ꞌThianaattõ 9

Lõhõt cĩ Nyekuci hĩ Nõõa

1Baa aggatan Nyekuci Nõõa hĩ buul cĩgĩnnĩg anneek, “Aꞌnyahit lõhõlĩ ꞌcĩg mẽẽlĩg ꞌrĩng. Aꞌnyĩĩk lõhõlĩ cugguung buúk hiita haꞌnyahit lõhõlĩ ꞌcĩg mẽẽlĩg, hátĩ hĩbbĩtĩt looc nicci vẽlẽk. 2Au hatĩ itieelinnii idiꞌngwaana hĩ hĩbaallĩ hĩ hẽlẽggĩ ꞌcĩg õgõlĩt loota hĩ ulugo vẽlẽk nganiita. Aattĩg hatĩ nẽẽg vẽlẽk attiaa cunni. 3Haaꞌnyuung naa ngagiit ĩhõõggõ hĩĩtõ ꞌgẽẽn cunuung hĩ baa haaꞌnyuung haal hĩ ꞌdiaatĩna.

4“Nẽẽthĩ, ꞌgii hõdẽẽthõng ꞌcĩ haduhaakuung naa cieeni, ma hadaku iding ꞌcĩ nga aꞌnyak biyyi cĩg rũgẽtaak. 5Nẽ ẽẽtĩ ꞌcĩ aruk eet, aruhi hatĩ ẽẽtĩ tĩho buúk. Nẽ má aruk idingi eet, aruhi hatĩ idingi tĩho buúk, hĩnĩngĩtĩ baa hẽhẽnyta naa eet haau hĩ naana.

6“Ma aruk eet umwaa ꞌgõõnĩ,

aruk hatĩ eet tĩho buúk ẽẽtĩ umwaanĩ;

hĩnĩngĩtĩ baa ẽhẽnyta Nyekuci

eet haau hĩ nẽẽnĩ.

7Nẽẽthĩ, hadiimmuung naa ngagiit aꞌnyahit lõhõlĩ ꞌcĩg mẽẽlĩg ꞌrĩng, hátĩ hiita hõlõmanit lohollia cĩg lõhõlĩ cugguung looc nicci vẽlẽk.”

8Nẽ tarĩ uduhaak Nyekuci Nõõa hĩ buul cĩgĩnnĩg ĩĩnnĩk, 9“Kõr nicci, hadak naag lõhõt hĩ ngagiit hĩ eet vẽlẽk ꞌcĩg hatĩ au urutaa cunuung, 10hĩ hẽlẽggĩ ꞌcĩg arũgĩ vẽlẽk, idiꞌngwa hĩ hĩbaallĩ baag auunnu hĩ ngagiit haahũlatõõ hõdẽĩ. 11Dĩdĩ, hadak naag hĩ ngagiit lõhõt. Iittiõõ hatĩ naa hõllõngaa hĩꞌthõõa tawan hikia hũcũda hẽlẽggĩ ꞌcĩg arũgĩ tarĩ.”

12Nẽ õthõõth Nyekuci tarĩ ĩĩ, “Ĩĩn ciee terethiinit cĩ lõhõt ꞌcĩ hadak naag hĩ ngagiit hĩ hẽlẽggĩ vẽlẽk ꞌcĩg arũgĩ. Lõhõt cĩ lõhõlĩ ꞌcĩg nga au horumwa irkiꞌnyiaannĩ. 13Hõhõrraneeha naa toolongeec caannĩ diiꞌthiohĩtõõ nẽ hatĩ ĩĩ ciee terethiinit cĩ lõhõt ꞌcĩ hadahi naa hĩ hẽlẽggĩ vẽlẽk ꞌcĩg arũgĩ cĩg lootu. 14Ma haarihi hatĩ gõõng naa diiꞌthiok lokora hũmmũtĩt looc nẽ edeeꞌnyia tõõlõngẽẽcĩ, 15hammuhunoothi hatĩ naa lõhõt baa hadak hĩ nganiit baa haini, ‘Iittiõõ hatĩ hõllõngaa hacũda naa eet hĩ hẽlẽggĩ ꞌcĩg arũgĩ vẽlẽk loota nĩnga tarĩ.’ 16Thõõth caannĩ nicciaani. Ma ꞌthẽk hĩcĩna toolongeec õhõõrranĩ diitha, hammuhunoothi ꞌthẽk hatĩ gõõng lõhõt baa hadahi naa Nyekuci hĩ eet hĩ hẽlẽggĩ ꞌcĩg arũgĩ loota nĩnga vẽlẽk.”

17Nĩngĩtĩ annẽẽkĩ Nyekuci Nõõa, “Terethiinit cĩ lõhõt ꞌcĩ hakumanẽẽkĩ naa hẽlẽggĩ ꞌcĩg arũgĩ vẽlẽk loota nĩnga ho cieeni.”

Buul cĩg Nõõa

18Baa lõhõlĩ cĩg Nõõa ꞌcĩg au haahũlatõõ cieegi: ꞌThẽm hĩ Haam hĩ ꞌJavẽth. Ĩĩn Haamĩ maaꞌnyĩ Kanaanĩ. 19Au eeta vẽlẽk loota nĩnga hattũũgẽtĩĩ cĩg lõhõlĩ ꞌcĩg ĩĩn iyyio cĩg Nõõa ho.

20Ma baa urutaa cĩ tawaanõ, baa Nõõa ꞌcĩ iꞌthianaanĩ ngaatĩ akannĩ mana cĩ viinoo. 21Ma baa kõr umwa, ũhũd Nõõa mẽrtĩ cĩ viinoo gẽrrẽẽt, nĩngĩtĩ adũũnnĩ hatangu ngũtũtũũny ꞌcieethaa cĩnnĩ. 22Ma baa aku Haamĩ maaꞌnyĩ Kanaanĩ ho, ikia ũmmũdeek maaꞌnyĩ Nõõa atangu ngũtũtũũny, nĩngĩtĩ õkõ aduhaakĩ ꞌgõtõõnõgĩ battaala. 23Ma nĩngaata, aꞌnyakta ꞌgotoonoggia ꞌThẽmĩ hĩ ꞌJavẽth ngĩtõõga nẽ otooyyiaĩ ĩĩcĩ bahucciinnu aĩ, hátĩ hiittiõõ hõllõngaa acĩn maaꞌnyĩ. Nĩngĩtĩ adukni nẽẽg ꞌcieetõõ nẽ ubungit maaꞌnyĩ.

24Ma baa ikia ammanyanĩ Nõõa dũũtĩthĩ, ikia ĩthĩk aĩ udtuuha ngeerĩnĩ ꞌcĩ horggeeno ĩnõõnnõ ngaatĩ aayyi ngũtũtũũny. 25Nĩngĩtĩ alĩĩllĩ gẽrrẽẽt ĩꞌthõng hĩccĩĩn Kanaan ngeertĩ Haamĩ anneek,

“Aku hatĩ ĩĩnĩ nii appahaca

ꞌcĩ adticanoothihi ꞌgotoonogu.”

26Nẽ tarĩ ĩĩ,

“Aꞌnyĩĩk Makayyioohit Nyekuc cĩ ꞌThẽmĩ hubuluthi

nẽ aꞌnyĩĩk Kanaan hĩĩ appahaca cĩnnĩ.

27Hala naa Nyekuc hĩttõõrĩhĩ ꞌJavẽth looc ꞌcĩ maka

nẽ aaꞌnyĩk ĩnõõnnõ hotholit baliinit hĩ ꞌThẽm.

Aꞌnyĩĩk ĩnõõnnõ haaꞌnyĩk Kanaan hĩĩ appahaca cĩ ꞌJavẽthĩ.”

28Ma baa urutaa cĩ tawaanõ, ikia aau Nõõa hĩĩtõ irkiꞌnyia ꞌmiiaꞌnya iyyio hĩ hẽẽn ꞌtur (350) tarĩ. 29Nĩngĩtĩ adaaknĩ nẽẽ baa ĩĩtõ irkiꞌnyia ꞌmiiaꞌnya tũrkũwwec hĩ hẽẽn ꞌtur (950).

Currently Selected:

ꞌThianaattõ 9: did

Highlight

Copy

Compare