ꞌThianaattõ 14

Ẽẽla Abũraamõ Loot

1Waathinnioohĩĩ ĩĩcĩg, baa ĩĩn Amravele habu cĩ ꞌThĩnaarĩ nẽ ĩĩ Ariocĩ habu cĩ Ẽllatharĩ nẽ ĩĩ Kedorlaomerĩ habu cĩ Ẽlamĩ nẽ ĩĩ Tidalĩ habu cĩ ꞌGoiimi, 2baa au habuẽẽta cieeg ĩĩn ꞌwec ko, alũtĩ hõdẽĩ nẽ aahito jore ꞌcĩ õõ aruhõõnĩ hĩ habuẽẽt ꞌcĩg ĩĩn ꞌtur ꞌcĩg haĩ Bẽra cĩ ꞌtaaũn cĩ ꞌThõõdõmĩ, hĩ Biritha cĩ ꞌtaaũn cĩ ꞌGõmõõra, hĩ ꞌThĩĩnab cĩ ꞌtaaũn cĩ Adma, hĩ Thẽmẽbẽr cĩ ꞌtaaũn cĩ ꞌTheboiimi, hĩ habu cĩ ꞌtaaũn cĩ ꞌBẽẽla. Haĩ ꞌThõõar ꞌthaar ũgĩ ꞌBẽẽla.

3Baa au arũm habuẽẽta cieeg vẽlẽk athegereeꞌnya cĩggĩĩng unaahatõõ cĩ ꞌThidimi, Bũlũc ꞌcĩ Adaahĩ.#14:3 Bũlũc ꞌcĩ Adaahĩ: Haĩ ꞌthaar ꞌcĩg bũlũc icci ũgĩ, Bũlũc ꞌcĩ Ammũccarĩĩ, hĩnĩngĩtĩ ammũccarĩĩ maama cĩgĩnnĩg gẽrrẽẽt, hiittiõõ hẽlẽggĩ ꞌcĩg arũgĩ hõllõngaa occa aattĩg bũlũcatõõ. 4Baa aggam habuui Kedorlaomerĩ ĩhõõggõ irkiꞌnyia õmmõtõ hĩ ꞌramma nẽ iita ũtũbũrĩt nẽẽg ĩnõõnnõ baa ĩĩtõ irkiꞌnyia õmmõtõ hĩ iyyio.

5Ma tarĩ irkitaa ꞌcĩ ĩĩn õmmõtõ hĩ ꞌwec, iita Kedorlaomerĩ hĩ habuẽẽt ꞌcĩg arũm ũũrũta hĩ ĩnõõnnõ ho, urukto nẽ ĩllõõanit eet ꞌcĩg ꞌRẽẽva, ngaatĩ haĩ Atheroth Karanaim nẽ tarĩ ĩllõõanit eet ꞌcĩg haĩ Thuth ngaatĩ haĩ Haam, hĩ eet ꞌcĩg haĩ Eem ngaatĩ haĩ Thaavve Kiriathaim. 6Baa nẽ ĩllõõanit eet ꞌcĩg haĩ Hõõr muurriõhĩĩ cĩg Theiri ĩꞌthõng Eliparan, nĩngĩtĩ õbõhõõ hĩ horu ꞌcĩ õdõhõhĩĩ kak. 7Ma baa õbõda horrwaa tĩho ho, iita õõt ĩꞌthõng ꞌtaaũn ꞌcĩ haĩ Enmithivat, looc ꞌcĩ haĩ ꞌthaar ũgĩ Kadeeth nẽ aggamit looc cĩ eet cĩg Amalẽhĩ nẽ ĩllõõanit eet cĩg Amoorĩ baag õlõman ngaatĩ haĩ Hathathon Tamar.

8Nĩngĩtĩ õõĩ habuui cĩ ꞌThõõdõmĩ hĩ cĩ ꞌGõmõõra hĩ cĩ Adma hĩ cĩ ꞌTheboiimi hĩ cĩ ꞌBẽẽla ꞌcĩ haĩ ꞌthaar ũgĩ ꞌThõõar jora nẽ õõt aarrik athegereeꞌnya cĩggĩĩng unaahatõõ cĩ ꞌThidimi, 9nĩngĩtĩ aruhõõnĩ habuẽẽta ꞌcĩg ĩĩn ꞌtur ko hĩ habuẽẽt ꞌcĩg ĩĩn ꞌwec: Kedorlaomer habu cĩ Ẽlamĩ hĩ Tidal habu cĩ ꞌGoiimi hĩ Amravele habu cĩ Babiloonnia hĩ Arioc habu cĩ Ẽllatharĩ. Baa ĩĩn jõrẽẽĩ nicciee jore ꞌcĩ aruhõõnĩ habuẽẽta ꞌtur hĩ habuẽẽt ꞌwec. 10Baa aruhõõ habuẽẽta cieegi, baa aꞌnyak unahĩ cĩ ꞌThidimi ho vohorriook ꞌcĩg aꞌnyak ꞌgiimwa ꞌcĩ aĩ maccahadak ꞌcĩ aaĩ hĩ mudhullõõcĩ. Ma baa aĩ habuui cĩ ꞌThõõdõmĩ hĩ cĩ ꞌGõmõõra hĩlĩĩttiawa jore ho, adhuhoothĩk hinnia athegereeꞌnya cĩggĩĩng ũgẽẽgĩ vohorriook ꞌcĩg ꞌgii ꞌcĩ aĩ maccahadak ko nẽ aggam ꞌgii nicciee ĩhõõggõ, nĩngĩtĩ õõ aguꞌthẽẽnĩ ũgẽẽgĩ hõrõmẽẽtĩ tõõ. 11Ma nĩngaata, iita ũllũnganit habuẽẽta ꞌcĩg ĩĩn ꞌwec ko hẽlẽggĩ vẽlẽk ꞌtaaũnnioohĩĩ cĩg ꞌThõõdõmĩ hĩ cĩ ꞌGõmõõra hĩĩ lõõcĩ ꞌthĩĩ, nĩngĩtĩ õõĩ ꞌgõõlaa cĩnĩĩng. 12Ma baa nohota, iita aggamit mĩrõha cieeg Loot ngeertĩ ꞌgõtõnĩ Abũraamõ buúk, hĩnĩngĩtĩ baa aaĩ nẽẽ ꞌThõõdõma, nĩngĩtĩ aꞌngĩdĩ ĩnõõnnõ hẽlẽggẽẽnnĩĩ cĩgĩnnĩg noho.

13Ma ho, ikia uduhaak eet umwaa ꞌcĩ avvira joratõõ Abũraamõ eet ꞌcĩ ĩĩn Ebereeinit, thõõth ꞌcĩ aggamiini Lõõtĩ ho. Baa aꞌnyak Abũraamõ õlõ cĩnnĩ nohota ngaatĩ õbõhõõ hĩ hẽẽn cĩg Mamre eet cĩ Amoorĩ. Baa ĩĩn Mamre hĩ ꞌgõtõõnõgĩ ꞌcĩg haĩ Ethokol hĩ Aner, eet ꞌcĩg õõkõrõõ hĩ Abũraamõ gẽrrẽẽt.

14Ma baa athĩhĩ Abũraamõ aĩ aggamĩ Lõõtĩ ittioonniohiti cĩnnĩ ho, ikia ũtũvva eet cĩgĩnnĩg cĩg joraak ꞌcĩg baag arrittiaa nẽ illimattĩ õlõõ cĩnnĩ. Baa ĩĩn eeta tĩko ꞌmiiaꞌnya iyyio hĩ õmmõtõ hĩ turkiyyio (318). Nĩngĩtĩ anũõõꞌthĩ mĩrõk ĩꞌthõng ꞌtaaũn ꞌcĩ haĩ ꞌDaan. 15Ma baa baal, ikia ẽꞌngẽr Abũraamõ ũũrũta cĩgĩnnĩg, nẽ irriamatteek mĩrõk ꞌgoolliohĩ vẽlẽk, nĩngĩtĩ aruhõõnĩ nẽ ĩllõõanit ĩhõõggõ gẽrrẽẽt ũdũt. Nẽẽthĩ, baa ivvirit mĩrõha ũgẽẽgĩ õõt ĩĩcĩ ꞌtaaũn ꞌcĩ haĩ Hõba ꞌcĩ aaĩ Damaathĩko ĩĩcĩ holooc. 16Nĩngĩtĩ ẽẽlanĩ Abũraamõ Loot hĩ ngaaĩ hĩ eet ũgĩ buúk ꞌcĩg baag aggam mĩrõha nẽ õbõdaaĩ hẽlẽggĩ cĩg Lõõtĩ vẽlẽk buúk, hĩ ijjio hĩ hẽlẽggĩ cĩg eet baag aggam mĩrõha vẽlẽk.

Aggatan Melkithẽdẽhĩ Abũraamõ

17Ma baa õbõda Abũraamõ ĩbaa õkõ ĩllõõanĩ Kedorlaomer hĩ habuẽẽt baag arũm hĩ ĩnõõnnõ athegereeꞌnya ho, ĩtĩnga habuui cĩ ꞌThõõdõmĩ ũũk ithirriaamanõõthĩ Abũraamõ unaahatõõ ꞌcĩ haĩ Thaavve. Haĩ unak icci ꞌthaar ũgĩ unak cĩ habueetu.

18Nẽ baa aꞌnyahaak ẽẽtĩ ꞌcĩ haĩ Melkithẽdẽk#14:18 Melkithẽdẽk: Aĩ ꞌthaara ꞌcĩg haĩ Melkithẽdẽk ko Ebereeiyyi, abũnnaa habuui caannẽẽnĩ. Abũraamõ ũbũnẽẽt hĩ mẽrtĩ cĩ viinoo. Baa ĩĩn Melkithẽdẽhĩ habu cĩ ꞌtaaũn ꞌcĩ haĩ Thaalem nẽ tarĩ ĩĩn paadĩr#14:18 Paadĩr: Ĩĩn paadĩrĩ eet ꞌcĩ ĩbboorĩk Nyekuc ꞌgaarriẽẽn. cĩ Nyekuc ꞌcĩ ĩllõõan vẽlẽk buúk. 19Nĩngĩtĩ aggatanĩ Melkithẽdẽhĩ Abũraamõ annẽẽkĩ,

“Aꞌnyĩĩk Nyekuc ꞌcĩ ĩllõõan vẽlẽk,

Teheꞌnyioohit cĩ hẽẽtkujjieen hĩ cĩ lootu, haggataniina.

20Aꞌnyĩĩk Nyekuc ꞌcĩ ĩllõõan vẽlẽk

baa aaꞌnyi ꞌtirriani ꞌcĩ ĩllõõanĩĩ mĩrõk hubuluthi.”

Ma nĩngaata, ẽꞌngẽraak Abũraamõ Melkithẽdẽk hẽlẽggĩ ũgĩ ꞌcĩg abadtẽc#14:20 Hẽlẽggĩ ũgĩ ꞌcĩg abadtẽc: Má õbõdaanĩ Abũrahamĩ hẽlẽggĩ õmmõtõ joraa baa ĩllõõanĩ nẽẽ habuẽẽt baag aruhõõ hĩ ĩnõõnnõ, aku ẽꞌngẽraak nẽẽ Melkithẽdẽk hõdẽĩ. Tigiil Ebereei 7:2. baag ammiira nẽẽ jora.

21Ma ho, ala habuui cĩ ꞌThõõdõmĩ Abũraamõ ĩĩnnĩk, “Bĩtĩ baaĩ nuun ijjio nẽ õbõdaaka eet cĩgannĩg diooni.”

22Ẽdẽcĩ hinnia Abũraamõ habu cĩ ꞌThõõdõmĩ ho anneek, “Hõllõngaa occa hahumeehi naa hẽlẽggĩ cugunnig ko aꞌthiit caannĩ ũdũt. Habũtani muumaa cĩ Makayyioohit Nyekuc ꞌcĩ ĩllõõan vẽlẽk, Teheꞌnyioohit cĩ hẽẽtkujjieen hĩ cĩ lootu, 23hõllõngaa occa helemi ngaatĩ hõkõõĩ ꞌgiimwa cunni ũdũt, tananga ꞌloorong hode lõhamũceec cĩ caawacõ haaga, hátĩ hiittiõõ hõllõngaa aini, ‘Nganĩĩt ꞌcĩ haaꞌnyihi Abũraamõ habalõ ho.’ 24Aꞌnyĩĩk ꞌgẽẽn baa adak eeta cĩgannĩg cĩg joraak diooni, hĩĩ ꞌgii ꞌcĩ occa hõkõõĩ naana. Nẽẽthĩ, baa hõõkõrra naag hĩ Mamre hĩ Aner hĩ Ethokol, eꞌngerriaak ĩhõõggõ hẽlẽggĩ ũgĩ hẽlẽggẽẽnnĩĩ baag hõbõdaanna mĩrõhĩ hootti nẽẽgĩ.”

Currently Selected:

ꞌThianaattõ 14: did

Highlight

Copy

Compare