ꞌThianaattõ 25
25
Ũꞌthũwan Abũrahamĩ Ketura
1Baa ikia ũꞌthũwan Abũrahamĩ ngaa umwa tarĩ ꞌcĩ haĩ Ketura, 2nẽ iita ittirria nẽẽg lõhõlĩ ꞌcĩg maacĩg tõrkõnõn ꞌcĩg haĩ ꞌthaarriok cĩggĩĩng, ꞌThimiran hĩ ꞌJõkthan hĩ Medan hĩ Midian hĩ Ithbak hĩ ꞌThũa. 3Baa ĩĩn ꞌJõkthanĩ maaꞌnyĩ buul ꞌcĩg haĩ ꞌThẽẽba hĩ Dedan. Lõhõlĩ cĩg Dedanĩ eeta cĩg Athuri hĩ cĩg Letuthi hĩ cĩg Leummi. 4Nẽ baa ĩĩn lohollia cĩg Midianĩ ꞌtur, ꞌcĩg haĩ Ẽẽppa hĩ Ẽppẽr hĩ Hanok hĩ Abida hĩ Eldaa. Baa lõhõlĩ cĩg Ketura vẽlẽk cieegi.
5Baa aduha Abũrahamĩ aĩ arigith hatĩ Iꞌthaako hẽlẽggĩ cĩgĩnnĩg vẽlẽk. 6Nẽẽthĩ, baa nga arũgĩ Abũrahamĩ, baa ẽꞌngẽraak hẽlẽggĩ cĩgĩnnĩg ũgĩ lõhõlĩ cĩg ngaaĩ cĩgĩnnĩg ꞌcĩg hidicig nẽ ĩꞌthooĩk lõhõlĩ tĩko ĩĩcĩ uruto, hĩĩtõ ꞌrẽẽttĩg hĩ ngeerĩnĩ Iꞌthaako.
Daahĩth cĩ Abũrahamĩ
7Ma nĩngaata, ikia adaak Abũrahamĩ urutaa cĩ irkiꞌnyia ꞌmiia hõdẽĩ hĩ hẽẽn tũrkĩramma hĩ ꞌtur (175). 8Baa adaahĩ nẽẽ baa atahaany ĩĩ hõrõdtõr, 9nĩngĩtĩ au adaĩ Iꞌthaako hĩ Ĩthĩmaĩl ĩnõõnnõ iloomaa cĩ Makpẽẽla, ngaatĩ õbõhõõ hĩ hẽẽn cĩg Mamre, manaa ĩbaa Evoronĩ ngeertĩ ꞌThõharĩ baa ĩĩn eet cĩ Hiiti. 10Mana baa ũũta Abũrahamĩ hĩ eet cĩg Hiiti niccia. Baa ada nẽẽg Abũrahaamõ nga baa adaiini ngaa cĩnnĩ Thaara. 11Ma baa adaak Abũrahamĩ, ikia aggatan Nyekuci Iꞌthaako, nĩngĩtĩ aku aarĩkĩ Iꞌthaako õlõ cĩnnĩ ngaatĩ õbõhõõ hĩ wĩĩtaneec cĩ Beer Lahai Roi.
Hattũũg cĩ Ĩthĩmaĩlĩ
12Baa ĩĩn Ithimaĩlĩ ngeertĩ Abũrahamĩ ꞌcĩ baa arritaak Hagaarĩ, ngaa baa ĩĩn appahaca cĩ Thaara. Baa aꞌnyaha Thaara Hagaar Ijjiba.
13Ĩĩn lohollia cĩg Ithimaĩlĩ õmmõtõ hĩ ꞌramma. Haĩ ꞌcĩ oou Nebaioth nẽ hĩĩtõ ꞌcĩg anũẽẽkĩ Kẽdaar hĩ Adbeel hĩ Mibtham, 14Mithma hĩ Duma hĩ Maaꞌtha 15hĩ Hadad hĩ Tẽẽma hĩ ꞌJetur hĩ Navith hĩ Kedema. 16ꞌThaarriok cĩg lõhõlĩ cĩg Ithimaĩlĩ ho cieegi. Baa au aggam nẽẽg habuccieeꞌnya ꞌcĩg ĩĩn õmmõtõ hĩ ꞌramma. Nẽ baa akannoothĩk ꞌthaarrioha cĩggĩĩng ko olooyyiok cĩggĩĩng. 17Baa adaahĩ Ithimaĩlĩ baa ũũppanit irkiꞌnyia cĩgĩnnĩg ĩĩtõ ꞌmiia hõdẽĩ hĩ hẽẽn iyyio hĩ tũrkĩramma (137). Nĩngĩtĩ õõ adaĩ eeta ĩnõõnnõ hĩ eet cĩgĩnnĩg. 18Baa õlõman lohollia cĩg Ĩthĩmaĩlĩ hõrggẽẽnaa cĩ looc cĩ Havvila hĩ ꞌThur, ngaatĩ õbõhõõ hĩ Ijjib ĩĩcĩ uruto, ꞌgõõlaa ꞌcĩ õkõ Athuuria. Baa õlõman nẽẽg ẽmmẽn hĩ lõhõlĩ cĩg Abũrahamĩ ũgĩ vẽlẽk.
Yakobo hĩ Eꞌthaau
19Hattũũg cĩ Iꞌthaako ngeertĩ Abũrahamĩ cieeni.
20Ma baa ĩĩtõ irkiꞌnyia cĩg Iꞌthaako hẽẽn ꞌwec, ikia ũꞌthũwan nẽẽ Rẽbẽka tĩnaatĩ Bethuele, ꞌcĩ baa aku Paddan Arama looccaa cĩ Aramĩ. Baa ĩĩn Rẽbẽka ngõõnĩ Labanĩ.
21Baa alaiini Iꞌthaako Rẽbẽka hĩ Makayyioohit, hĩnĩngĩtĩ baa aitiõõ nẽẽ hõllõngaa aꞌnyaki. Baa nẽ ĩthĩk Makayyioohiti laiinit cĩ Iꞌthaako, nĩngĩtĩ aku aꞌnyahiini Rẽbẽka. 22Ma baa nga hutuhuyyiaa Rẽbẽka, baa aga nẽẽ ngaatĩ aꞌnyahĩ hũũhũꞌnya, hĩnĩngĩtĩ baa athĩknoothi nẽẽ ngaatĩ ĩddaaõnĩ hũũhũꞌnya niccieeg hẽẽngatõõ. Nĩngĩtĩ ammuhi Rẽbẽka aĩnnĩ, “Inni occa gõõng hikiaaha thõõth ꞌcĩ aaĩ hoti ho?” Ma nĩngaata, ũũk ala nẽẽ Makayyioohit, hĩnĩngĩtĩ thõõth icci.
23Nĩngĩtĩ ẽdẽcĩ Makayyioohiti ĩnõõnnõ annẽẽkĩ,
“Au hatĩ eꞌngerri lohollia cugunnig ko
hĩĩtõ eet cĩg loonyin ꞌramma.
Attiran hatĩ ꞌcĩ hidici hĩllõõan cobbi,
nẽ hatĩ idticanoothĩk cobbi ꞌcĩ hidici.”
24Ma baa õdõlan kõrra ꞌcĩ ũũkcanĩ Rẽbẽka lõhõlĩ niccig ko, ikia ũtũhũa nẽẽ lõhõlĩ ꞌcĩg maacĩg ꞌcĩg ĩĩn heengti. 25Baa marik ĩdõlĩ ꞌcĩ oou nẽ õlõõ ẽlẽ haau hĩ aꞌthẽẽtĩ. Nĩngĩtĩ akannẽẽkĩ eeta ꞌthaar ꞌcĩg haĩ Eꞌthaau.#25:25 Eꞌthaau: Aĩ ꞌthaara ꞌcĩg haĩ Eꞌthaau ho Ebereeiyyi, eet ꞌcĩ õlõõ ẽlẽ. 26Ma baa ũũkcaa ĩdõlĩ ꞌcĩ uruto ho, aggam hinnia ꞌgõtõnĩ ꞌcĩ oou ho tiitinyooc, nĩngĩtĩ akannõõthĩkĩ ꞌthaara ꞌcĩg haĩ Yakobo.#25:26 Yakobo: Aĩ ꞌthaara ꞌcĩg haĩ Yakobo ho Ebereeiyyi, eet ꞌcĩ ĩggõõl eet. Baa ĩĩn Iꞌthaako irkiꞌnyia hẽẽn tõrkõnõn, baa arrittiaa lohollia cĩgĩnnĩg ko.
Ataala Eꞌthaau ꞌgẽẽn
27Ma baa iita itiliꞌthia lohollia niccieegi, ikia Eꞌthaau ĩĩ nyahaappan ꞌcĩ aga lĩhõ hĩ ngaatĩ õvvõõĩ mõrõtõõ gẽrrẽẽt. Nẽ baa ĩĩn Yakobo eet ꞌcĩ tarbalĩ ꞌcĩ aalla õlõ haaga. 28Baa ammĩnan Iꞌthaako Eꞌthaau, hĩnĩngĩtĩ baa gõõng ammĩnan Iꞌthaako ngaatĩ adahĩ iding cĩ moru ꞌcĩg aruk Eꞌthaau. Baa ammĩnan Rẽbẽka ꞌcĩ ĩĩn Yakobo.
29Ma kõr umwa, baa aku Eꞌthaau lĩka appĩĩrna nẽ adak magĩthĩ buúk gẽrrẽẽt, ammũdeek hinnia Yakobo aak mõrdõ, 30nĩngĩtĩ annẽẽkĩ nẽẽ Yakobo, “Õhõdaawa magĩthĩ ẽlẽ, ꞌbaanaa baaĩ mõrdõ ũgĩ huduho.” Ĩnõõ ꞌcĩ akannõõthĩkĩ ĩnõõnnõ ꞌthaara ꞌcĩg haĩ Edom ko.#25:30 Edom: Aĩ ꞌthaara ꞌcĩg haĩ Edom ko Ebereeiyyi, marik.
31Ẽdẽcĩ hinnia Yakobo ꞌgõtõnĩ anneek, “ꞌBaanaa thĩ nõõ makaaꞌthĩt cunni ꞌcĩ ĩĩnĩ loholeec ꞌcĩ oou ho, nẽẽthĩ, haaꞌnyii mõrdõ.”
32Ẽdẽcĩ Eꞌthaau anneek, “Abũnnaa! Hõbõhĩ naa hadaaha nẽ nga hatĩ hadahĩ makaaꞌthĩt caannĩ ho ne?”
33Ẽdẽcĩ Yakobo Eꞌthaau anneek, “Bũtan thĩ nõõ ĩĩ, aaꞌnyaa hatĩ nii nganĩĩt makaaꞌthĩt cunni ho.” Nĩngĩtĩ abũtanĩ Eꞌthaau nẽ aaꞌnyĩk makaaꞌthĩt cĩnnĩ Yakobo.
34Ma ho, aaꞌnyĩk Yakobo Eꞌthaau ũbũnẽẽt ũgĩ hĩ mõrdõ ꞌcĩg hatĩ aak nẽẽ ho. Ma nĩngaata, uduho Eꞌthaau nẽ ũhũd maam nĩngĩtĩ ĩꞌngaannĩ õkõõĩ.
Baa hõllõngaa aallak Eꞌthaau makaaꞌthĩt cĩnnĩ ꞌcĩ ĩĩnĩ loholeec ꞌcĩ oou ho gẽrrẽẽt.
Currently Selected:
ꞌThianaattõ 25: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
