ꞌThianaattõ 8
8
Õdõhõk lõõcĩ
1Baa ammuha Nyekuci Nõõa hĩ eet cĩg õlõ cĩnnĩ hĩ idiꞌngwa baag aꞌngĩdeek nẽẽ haahũlatõõ vẽlẽk waathinnioohĩĩ baag ammũlũũnyanĩ tawanĩ looc, nĩngĩtĩ aaꞌnyĩkĩ ngõõt huuhan looc hõdõhõk. 2Ma ho, ikia ũꞌnyũũg Nyekuci ũꞌngĩ cĩg hidiowwẽẽn baag arihaanĩ maama loota nẽ ĩbĩlĩ tammu buúk. 3Nĩngĩtĩ arritaniini maama hĩdĩĩc hĩdĩĩc waathinnioohĩĩ ꞌcĩg ĩĩn ꞌmiia hõdẽĩ hĩ hẽẽn ꞌtur (150). 4Ma baa nyĩlõk cĩ tũrkĩramma, baa ĩĩn õmmõtõ hĩ tũrkĩramma irkit niccia, ikia ĩbĩl haahũlĩ muurriõhĩĩ ꞌcĩg haĩ Ararat. 5Nẽ baa aalla arritanni maama noho ĩꞌthõng nyĩlõk cĩ õmmõtõ. Ma kõr ꞌcĩ oou cĩ nyĩlõk cĩ õmmõtõ, iita ẽdẽẽnyta ooti cĩg muurriohu.
6Ma urutaa cĩ waathinniook hẽẽn ꞌwec, ubbuuk Nõõa hutuli cĩ haahũlõ, 7nĩngĩtĩ ĩꞌthõõĩ hũrrũũk hũũk hĩcĩn looc. Õkõ hinnia awanĩt hũrrũũk nicciee ĩꞌthõng hõdõhõk lõõcĩ hĩĩ vẽr nẽ hõllõngaa õbõda buúk. 8Ma ho, ĩꞌthõ Nõõa ngabuuthi hũũk hĩcĩn hatĩ õdõhõk lõõcĩ. 9Ammũdoothĩk hinnia ngabuuthi nicciee maam nga abbĩꞌthĩĩ looc vẽlẽk, nĩngĩtĩ alilliaananĩ õbõdaanĩ haahũlatõõ tarĩ nẽ aggam Nõõa ĩnõõnnõ õbõdĩ ĩĩttõõ. 10Ma ho, ẽrẽẽõ Nõõa waathinniook tũrkĩramma, nĩngĩtĩ ĩꞌthõõĩ ngabuuthi tarĩ. 11Ma baa ꞌjiaat, õbõda ngabuuthi nicciee aꞌnyaha bolloohinit cĩ hẽẽt ꞌcĩ haĩ oliv#8:11 Hẽẽt cĩ Olivi: Ĩĩn ciee hẽẽt ꞌcĩ abbiiri ꞌcĩ aduk eeta cĩg Ĩꞌthĩraẽlĩ nẽ erehit bura cĩg olivi nẽ ammacũyyia ngõõrrõ cĩ duhẽẽttõ hode ngõõrrõ ꞌcĩ attũllẽẽnĩ ꞌloomo. ũtũũgaa cĩnnĩ. Nĩngĩtĩ agaĩ Nõõa aĩnnĩ, õdõhõk lõõcĩ. 12Ma ho, ẽrẽẽõ Nõõa waathinniook tũrkĩramma tarĩ nẽ ĩꞌthõ ngabuuthi umwa. Ma kõr niccia, iittiõõ aattĩ hõllõngaa õbõda ngabuuthi tarĩ.
13Ma abbuuk Nõõa hutuli cĩ haahũlõ ho, adtuuha hinnia hiꞌthihi tawan hode nẽẽ maam ꞌcĩg oorĩk buúk. Nẽ kõr niccia, nyĩlõk ꞌcĩ hõdẽĩ baa ĩĩn hõdẽĩ, iita õdõlanit irkiꞌnyia cĩg Nõõa ꞌcĩg aayyi loota nĩnga ĩĩtõ ꞌmiiaꞌnya tõrkõnõn hĩ hõdẽĩ (601). 14Ma baa nyĩlõk ꞌcĩ ꞌramma, baa ĩĩn hẽẽn ꞌramma hĩ tũrkĩramma, ikia õdõhõk lõõcĩ vẽlẽk ĩĩ vẽr.
15Ma ho, uduhaak Nyekuci Nõõa ĩĩnnĩk, 16“Uduhutta battaala hĩ ngaa cunni hĩ lõhõlĩ cugunnig hĩ ngaaĩ cĩggĩĩng vẽlẽk. 17Aꞌnyĩĩk idiꞌngwa buúk hĩ hĩbaallĩ hĩ hẽlẽggĩ ꞌcĩg õvvõ loota, baag aꞌngĩdeehi nii haahũlatõõ hiita battaala, hátĩ hiita hittirit nẽ ĩꞌthaattothoothĩk looc vẽlẽk.”
18Ma baa uduhutta Nõõa hĩ ngaa cĩnnĩ hĩ lõhõlĩ cĩgĩnnĩg hĩ ngaaĩ cĩg lõhõlĩ cĩgĩnnĩg battaala, 19iita uduhutta idiꞌngwaana buúk hĩ hĩbaallĩ hĩ hẽlẽggĩ ꞌcĩg õgõlĩt loota vẽlẽk battaala cũũmõ cũũmõ.
Ĩbboorĩk Nõõa Nyekuc ꞌgaarrieenit
20Ikia ẽtẽhẽnya Nõõa nĩngĩtĩ ĩbbõõrĩkĩ Makayyioohit ꞌgaarrieenit nẽ ẽbẽra idiꞌngwa hõdẽĩ hõdẽĩ ꞌcĩg tẽllĩg ꞌcĩg occa ĩĩn ꞌgaarriẽẽn hĩ hĩbaallĩ buúk noho, nĩngĩtĩ ĩwaadĩ idiꞌngwa niccig hĩĩtõ ꞌgaarriẽẽn ꞌcĩg aaꞌnyĩk Makayyioohit. 21Ma baa õdõlan muyuuhĩ cĩ mẽdĩĩth cĩ idiꞌngwaanu Nyekuc ko, ikia atal Nyekuci, nĩngĩtĩ abũtanĩ aĩnnĩ, “Iittiõõ hatĩ naa hõllõngaa hacciini looc tarĩ, hĩnĩngĩtĩ ꞌthẽccanẽẽt cĩg eetuk. Tananga ammuk nẽẽg thooꞌthiok ꞌcĩg abathĩ ngaanĩngĩtĩ hĩdĩꞌthẽẽtõ, iittiõõ ꞌthẽk hatĩ naa hõllõngaa hacũda eet hĩ hẽlẽggĩ ꞌcĩg arũgĩ tarĩ.”
22“Nẽ ma ꞌthẽk nga aaĩ lõõcĩ cieeni,
aattĩg ꞌthẽk hatĩ gõõng waathinniooha cĩg kanniittak hĩ cĩg janiittak.
Nẽ aalla ꞌthẽk hatĩ lalĩĩthĩ hĩ abuurꞌthet buúk ũdũt.
Nẽ tarĩ aalla ꞌthẽk hatĩ gõõng ũrraatĩ buúk hĩ tagĩĩth
hĩ baalin hĩ waathĩn vẽlẽk ũdũt.”
Currently Selected:
ꞌThianaattõ 8: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
Videos for ꞌThianaattõ 8
Episode 36:Are We Near the End? The Bible’s Hidden Pattern
Under The Hood
EP 25. Why Do So Many Cultures Have Flood Myths? The Truth Behind the Stories
Under The Hood
Episode 29: Did a Meteor Really Trigger Noah’s Flood?
Under The Hood
Ep 32. Genesis 6-7: The Flood: A Heartbroken God Brings Justice and Mercy
The Bible Show