Tơlơi Bơrơđah 13

Dua Drơi Hlô

1 # Đaniel 7:3; Bơrđ 17:3,7-12. Giơ̆ng anŭn kâo ƀuh sa drơi hlô glai tơbiă mơ̆ng ia rơsĭ, hmâo pluh ƀĕ tơki laih anŭn tơjuh boh akŏ. Ƀơi tơki ñu hmâo pluh boh mŭk pơtao, laih anŭn ƀơi rĭm boh akŏ ñu hmâo anăn ƀrưh hmiah kơ Ơi Adai. 2#Đaniel 7:4-6.Hlô kâo ƀuh anŭn hrup hăng djrang, tơkai ñu hrup hăng tơkai čơgâo, amăng bah ñu hrup hăng amăng bah rơmông dŭl. Ana grai brơi kơ hlô glai anŭn tơlơi kơtang, gre pơtao, laih anŭn tơlơi dưi prŏng ñu pô. 3Sa amăng tơjuh boh akŏ ñu hrup hăng hmâo tơlơi rơka kơtang, samơ̆ anih rơka anŭn hmâo hlao hĭ laih, laih anŭn abih bang lŏn tơnah hling hlang biă mă laih anŭn đuaĭ tui hlô glai anŭn. 4Arăng kơkuh pơpŭ kơ ana grai, yua kơ ñu hmâo brơi laih tơlơi dưi kơ hlô glai anŭn, hăng laĭ tui anai: “Hlơi pô jing hrup hăng hlô anŭn, laih anŭn hlơi pô dưi pơblah hăng ñu?”

5 # Đaniel 7:8,25; 11:36. Arăng brơi kơ hlô anŭn amăng bah pơhiăp pơgao laih anŭn ƀrưh hmiah kơ Ơi Adai, ñu hmâo tơlơi dưi wai lăng amăng pă pluh dua blan. 6Hlô anŭn ha amăng bah pơhiăp ƀrưh hmiah hăng Ơi Adai, ƀrưh hmiah kơ anăn Ơi Adai laih anŭn kơ anih Ñu dŏ, laih anŭn kơ ƀing dŏ amăng adai. 7#Đaniel 7:21.Kar kaĭ mơ̆n arăng brơi kơ ñu dưi nao pơblah hăng ƀing rơgoh hiam laih anŭn ñu dưi hĭ hăng ƀing gơ̆. Laih anŭn arăng brơi kơ ñu tơlơi dưi wai lăng abih bang djuai mơnuih, abih bang ană plei pla, abih bang tơlơi pơhiăp, laih anŭn abih bang lŏn čar. 8#Adoh 69:28.Abih bang mơnuih hơdip ƀơi lŏn tơnah či kơkuh pơpŭ kơ ñu, jing ƀing mơnuih ƀu hmâo ôh anăn čih amăng hơdrôm hră tơlơi hơdip Ană Triu, Pô arăng hmâo pơdjai laih hlâo kơ hrơi hrih lŏn tơnah. 9Hlơi pô hmâo tơngia, brơi ñu hmư̆ bĕ!

10 # Yêr 15:2; 43:11. Tơdah hlơi pô khŏm jing mơnă,

Brơi ñu jing mơnă yơh.

Tơdah hlơi pô khŏm tŭ tơlơi pơdjai hăng đao,

Ñu anŭn khŏm či tŭ tơlơi pơdjai hăng đao yơh.

Anai jing tơlơi gir laih anŭn tơlơi đaŏ kơ ƀing rơgoh hiam.

11Tơdơi kơ anŭn kâo ƀuh sa drơi hlô glai pơkŏn tơbiă đĭ mơ̆ng lŏn. Ñu hmâo dua ƀĕ tơki hrup hăng tơki ană triu, laih anŭn pơhiăp hrup hăng ana grai. 12Ñu yua abih tơlơi dưi prŏng hlô tal sa ƀơi anăp hlô glai tal sa anŭn, ñu ngă brơi lŏn tơnah laih anŭn abih bang ƀing mơnuih dŏ ƀơi lŏn tơnah kơkuh pơpŭ kơ hlô tal sa, jing hlô rơka kơtang hmâo hlao laih. 13Ñu ngă lu gru kơnăl prŏng, tơl ngă brơi apui mơ̆ng adai lĕ trŭn pơ lŏn tơnah ƀơi anăp mơnuih; 14ñu plư ƀing dŏ ƀơi lŏn tơnah hăng khul gru kơnăl ñu hmâo tơlơi dưi ngă ƀơi anăp hlô. Ñu pơtă kơ ƀing anŭn ngă rup hlô hmâo rơka yua kơ đao samơ̆ ăt dŏ hơdip. 15Ñu ăt hmâo tơlơi dưi brơi jua suă pran kơ rup hlô anŭn, kiăng kơ rup hlô dưi pơhiăp, laih anŭn brơi arăng pơdjai hĭ ƀing ƀu kơkuh pơpŭ ôh kơ rup hlô anŭn. 16Ñu ăt ngă brơi abih bang mơnuih, ƀing anĕt wơ̆t ƀing prŏng, ƀing pơdrŏng wơ̆t ƀing ƀun rin, ƀing rơngai wơ̆t ƀing hlŭn leng kơ hmâo gru kơnăl ƀơi tơngan gah hơnuă ƀôdah ƀơi athơi ƀing gơñu, 17kiăng kơ ƀu hmâo hlơi dưi blơi ƀôdah sĭ mia tơdah gơñu ƀu hmâo ôh hră čih anăn hlô ƀôdah mrô hlô.

18Amăng tơlơi anai khŏm hmâo tơlơi kơhnâo. Hlơi jing mơnuih thâo hluh brơi ñu tĭng bĕ mrô hlô anŭn, yua kơ mrô anŭn jing mrô kơ anăn sa čô mơnuih; mrô anŭn jing mrô năm rơtuh năm pluh năm.

Currently Selected:

Tơlơi Bơrơđah 13: JRA2016

Highlight

Copy

Compare