ꞌThianaattõ 16

Ittirria Ĩthĩmaĩlĩ

1Baa aitiõõ Tharaĩ ngaa cĩ Abũraamõ lohollia tõõ. Nẽẽthĩ nẽẽꞌthẽk, baa aꞌnyak nẽẽ appahaca ꞌcĩ ngayyi ꞌcĩ haĩ Hagaar ꞌcĩ baa aꞌnyaha nẽẽ Ijjiba. 2Ma baa kõr umwa, ũtũvva Tharaĩ maac cĩnnĩ nẽ ĩĩnnĩk, “Hĩ ꞌyioko ĩcaaca nganĩĩt Makayyioohiti Nyekuci lõhõlĩ ho, õõt mĩĩ nuun atagguuth hĩ appahaca caannĩ ho, hátĩ hittiraheet lõhõlĩ.”

Nĩngĩtĩ ẽlẽmmĩ Abũraamõ thõõth cĩ Tharaĩ ho. 3Baa aku edeeꞌnyia thõõth ciee urutaa cĩ irkiꞌnyia õmmõtõ baag aayyi Abũraamõ looccaa cĩ Kanaanĩ, nĩngĩtĩ aaꞌnyĩkĩ Tharaĩ ĩnõõnnõ Hagaar dticciannioohit cĩ Ijjibi hĩĩ ngaa cĩnnĩ. 4Nĩngĩtĩ arũmẽẽnĩ Abũraamõ hĩ Hagaar ĩꞌthõng hikia haꞌnyahõ.

Ma baa ma acĩn Hagaarĩ ngaatĩ aꞌnyahiini ho, ikia accamanoothĩk gẽrrẽẽt nẽ atararĩ ꞌcĩ ĩĩn Tharaĩ. 5Ma nĩngaata, ĩĩnnĩk Tharaĩ Abũraamõ, “Baa haaꞌnyii naa nganiit ũrũmtĩ hĩ Hagaar, ma ꞌyioko ma aꞌnyaki ho, ikia ĩthĩngõõnyan gẽrrẽẽt nẽ atararra nganĩĩta. Nganiit ꞌthẽk ꞌcĩ ahĩĩnakaa nganĩĩt thõõth icci vẽlẽk ko. Aꞌnyĩĩk Makayyioohit hũmmũda nganĩ ꞌcĩ ĩĩn nyeꞌtheccioohit hõrggẽẽnaa cĩnaac.”

6Ẽdẽcĩ hinnia Abũraamõ aĩ, “Ĩĩn nõõ ngaa ciee appahaca cunni, dahĩ mĩĩ ꞌgii ꞌcĩ aga niina.” Nĩngĩtĩ õhõggõõranĩ Tharaĩ appahaca cĩnnĩ ho ĩꞌthõng hitiggiaeek mõrõ.

7Ma ho, ikia ũmmũda aajĩlõ cĩ Makayyiookto#16:7 Aajĩlõ cĩ Makayyiookto: Thõõth ꞌcĩ aĩ Aajĩlõ cĩ Makayyiookto ho, nĩngĩtĩ aĩ, ĩnõõnnõ Makayyioohiti Nyekuci. Tigiil ꞌBuuk cĩ ꞌThianaattõ 16:13. Hagaar mõrõtõõ ngaatĩ õbõhõõ hĩ wĩĩtaneec umwa, ꞌgõõlaa ĩĩcĩ õkõ ngaatĩ haĩ ꞌThur. 8Nẽ ijin aajĩlõ ĩnõõnnõ ĩĩnnĩk, “Hagaar, dticciannioohit cĩ Tharaĩ, akuu hatĩ nii ngaati hutuno?”

Ẽdẽcĩ Hagaarĩ anneek, “Ĩtĩkĩĩanaa thõõth cĩ õlõ cĩ Tharaĩ.” Nĩngĩtĩ ajini aajĩlõ nicciee ĩnõõnnõ tarĩ annẽẽkĩ, “Õkõ ꞌyioko nii ĩĩna?”

9Ma ho, ĩĩnnĩk aajĩlõ cĩ Makayyiookto ĩnõõnnõ, “Bodooth õlõõ cĩ Tharaĩ, bĩĩt dticcianoothĩk ĩnõõnnõ. 10Haaꞌnyii hatĩ naa nganiit lõhõlĩ ꞌcĩg mẽẽlĩg ꞌrĩng ꞌcĩg ĩĩkĩ ꞌthẽẽm ꞌcĩg occa hõllõngaa agiili.”

11Ma ho, uduhaak aajĩlõ cĩ Makayyiookto ĩnõõnnõ tarĩ ĩĩnnĩk,

“Adiddingi ꞌyioko niina,

ũũkca hatĩ loholeec ꞌcĩ maacĩ.

Kateek hatĩ ĩnõõnnõ ꞌthaar ꞌcĩg haĩ Ĩthĩmaĩl,#16:11 Ĩthĩmaĩl: Aĩ ꞌthaara ꞌcĩg haĩ Ĩthĩmaĩl ko Ebereeiyyi, ĩthĩk Makayyioohiti.

hĩnĩngĩtĩ ĩthĩk Makayyioohiti ꞌcannani cunni.

12Aaĩ hatĩ nẽẽ hĩ thigiri ꞌcĩ moru.

Aaburreek hatĩ gõõng nẽẽ eet looc nicci vẽlẽk

nẽ aaburrieek hatĩ eeta ĩnõõnnõ buúk gẽrrẽẽt.

Aburrõõ hatĩ nẽẽ hĩ ꞌgõtõõnõgĩ vẽlẽk.”

13Nĩngĩtĩ akannẽẽkĩ Hagaarĩ ꞌthaar iccig Makayyioohit baa õthõõthõõ hĩ ĩnõõnnõ aĩ, “Iini nii Nyekuc ꞌcĩ acĩnnaa nganĩĩta, hĩcĩna aattĩ eet ꞌcĩ acĩnna nganĩĩt ko.” 14Ĩnõõ ꞌcĩ akannẽẽkĩ eeta wĩĩtaneec tĩho annẽẽkĩ Beer Lahai Roi ho,#16:14 Beer Lahai Roi: Aĩ ꞌthaara ꞌcĩg haĩ Beer Lahai Roi ho Ebereeiyyi, Wĩĩtaneec cĩ Nyekuc ꞌcĩ aꞌthũũnnaanĩ. nĩngĩtĩ aĩ, “Wĩĩtaneec cĩ Nyekuc ꞌcĩ arũgĩ ꞌcĩ aꞌthũũnnaanĩ.” Nga aaĩ wĩĩtanẽẽcĩ tĩho hõrggẽẽnaa cĩ nĩngĩtĩ haĩ Kadeeth hĩ ꞌcĩ haĩ Bered hĩĩ noho.

15Nĩngĩtĩ ũũkcanĩ Hagaarĩ loholeec ꞌcĩ maacĩ nẽ akateek Abũraamõ ĩnõõnnõ ꞌthaar ꞌcĩg haĩ Ĩthĩmaĩl. 16Ma baa ĩĩtõ Abũraamõ irkiꞌnyia hẽẽn turkiyyio hĩ tõrkõnõn (86) ikia ũtũhũa Hagaarĩ Ĩthĩmaĩl.

Currently Selected:

ꞌThianaattõ 16: did

Highlight

Copy

Compare