ꞌThianaattõ 24
24
Rẽbẽka hĩ Iꞌthaako
1Ma baa ikia atahaany Abũrahamĩ gẽrrẽẽt, ikia aggatan Makayyioohiti ĩnõõnnõ ngaatĩ aaꞌnyĩkĩ hẽlẽggĩ ꞌcĩg mẽẽlĩg. 2Ma kõr umwa, ikia ũtũvvũ Abũrahamĩ dticciannioohit cĩnnĩ cobbi, ꞌcĩ aggam ijjio vẽlẽk cĩg olu nẽ ĩĩnnĩk, “Taadĩk aꞌthiit cunni athaanaa caannĩ. 3Hadiimmii naa nganiit bũtan ꞌthaarĩĩ cĩg Makayyioohit Nyekuc cĩ hẽẽtkujjieen hĩ cĩ lootu, ngaatĩ hõllõngaa hatĩ aꞌthũwanaakĩ loholeec caannĩ Iꞌthaako ngaa looccaa cĩ Kanaanĩ ho. 4Bĩĩt looccaa caannĩ hĩ ĩĩcĩ ittioonniok cĩgannĩg nẽ idiimahuu loholeec caannĩ Iꞌthaako ngaa ĩĩca.”
5Nĩngĩtĩ ajini dticciannioohiti cĩnnĩ ho annẽẽkĩ, “Má da hatĩ hũũk hũtũbũr bũhẽẽcĩ tĩho ngaatĩ hõõkõraanna hĩ nganĩĩt ĩꞌthõng nĩngĩtĩ? Ĩcca occa aaꞌnyaa hũũhĩ ngeeruni ĩĩcĩ looc baa akuuni nii ho?”
6Ẽdẽcĩ Abũrahamĩ ĩnõõnnõ anneek, “Aitiõõ, ma hõkõõĩ loholeec caannĩ ĩĩca. 7Baa Makayyioohit Nyekuc cĩ hẽẽtkujjieen ꞌcĩ aaꞌnya nganĩĩt hũtũngeek looc cĩ baaba hĩ ittioonniok cĩgannĩg ko. Ĩꞌthõõakii hatĩ nẽẽ aajĩlõ cĩnnĩ hikia heteretheehi ngaa cĩ loholeec caannĩ ĩĩca. Hĩnĩngĩtĩ baa abũtaneeka nẽẽ aĩ, ‘Haaꞌnyihi hatĩ looc icci lõhõlĩ cugunnig.’ 8Má abũrĩ bũhẽẽcĩ tĩho ngaatĩ õõkõraannu hõdẽĩ, aitiõõ hatĩ lõbũtĩ caannĩ ho hõllõngaa aggammi nganiita. Nẽẽthĩ haduhaakii dĩdĩ, ma hõkõõĩ loholeec caannĩ ĩĩca.” 9Nĩngĩtĩ ataadĩkĩ dticciannioohiti aꞌthiit cĩnnĩ athaanaa cĩ Abũrahamĩ makayyioohit cĩnnĩ nẽ ũbũtan ngaatĩ hatĩ adĩmanĩ thõõth ꞌcĩ aduha Abũrahamĩ ho.
10Ma ho, ahala dticciannioohiti nicciee nyaakaalnya õmmõtõ nyaakaalnyanĩĩ cĩg Abũrahamĩ, nĩngĩtĩ aꞌngĩdĩ õkõõĩ ĩĩcĩ looc ꞌcĩ haĩ Aram Naharaim,#24:10 Aram Naharaim: Baa aaĩ lõõcĩ ꞌcĩ haĩ Aram Naharaim ko hõrggẽẽnaa cĩ hidiowwẽẽn ꞌramma ꞌcĩg haĩ ꞌTigirith hĩ ꞌcĩ haĩ Euvaratẽth. ꞌtaaũnaa ꞌcĩ aayyi Naahõrĩ. Baa aaꞌnyĩk nẽẽ nyaakaalnya hirrionganit kadĩkadĩngĩ ꞌcĩg mẽẽlĩg ꞌrĩng, ꞌcĩg baag attiha Abũrahamĩ hĩĩ ꞌbaaninit. 11Ma baa iggiingi kõrra, hĩgõõng õõt ngaaĩ hidiowwa, ikia õdõlan nẽẽ wĩĩtaneec umwa ꞌcĩ õbõhõõ hĩ ꞌtaaũn, nĩngĩtĩ aaꞌnyĩkĩ nyaakaalnya hiyyiomanit wĩĩtaneeca lõmẽrra.
12Ma ho, alaõ dticciannioohiti cĩ Abũrahamĩ ho ĩĩ, “Makayyioohit Nyekuc cĩ makayyioohit caannĩ Abũrahaamõ, ẽlaa hũmmũda ngaa ꞌcĩ hakuunahi ho. Teretheek makayyioohit caannĩ Abũrahaamõ tarbalꞌthẽẽt cunni. 13Nganĩĩt ciee haaĩ wĩĩtaneecaa ꞌcĩ hatĩ au ogoocini buheeci cĩg ꞌtaaũnaak ko. 14Aꞌnyĩĩk bũhẽẽc ꞌcĩ hatĩ hanneehi naa, ‘Bũhẽẽcĩ ciee ꞌbaanaa baaĩ nuun maam hũhũdĩ.’ Má anneeka, ‘Hũdĩ nẽ heeliki nyaakaalnya cugunnig buúk huhuddi.’ Aꞌnyĩĩk hĩĩ ĩnõõnnõ ꞌcĩ ẽbẽraahi nii dticciannioohit cunni Iꞌthaako ho. Ma hatĩ aaĩ thõõth ciee hoti, hikia hatĩ hagawa naa hĩĩna, ũꞌthũũtĩ nii makayyioohit caannĩ.”
15Ma baa nga hẽdẽcaak nẽẽ laiinit, uppwaanna bũhẽẽcĩ umwaa ꞌcĩ haĩ Rẽbẽka, aꞌnyaha deeri iꞌnyiaawa. Baa ĩĩn nẽẽ tĩnaatĩ Bethuele ngeertĩ ngaa ꞌcĩ haĩ Mĩĩlka. Baa ĩĩn Mĩĩlka ngaa cĩ ꞌgõtõnĩ Abũrahamĩ ꞌcĩ haĩ Naahõr. 16Baa ĩĩn nẽẽ bũhẽẽc ꞌcĩ ẽllẽẽmĩth gẽrrẽẽt nẽ nga hatagguutho hĩ eet umwa ũdũt. Nĩngĩtĩ allũũcẽnĩ õkõõĩ wĩĩtaneeca nẽ otogooccik maam deeraa cĩnnĩ hĩbbĩt, nĩngĩtĩ õtõdaanĩ akuuni battaala.
17Ma ho, ũꞌthũkũcoothĩk dticciannioohiti cĩ Abũrahamĩ ho Rẽbẽka nẽ ĩĩnnĩk, “Bũhẽẽcĩ ciee, ꞌbaanaa baaĩ nuun maam hũhũdĩ.”
18Nĩngĩtĩ aaꞌnyĩkĩ Rẽbẽka ĩnõõnnõ maam deera nẽ ĩĩnnĩk, “Hũdĩ.”
19Ma baa ũhũdĩ ẽẽtĩ nicciee ẽlẽk, uduhaak Rẽbẽka ĩnõõnnõ ĩĩnnĩk, “Ĩꞌnya thĩ heeliki nyaakaalnya buúk huhuddi.” 20Ma hĩdĩĩkoothong ĩcĩĩdĩk maam ꞌcĩg anyiꞌthiaa deera ho haahũlatõõ nẽ ukul ũũk otogooca maam ũgĩ tarĩ, ĩꞌthõng heelĩk nyaakaalnya vẽlẽk. 21Nĩngĩtĩ ẽbẽhĩ dticciannioohiti cĩ Abũrahamĩ ho loholeec nicci muguruur nẽ ittiaman hatĩ má ĩĩn bũhẽẽc nicci ꞌcĩ ẽbẽraak Makayyioohiti Iꞌthaako ho.
22Ma baa uhuddi nyaakaalnya ẽlẽk, ittiha dticciannioohiti cĩ Abũrahamĩ ho ꞌralit ꞌcĩ ĩĩn ꞌdaab nẽ aarĩhĩ ũꞌngeeca nẽ itihimẽẽhĩ maccĩrẽẽn ꞌramma ꞌcĩg obbitig ꞌcĩg ĩĩn ꞌdaab attiaa cĩnnĩ. 23Nĩngĩtĩ ajini ĩnõõnnõ annẽẽkĩ, “Ĩĩnĩ nii tĩnaatĩ nganĩ? Má occa nĩngĩtĩ hooginna hĩ eet cĩgannĩg ko baalin nicci õlõõ cĩ maaconu aaĩ?”
24Ẽdẽcĩ Rẽbẽka ĩnõõnnõ anneek, “Hĩĩnĩ naa tĩnaatĩ Bethuele, ngeertĩ Naahõrĩ, haĩ aattĩ nyakangaan caannĩ Mĩĩlka. 25Aaĩ nĩngĩtĩ occa ooginnu niig õlõõ cĩnaang nẽ aaĩ arteeniti ꞌcĩ occa ẽgĩ nyaakaalnya buúk.”
26Ma nĩngaata, akat dticciannioohiti cĩ Abũrahamĩ ho huruꞌnyia nẽ ala Makayyioohit ĩĩnnĩk, 27“Hatali Makayyioohit Nyekuc cĩ Abũrahamĩ gẽrrẽẽt, ngaatĩ ĩĩnnĩ tarbal nẽ ĩdĩmaneek makayyioohit caannĩ thõõth baa aduha. Aꞌnyahaawa Makayyioohiti Nyekuci ĩꞌthõng õlõ cĩ ittioonniok cĩg makayyioohit caannĩ Abũrahaamõ.”
28Ma nĩngaata, ukul Rẽbẽka ũũk uduhaak eet cĩg halang cĩnĩĩng nyeemuut cĩ dticciannioohit cĩ Abũrahamĩ ho. 29Nẽẽthĩ ꞌyioko, baa aꞌnyak Rẽbẽka ꞌgõtõnĩ umwa ꞌcĩ haĩ Laban, ꞌcĩ baa avir õkõ battaala hũũk hĩcĩn eet ꞌcĩ aaĩ hebereecaa cĩ hidioo ho. 30Ma baa acĩn Labanĩ ꞌralit ꞌcĩ aꞌnyak ngoonnia ũꞌngeeca hĩ buruhi ꞌcĩg ahimit athĩnĩĩ nẽ ĩthĩk ngaatĩ aduhaanĩ ngoonnia thõõth ꞌcĩ aduhaak ẽẽtĩ ĩnõõnnõ ho, ikia ivvir Labanĩ hĩdĩĩkoothong ũũk ĩĩcĩ hebereec cĩ hidioo, ngaatĩ baa nga abĩllĩ ẽẽtĩ hĩ nyaakaalnya cĩgĩnnĩg. 31“Ne ꞌcĩ abillu battaala ngaati ho? Hõõt ĩĩcĩ olu. Aggatannii Makayyioohiti nganiita, hũkũmaneeha naa ꞌcieeth ꞌcĩ occa ooginnu õlõõ cĩnaang ẽlẽk hĩ nĩngĩtĩ ꞌcĩ occa ooginni nyaakaalnya buúk.”
32Nĩngĩtĩ õkõõĩ dticciannioohiti cĩ Abũrahamĩ ho ĩĩcĩ õlõ cĩ kĩ Labanĩ nẽ ũũk õõga Labanĩ ijjio nyaakaalnyanĩ, nĩngĩtĩ aaꞌnyĩkĩ ĩhõõggõ arteenit hẽgẽẽcõ. Nẽ aꞌnyahaak hẽẽrõn niccig buúk maam ꞌcĩg acũũranĩ ꞌthoo. 33Ma baa aꞌnyahaak eeta dticciannioohit nicci ꞌgẽẽn ko, õthõõth hinnia nẽẽ aĩ, “Hõllõngaa occa haduhi, ĩꞌnya nõõ huduhaahuung thõõth ꞌcĩ hatĩ hakuuni ngaati ho.”
Ma ho, ẽdẽc Labanĩ ĩnõõnnõ ĩĩnnĩk, “Thõõthõ.”
34Nĩngĩtĩ õthõõthĩ nẽẽ aĩnnĩ, “Hĩĩnĩ naa dticciannioohit cĩ Abũrahamĩ. 35Aggatan Makayyioohiti Nyekuci Abũrahaamõ gẽrrẽẽt, aaꞌnyĩk ĩnõõnnõ tĩĩn, hĩ ẽẽtha, hĩ aꞌtha, hĩ maccĩrẽẽn hĩ ꞌdaab, hĩ appahacaaꞌnya ꞌcĩg maacĩg hĩ ꞌcĩg ngayyig, hĩ nyaakaalnya hĩ thigirẽẽt buúk. 36Ikia ũtũhũa Thaara ngaa cĩ makayyioohit caannĩ buúk loholeec ꞌcĩ maacĩ ꞌcĩ haĩ Iꞌthaako baa atahaany nẽẽnĩ. Aaꞌnyĩk Abũrahamĩ ngeerĩnĩ tĩho hẽlẽggĩ cĩgĩnnĩg vẽlẽk. 37Nẽ baa aaꞌnya makayyioohiti caannĩ hũbũtan anneeka, ‘Ma hẽlẽmaakĩ loholeec caannĩ hũꞌthũwana ngaa ngaaĩnĩĩ cĩg looc cĩ Kanaanĩ ho. 38Bĩĩt looccaa cĩ eet cĩg baaba, mũdoothĩk ittioonniok cĩgannĩg nẽ ũũk idiimahuu loholeec caannĩ Iꞌthaako ngaa ĩĩca.’
39“Nĩngĩtĩ hajini makayyioohit caannĩ ho hannẽẽkĩ, ‘Má hatĩ abũrĩ bũhẽẽcĩ tĩho ngaatĩ hõõkõraanna hõdẽĩ, hadĩmani occa hatĩ hutuno?’
40“Ẽdẽcĩ nẽẽ aĩ, ‘Gõõng hathihi naa Makayyioohit hõdõõkõthĩ, ĩꞌthõõakii hatĩ nẽẽ aajĩlõ cĩnnĩ hikia hẽtẽrẽthaahi bũhẽẽc cĩ loholeec caannĩ ittioonniohĩĩ ĩcĩg nyakangaan caannĩ. 41Má abũrĩ maajihi bũhẽẽc tĩho ngaatĩ õõkõraannu hĩ bũhẽẽc hõdẽĩ, aitiõõ hatĩ lõbũtĩ caannĩ ho hõllõngaa aggammi nganiita.’
42“Ma hõdõlani wĩĩtaneec aangaani ho, hikia halaõ hĩĩna, ‘Makayyioohit Nyekuc cĩ makayyioohit caannĩ Abũrahaamõ, ẽlaa hũmmũda bũhẽẽc ꞌcĩ hakuuni ngaati ho. 43Nganĩĩt ciee haaĩ wĩĩtaneecaa ꞌcĩ hatĩ au ogoocini ngaaĩ cĩg ꞌtaaũnaak ko. Aꞌnyĩĩk bũhẽẽc ꞌcĩ hatĩ má hanneehi naa, “Bũhẽẽcĩ ciee, ꞌbaanaa baaĩ nuun maam hũhũdĩ.” 44Má anneeka, “Hũdĩ nẽ heeliki nyaakaalnya cugunnig buúk,” aꞌnyĩĩk hĩĩ ĩnõõnnõ ꞌcĩ ẽbẽra Makayyioohiti hĩĩ ngaa cĩ ngeertĩ makayyioohit caannĩ Abũrahaamõ.’
45“Ma baa nga hẽdẽcaak laiinit caannĩ ho buúk, uppwaanna hinnia Rẽbẽka, aꞌnyaha deeri iꞌnyiaawa nẽ ũllũũcĩ ũũk ĩĩcĩ wĩĩtaneeco, õkõ adtĩĩla maam. Nĩngĩtĩ hõthõõthĩkĩ hannẽẽkĩ, ‘Bũhẽẽcĩ ciee ꞌbaanaa baaĩ maam hũhũdĩ.’
46“Ma nĩngaata, õdõnga loholeec deeri iꞌnyiaawa hĩdĩĩkoothong nẽ ĩnnĩhaa, ‘Eri thiggia hũdĩ nẽ heeliki nyaakaalnya cugunnig ko buúk huhuddi.’ Nĩngĩtĩ hahũdẽẽnĩ nẽ eelĩka loholeec nyaakaalnya.
47“Ma ho, hijina hĩĩnnĩha, ‘Ĩĩnĩ nii tĩnaatĩ nganĩ?’
“Ẽdẽcca anneeka, ‘Hĩĩnĩ naa tĩnaatĩ Bethuele ngeertĩ Naahõrĩ. Haĩ aattĩ nyakangaan caannĩ Mĩĩlka.’
“Nĩngĩtĩ haarĩkĩĩ ꞌralit ũꞌngeecaa cĩnnĩ nẽ hitihimẽẽhĩ maccĩrẽẽn attia. 48Nĩngĩtĩ hakannĩ huruꞌnyia nẽ halawa Makayyioohit. Hĩdĩhĩtha Makayyioohit Nyekuc cĩ Abũrahaamõ, ngaatĩ aꞌnyahaanna ĩꞌthõng huppwaannak ittioonniok cĩg makayyioohit caannĩ Abũrahaamõ nẽ aaꞌnya hũmmũda tĩnaatĩ ngeertĩ ꞌgõtõnĩ Abũrahamĩ hĩĩ ngaa cĩ Iꞌthaako. 49Nẽẽthĩ ꞌyioko, má ammaanniku makayyioohit caannĩ Abũrahaamõ nẽ ĩdĩmattu thõõth cĩnnĩ, uduktaahaangu hode má aꞌnyamanni, hátĩ hagawa ꞌgõõl ꞌcĩ hõkõõĩ.”
50Ma nĩngaata, edecit Labanĩ hĩ Bethuele ĩĩtõ, “Hĩ ꞌyioko aku thõõth ciee hĩ Makayyioohit ko, aitiõõ thõõth ꞌcĩ occa haduhaanna naag tõõ. 51Rẽbẽka cieeni, ookorit õõtõ, aꞌnyĩĩk hĩĩ ngaa cĩ Iꞌthaako hĩcĩ baa eteretheehi Makayyioohiti ho.”
52Ma baa athĩhĩ dticciannioohiti cĩ Abũrahamĩ thõõth icci ho, akat huruꞌnyia nẽ ubuluth Makayyioohit. 53Nĩngĩtĩ attihaanĩ ꞌdaab hĩ maccĩrẽẽn aagõõng irrianĩ eeta hĩ ceremwa nẽ aaꞌnyĩk Rẽbẽka nẽ aaꞌnyĩk ꞌgõtõnĩ Rẽbẽka hĩ aattĩnnĩ buúk ꞌbaaninit cobbi gẽrrẽẽt.
54Nĩngĩtĩ aduhẽẽnĩ thĩ dticciannioohiti cĩ Abũrahamĩ hĩ eet ꞌcĩg õõkõra hĩ ĩnõõnnõ ho vẽlẽk. Ma baa ĩcĩttĩ nẽẽg loohoth cĩnnĩ, ikia uduhaak nẽẽ eet ĩĩnnĩk, “Hidiima mĩĩ naa hobodootha hõlõ. Hidiim hũmmũdoothĩha makayyioohit caannĩ.”
55Ma nĩngaata, edecit ꞌgõtõnĩ Rẽbẽka hĩ aattĩnnĩ ĩĩtõ, “Aꞌnyĩĩk nõõ loholeec haau waathinniook tũrkĩramma hode õmmõtõ nẽ nuun hatĩ oottu.”
56Ẽdẽcĩ dticciannioohiti cĩ Abũrahamĩ ho anneek, “Ma baaĩ nuun habĩllaangu. Hĩ ꞌyioko aaꞌnya Makayyioohiti heeroni ꞌcĩ abũnnaa ho, aanytaangu hobodooth hĩ makayyioohit caannĩ.”
57Ẽdẽcĩ nẽẽg aĩ, “Hutuvuyyia dako loholeec ꞌcĩ ngayyi hikia huduhaaheet thõõth ꞌcĩ ammuk nẽẽnĩ.” 58Ma ho, utuvuyyia nẽẽg Rẽbẽka nẽ ijinit ĩĩttĩk, “Atabi ꞌyioko nii ookorru hĩ eet icci?”
Ẽdẽcĩ Rẽbẽka aĩ “Eei.”
59Nĩngĩtĩ ẽlẽmaakĩ nẽẽg Rẽbẽka hĩ dticciannioohit ꞌcĩ gõõng adticanoothĩk ĩnõõnnõ õlõõ cĩnĩĩng, hookorit hĩ dticciannioohit cĩ Abũrahamĩ hĩ lothippit cĩnnĩ hõõt. 60Ma nĩngaata, aggatanit ꞌgotonnia hĩ aattĩnnĩ Rẽbẽka ĩĩttĩk,
“Aꞌnyĩĩk Nyekuc haaꞌnyi lõhõlĩ ꞌcĩg mẽẽlĩg ꞌrĩng.
Aꞌnyĩĩk Nyekuc haaꞌnyĩk lõhõlĩ cugunnig hĩllõõanit mĩrõk cĩggĩĩng.”
61Nĩngĩtĩ, akũmanõõthĩkĩ Rẽbẽka hĩ buheeci ꞌcĩg ĩĩn dticcianniook cĩgĩnnĩg ko nẽ otodit nyaakaalnya, hátĩ hookorit hĩ dticciannioohit cĩ Abũrahamĩ ho, nĩngĩtĩ õõĩ.
62Ammũdeek hinnia baa õbõda Iꞌthaako ĩĩcĩ looc cĩ Beer Lahai Roi ĩĩcĩ baa aayyi nẽẽ Negeva. 63Ma ꞌjiaatĩn umwa, ikia õtõ nẽẽ manatõõ tõõ. Ma nĩngaata, acĩnoothi hinnia nyaakaalnya ngaatĩ auuni. 64Ma baa acĩn Rẽbẽka Iꞌthaako ho, ulluuccia nyaakaala, 65nẽ ijin Rẽbẽka dticciannioohit cĩ Abũrahamĩ ho ĩĩnnĩk, “Nganĩ caa ovvooyyia ĩĩca hata?”
Ẽdẽcĩ dticciannioohiti cĩ Abũrahamĩ ho anneek, “Makayyioohit caannĩ Iꞌthaako.” Nĩngĩtĩ abungi Rẽbẽka õõ cĩnnĩ cẽrẽma.
66Ma nĩngaata, uduhaak dticciannioohiti Iꞌthaako thõõth vẽlẽk ꞌcĩ baa adĩman nẽẽnĩ. 67Nĩngĩtĩ õkõõĩ Iꞌthaako Rẽbẽka ꞌcieethaa ĩbaa aayyi morwahit cĩnnĩ Thaara nẽ ũrũmtĩ hĩĩ ngaa cĩnnĩ nĩngaata. Baa ammĩnan Iꞌthaako Rẽbẽka gẽrrẽẽt, nĩngĩtĩ aku aaꞌnyĩkĩ Rẽbẽka ĩnõõnnõ haccamanoothĩk hataarõthĩ thõõth baa daahĩth cĩ aattĩnnĩ.
Currently Selected:
ꞌThianaattõ 24: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
