ꞌThianaattõ 15

Lõhõt cĩ Nyekuci hĩ Abũraamõ

1Ma baa urutaa cĩ thooꞌthiok iccig vẽlẽk, ikia aaꞌnyĩk Makayyioohiti Abũraamõ hõhõnõõthĩ nẽ ĩĩnnĩk,

“Abũraamõ, ma hiteelli,

hĩĩnĩ hatĩ naa hilib ꞌcĩ heteiinni nganiit thooꞌthiohĩĩ ꞌcĩg abathĩ.

Haggatannii hatĩ naa nganiit gẽrrẽẽt.”

2Ẽdẽcĩ hinnia Abũraamõ Makayyioohit anneek, “Makayyioohit ꞌcĩ iini ꞌTirriannioohit, hĩĩnĩ naa eet ꞌcĩ aitioonna loholeec tõõ. Ma hadaaha, arigith hatĩ appahaca caannĩ Elietherĩ cĩ Damaathĩko baliinit caannĩ. Aaꞌnyaa occa hatĩ nii nganĩĩt neegi? 3Nẽẽthĩ, hĩcĩ hõllõngaa aaꞌnyaa nii nganĩĩt lõhõlĩ ho, arigith hatĩ appahaca haaga baliinit cĩ õlõ caannĩ ho.”

4Ma ho, ĩĩnnĩk Makayyioohiti Abũraamõ, “Aitiõõ hatĩ hõllõngaa arigith Elietherĩ baliinit cunni. Ngeeruni dẽẽdẽ ꞌcĩ hatĩ arigithi.” 5Ma nĩngaata, ũũhĩ Nyekuci Abũraamõ battaala nẽ ĩĩnnĩk, “Deenyoth da nõõ hẽẽtkujjieen nẽ má ũũlũ ngaatĩ occa agiili mũnyũny, occa thĩ hatĩ agiili lõhõlĩ ꞌcĩg hõkõ haaꞌnyii naa nganiit ko buúk.”

6Nĩngĩtĩ ẽlẽmmĩ Abũraamõ thõõth cĩ Makayyiookto nẽ hĩnĩngĩtĩ thõõth icci, ikia accamana Makayyioohiti ĩnõõnnõ ngaatĩ iini eet ꞌcĩ abũnnaa.

7Ma nĩngaata, uduhaak Makayyioohiti Abũraamõ ĩĩnnĩk, “Hĩĩnĩ naa Makayyioohit baa haꞌnyahaannii nganiit ꞌtaaũnaa cĩ Uri looccaa cĩ Kaldea hikia haaꞌnyii looc icci ho.”

8Ma tarĩ ho, ijin Abũraamõ Makayyioohit ĩĩnnĩk, “Makayyioohit, haga hatĩ naa ngaatĩ ĩĩnnĩ lõõcĩ ciee caannĩ hutuno?”

9Ẽdẽcĩ Makayyioohiti ĩnõõnnõ anneek, “ꞌNyahaahaa da moolĩt ꞌcĩ ĩĩn ꞌthorohit hĩ ẽẽth hĩ merkec, ꞌcĩg aꞌnyak nẽẽg vẽlẽk irkiꞌnyia iyyio, nẽ aꞌnyaha bollo hĩ ngabuuthi buúk.” 10Nĩngĩtĩ aꞌnyahõõthĩkĩ Abũraamõ Nyekuc hẽlẽggĩ iccig vẽlẽk nẽ appak hõrggẽẽna hĩĩtõ hĩ ꞌramma hĩ ꞌramma nẽ ẽꞌthẽdaneek halaaccio ꞌtheeriꞌnyaannĩĩ ꞌcĩg ĩĩn ꞌramma. Baa ẽꞌthẽdaneek nẽẽ bollo hĩ ngabuuthi hũtũrũũr. 11Ma ho, ililliaatta hodobwaana aĩ hiita hadakta idiꞌngwa niccig, iiggiaĩ hinnia Abũraamõ ĩhõõggõ thõng.

12Ma baa õbõhĩ okoloothĩk kõrra, iita ohoddia Abũraamõ ũꞌnyaaha nẽ ikiaak ĩnõõnnõ tẽẽlꞌthĩtĩ hĩ barriti cobbi gẽrrẽẽt. 13Nĩngĩtĩ annẽẽkĩ Makayyioohiti ĩnõõnnõ, “Gaooth thĩ ngaatĩ au hatĩ õlõmanĩ lohollia cugunnig looccaa ꞌcĩ ꞌrĩĩng pir. Adĩman hatĩ eeta cĩg looc tĩho ĩhõõggõ ꞌbuth nẽ aarito hĩĩtõ appahacaaꞌnya irkiꞌnyia ꞌmiiaꞌnya ꞌwec (400). 14Nẽẽthĩ, hõkõ hatĩ huuki naa eet cĩg looc ꞌcĩ aaꞌnyĩk ĩhõõggõ hĩĩtõ appahacaaꞌnya ho. Nẽ urutaa cĩnnĩ, aluuga hatĩ nẽẽg looccaa ꞌcĩ ꞌrĩĩng hata. Õthõkta hatĩ nẽẽg baliinit cobbi gẽrrẽẽt. 15Nẽ niina Abũraamõ, arugi hatĩ nii irkiꞌnyia ꞌcĩg mẽẽlĩg gẽrrẽẽt. Nẽ kõr ꞌcĩ adaaknĩ, adayyi hatĩ nii taliitta nẽ õõt ũrũmteeu hĩ maajihu cugunnig. 16Aꞌnyak hatĩ lohollia cugunnig irkiꞌnyia ꞌmiiaꞌnya ꞌwec (400) nga hoboddia hiita ngaati, hĩnĩngĩtĩ hõllõngaa hatĩ hiiggia naa eet cĩg Amoorĩ hĩdĩĩkoothong. Aattĩg hatĩ nẽẽg ngaati ĩꞌthõng hẽꞌthẽcattõõ gẽrrẽẽt, nẽẽthĩ hatĩ huuka naa ĩhõõggõ.”

17Ma baa ĩĩ baalin lõõcĩ, adtuuha hinnia Abũraamõ ijjio ꞌcĩ aꞌnyak ꞌgwoo ꞌcĩ aburrut nẽ tarĩ udtuuha lanyit ꞌcĩ aaĩ hĩ ꞌcĩ attũllĩ ẽẽtĩ looc arteetta, ngaatĩ ẽttẽẽdĩ hõrggẽẽnaa cĩ idiꞌngwa baag appak nẽẽ ho. 18Nẽ ꞌgõõlẽẽ cĩ, iita adahit Makayyioohiti hĩ Abũraamõ lõhõt. Nĩngĩtĩ annẽẽkĩ Makayyioohiti Abũraamõ “Hẽlẽma naa ngaatĩ haaꞌnyĩkĩĩ lõhõlĩ cugunnig looc nicci vẽlẽk. Iꞌthianaanĩ hatĩ lokoorriaa cĩ Ijjibi ĩꞌthõng hõdõlan hidioo cobbi cĩ Euvaratẽthĩ, 19loonyin cĩg eet cĩg Kẽẽnĩ, hĩ cĩg Keniithi hĩ eet cĩg Kadmonĩ, 20hĩ looc cĩ eet cĩg Hiiti, hĩ cĩg Peri, hĩ cĩg ꞌRẽẽva, 21ĩꞌthõng looc cĩ eet cĩg Amoorĩ, hĩ cĩg Kanaanĩ, hĩ cĩg ꞌGirgathĩ, hĩ cĩg ꞌJeebu buúk.”

Currently Selected:

ꞌThianaattõ 15: did

Highlight

Copy

Compare