mơ̆ng sang kơkuh pơpŭ, laih anŭn hăng asăp kraih ñu iâu Pô dŏ ber ƀơi hiăng kŏ: “Yơr mơnek Ih laih anŭn yuă bĕ, yua kơ mông yuă truh laih, bơyan yuă ƀơi lŏn tơnah truh laih.” 16Tui anŭn Pô dŏ ber ƀơi hiăng kŏ glŏm mơnek Ñu pơ lŏn tơnah laih anŭn Ñu yuă abih lŏn tơnah yơh.

17Sa čô ling jang pơkŏn tơbiă mơ̆ng sang kơkuh pơpŭ amăng adai. Ñu ăt hmâo sa ƀĕ mơnek ƀơ̆ng kar kaĭ mơ̆n.

18Sa čô ling jang pơkŏn tơbiă mơ̆ng kơƀang ngă yang, pô hmâo tơlơi dưi ƀơi apui, hăng asăp kraih ñu iâu pô hmâo mơnek ƀơ̆ng biă mă, laĭ: “Yơr mơnek ih laih anŭn trơĭ bĕ khul boh kơƀâu ƀơi lŏn tơnah, yua kơ boh kơƀâu tơsă laih.” 19Tui anŭn ling jang anŭn glŏm mơnek ñu pơ lŏn tơnah, laih anŭn trơĭ khul kơtul boh kơƀâu ƀơi lŏn tơnah, laih anŭn glŏm boh kơƀâu anŭn amăng kơthŭng djet prŏng kơ tơlơi Ơi Adai hil. 20#Êsai 63:3; Čok 1:15; Bơrđ 19:15.Arăng khŏm juă hĭ gơñu amăng kơthŭng djet boh kơƀâu anŭn pơ gah rơngiao plei, laih anŭn drah tơbiă mơ̆ng kơthŭng anŭn đĭ dơ̆ bra aseh, laih anŭn ling ataih truh kơ kơplah wah klâo rơtuh wang kilômet.

Currently Selected:

Tơlơi Bơrơđah 14: JRA2016

Highlight

Copy

Compare