ꞌThianaattõ 23
23
Daahĩth cĩ Thaara
1Baa arũgĩ Thaara ĩꞌthõng hõdõlanit irkiꞌnyia cĩgĩnnĩg hĩĩtõ ꞌmiia hõdẽĩ hĩ hẽẽn ꞌramma hĩ tũrkĩramma (127), 2nẽ ikia adaak looccaa cĩ Kanaanĩ ꞌtaaũnaa ꞌcĩ haĩ Kiriath Arba ꞌcĩ ꞌyioko haĩ Heboron ko. Nĩngĩtĩ aluyyi Abũrahamĩ ngaa cĩnnĩ Thaara gẽrrẽẽt.
3Ma ho, ĩtĩnga Abũrahamĩ baa nga hadaĩ ngaa cĩnnĩ nẽ ala maajihi lootu ꞌcĩg haĩ Hiiti ĩĩnnĩk, 4“Hõlõ, hĩĩnĩ naa eet cĩ looc ꞌcĩ ꞌrĩĩng ngaati haaga, aanytaangu looc umwa hũtũ, hátĩ hadaĩ ngaa caannĩ.”
5Ẽdẽcĩ eeta cĩg Hiiti ho Abũrahaamõ anneek, 6“Makayyioohit, thĩheet da nõõ ngagĩĩta, ĩĩnĩ nii habu cobbi hõrggẽẽnaa cĩnaang. Daa nẽẽ nii ngaa cunni ngaatĩ adiimi niina. Aitiõõ ẽẽtĩ ꞌcĩ occa edeneeki nganiit nĩngĩtĩ ammũtĩ ngaa cunni tõõ.”
7Nĩngĩtĩ atallĩ Abũrahamĩ eet cĩg Hiiti ho. 8Ma ho, ĩĩnnĩk ĩhõõggõ, “Má elemtu ngaatĩ hadaĩ naa ngaa caannĩ ngaati, alayyieehaangu baaĩ nuun Evoron ngeertĩ ꞌThõharĩ, 9haaꞌnya hũtũ ilom cĩ Makpẽẽla, ꞌcĩ aaĩ tẽrẽtẽraa cĩ mana cĩnnĩ hata. Uduktaak haaꞌnya hũtũ mana hũtũrũũr hẽbẽrẽẽnnĩĩ cugguung ngaati, hátĩ hĩĩ caannĩ ũdũt, hadaĩ hatĩ gõõng eet cĩgannĩg.”
10Baa aaĩ Evoronĩ loota hõrggẽẽnaa cĩ eet cĩg Hiiti ho, hattũũgaa cobbi cĩ ꞌtaaũnõõ nẽ ẽdẽc nẽẽ Abũrahaamõ hẽbẽrẽẽnnĩĩ cĩg eetuk vẽlẽk ĩĩnnĩk, 11“Aitiõõ hõllõngaa aaĩ nohotaa makayyioohit caannĩ, hippotaneekii hatĩ naa nĩngĩtĩho vẽlẽk hĩ ilom buúk haaga, hẽbẽrẽẽnnĩĩ cĩg eet cĩgannĩg ko vẽlẽk, hátĩ mũtĩ ngaa cunni.”
12Ma ho, atal Abũrahamĩ maajihi lootu ho tarĩ 13nẽ uduhaak Evoron hõrggẽẽnaa cĩ eet niccig vẽlẽk ĩĩnnĩk, “Thĩhaa dako nõõ, má ẽlẽmaaka nĩngĩtĩho dĩdĩ, aꞌnyaa hũtũ thõng, hõllõngaa occa hõkõõĩ haaga. Lẽẽm nuun noho, hátĩ hadaĩ ngaa caannĩ.”
14Ẽdẽcĩ Evoronĩ Abũrahaamõ anneek, 15“Makayyioohit caannĩ, ne ꞌcĩ hõthõõthõnĩ gẽrrẽẽt ko? Adahĩ nĩngĩtĩ nicciee maccĩrẽẽn ꞌmiiaꞌnya ꞌwec, occa ꞌyioko ꞌthẽk haaĩ naa nẽ hiinnihi dũman nĩngĩtĩ icci maccĩrẽẽnĩ? Ma haallahi thõõth cĩ dũmaanõ, bĩĩt daa nẽẽ nii ngaa cunni.”
16Nĩngĩtĩ ẽlẽmmĩ Abũrahamĩ thõõth cĩ Evoronĩ ho hẽbẽrẽẽnnĩĩ cĩg eet cĩg Hiiti nẽ itigiilak ĩnõõnnõ maccĩrẽẽn ꞌmiiaꞌnya ꞌwec ꞌgõõlaa ꞌcĩ gõõng appiimanĩ tuuyyioha hĩ aa aduha Evoronĩ hõrggẽẽnaa cĩ lothippito.
17ꞌGõõl ꞌcĩ baa aku õkõõĩ Abũrahamĩ mana cĩ Evoronĩ hĩ ilom hĩ hẽẽn buúk ko Makpẽẽlattĩ, ngaatĩ õbõhõõ hĩ hẽẽn cĩg Mamre ho cieeni. 18Baa nẽ iita agaacõ eeta cĩg Hiiti vẽlẽk, ꞌcĩg baag aattĩg ngaatĩ õbõhõõ hĩ hattũũg cobbi cĩ ꞌtaaũnõõ, aĩ ĩĩ mana tĩho cĩ Abũrahamĩ.
19Ma nĩngaata, ũũk ada Abũrahamĩ ngaa cĩnnĩ Thaara iloomaa cĩ Makpẽẽla, ngaatĩ õbõhõõ hĩ hẽẽn cĩg Mamre ꞌcĩ haĩ ꞌthaar ũgĩ Heboron looccaa cĩ Kanaanĩ. 20Nĩngĩtĩ aaꞌnyĩkĩ eeta cĩg Hiiti Abũrahaamõ mana tĩho hĩ ilom vẽlẽk, hĩĩ nĩngĩtĩ adaĩ nẽẽ eet cĩgĩnnĩg.
Currently Selected:
ꞌThianaattõ 23: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
