2 Pẽẽtũrũ 2

ꞌLimmanniook ꞌcĩg ĩĩn oloꞌngiaak

1Nẽ baa aattĩg põrõvẽtaaꞌnya ꞌcĩg ĩĩn oloꞌngiaak buúk eetinitõõ, hĩcĩ hatĩ aattĩg ꞌlimmanniooha ꞌcĩg ĩĩn oloꞌngiaak hõrggẽẽnaa cunuung. Iꞌthianaanĩ hatĩ nẽẽg ngaatĩ allimanĩ thooꞌthiok ꞌcĩg abathĩ ꞌcĩg ĩĩn õlõng burkiitina nẽ ẽppẽhanit Makayyioohit cobbi baa ũũta ĩhõõggõ nẽ ĩĩnattaak eleeti cĩggĩĩng daahĩth hĩdĩĩkoothong. 2Mẽẽlĩg hatĩ eeta ꞌcĩg anũ ĩhõõggõ nẽ ĩthahiꞌthia thooꞌthiok cĩggĩĩng ꞌcĩg abathĩ nẽ ĩĩnattaak ꞌgõõnõgĩ hudukta thooꞌthiok ꞌcĩg ĩĩn õlõng ꞌlimmaanaa ꞌcĩ ĩĩn dĩdĩ. 3Ĩĩn hatĩ nẽẽg lobolobbiaak ꞌcĩg adiim eet ꞌcĩg anũ ĩhõõggõ nẽ iggoolluung thooꞌthiohĩĩ ꞌcĩg ẽmmẽdĩ. Nẽẽthĩ, baa idiim uuk Nyekuci ĩhõõggõ baangaani nẽ uuk hatĩ nẽẽ ĩhõõggõ dĩdĩ.

4Hĩnĩngĩtĩ baa hõllõngaa ammaannĩk Nyekuci aajĩlẽẽt baa ẽꞌthẽcanĩ. Baa ẽcẽb nẽẽ ĩhõõggõ muguuratõõ nẽ udhuheek ꞌgwoyyiaa ꞌcĩ aalla ũdũt, ĩꞌthõng kõr ꞌcĩ hatĩ ẽttẽẽdĩ nẽẽ thooꞌthiok cĩggĩĩng. 5Nẽ korrioohĩĩ baag Nõõa,#2:5 Nõõa: Baa arũgĩ Nõõa korrioohĩĩ baag adĩmanĩ eeta thooꞌthiok ꞌcĩg abathĩ gẽrrẽẽt. Baa avva Nyekuci ĩnõõnnõ hẽtẽhẽny haahũl hẽẽlaĩ eet cĩg halang cĩnnĩ hĩ idiꞌngwa ũgĩ. Nĩngĩtĩ acũdaanĩ Nyekuci eet ũgĩ vẽlẽk hĩ idiꞌngwa tawaanaa cobbi. Tigiil thõõth cĩnnĩ ꞌBuuhaa cĩ ꞌThianaattõ 5-9. baa hõllõngaa ammaannĩk Nyekuci eet ꞌcĩg abũrĩ ĩnõõnnõ loota nĩnga. Baa aruk nẽẽ ĩhõõggõ tawaana nẽ ẽẽla Nõõa hĩ eet tũkĩramma halaangatõõ cĩnnĩ, hĩnĩngĩtĩ baa ĩĩn Nõõa eet ꞌcĩ irrioon thõõth ꞌcĩ aũlanĩ. 6Baa uuk Nyekuci eet cĩg ꞌtaaũnniook ꞌcĩg obbitig cĩg ꞌThõõdõmĩ hĩ ꞌGõmõõra, ngaatĩ atũũthĩ ĩhõõggõ hĩĩtõ hatiꞌtheet nẽ aaꞌnyĩk ĩhõõggõ hĩĩtõ terethiinit ꞌcĩ ꞌgii ꞌcĩ hatĩ edeeꞌnyiak eet vẽlẽk ꞌcĩg hõllõngaa iꞌngolli Nyekuc. 7Nẽ baa ẽẽla Nyekuci Loot buúk ꞌtaaũnaa cĩ ꞌThõõdõmĩ, hĩnĩngĩtĩ baa ĩĩn nẽẽ eet ꞌcĩ abũnnaa ꞌcĩ baa accanan thooꞌthioha ꞌcĩg abathĩ ꞌcĩg adĩman eeta ꞌcĩg abũrĩ nyattal, ꞌcĩg baag arũmĩ hĩ ĩnõõnnõ. 8Dĩdĩ, baa ꞌthẽk ĩĩn Lõõtĩ eet ꞌcĩ abũnnaa, ꞌcĩ baa accananni ꞌthĩnĩtatõõ cĩnnĩ, hĩnĩngĩtĩ thooꞌthiok ꞌcĩg abathĩ ꞌcĩg adtuuha nẽẽ nẽ ĩthĩk waathinnioohĩ vẽlẽk. 9Nẽẽthĩ acinnu, aga Nyekuci ngaatĩ ẽẽlanĩ eet ꞌcĩg athĩhĩ thõõth cĩnnĩ thooꞌthiohĩĩ ꞌcĩg attĩmaniini nẽẽgĩ, tananga nga aaꞌnyĩk nẽẽ eet ꞌcĩg ĩĩn ꞌthẽccanniook haauto ukẽẽtta ĩꞌthõng kõr ꞌcĩ hatĩ etteedini thooꞌthioha. 10Ĩĩn thõõth ciee thõõth ꞌcĩ ĩĩn dĩdĩ, eetinii ꞌcĩg anũ thooꞌthiok ꞌcĩg abũraneek nẽẽg ꞌcĩg abathĩ nẽ odoomito eet ꞌcĩg ĩĩn makayyiook cĩggĩĩng.

Aꞌthĩlan nẽẽg nẽ ĩthĩngõõnyanita, nẽ hõllõngaa iꞌngolli ngaatĩ accĩĩnĩ aajĩlẽẽt cĩg hẽẽtkujjieen. 11Tananga hittiranit aajĩlẽẽta hĩllõõanit eet iccig abathĩ ho, aitiõõ nẽẽg hõllõngaa occa ũũlũ ngaatĩ õhõppõõcanẽẽkĩ ĩhõõggõ Makayyioohit. 12Aattĩg ꞌlimmanniooha cieeg ĩĩn oloꞌngiaak ko hĩ idiꞌngwaana cĩg moru ꞌcĩg aitiõõ muhẽẽnĩtĩ tõõ, ꞌcĩg arrittiaa, hátĩ hagamtĩ nẽ urugti thõng. Õthõõth nẽẽg thooꞌthiok ꞌcĩg abathĩ ꞌcĩg hõllõngaa aga buúk. Nẽẽthĩ, aduheek hatĩ ĩhõõggõ dtiicanĩ cĩggĩĩng ꞌcĩg abathĩ ho ẽmmẽn hĩĩtõ ꞌthĩĩ.

13Acuddiaa hatĩ nẽẽg, hĩnĩngĩtĩ thooꞌthiok ꞌcĩg abathĩ ꞌcĩg adĩman nẽẽg ko. Aangal nẽẽg ngaatĩ adĩmanĩ karramẽẽt nẽ ĩdĩmanit thooꞌthiok ꞌcĩg ĩĩn ꞌriiring waath ꞌcĩg abũraneek eleeti cĩggĩĩng. Ĩĩn nẽẽg eet ꞌcĩg aꞌnyahaakuung ngagiit thooꞌthiok ꞌcĩg abathĩ hõrggẽẽnaa cunuung. 14Thõõth vẽlẽk ꞌcĩ ammuk nẽẽgĩ, ammuk thõõth ꞌcĩ adiim ooginni hĩ maac hode ngaa cĩ ꞌgõõnõnĩ. Aitiõõ nẽẽg hõllõngaa ũũnnĩk ꞌthẽccanẽẽt ũdũt. Allabeek nẽẽg eet ꞌcĩg aggiithi hẽꞌthẽẽcattõõ nẽ abbĩꞌthĩĩ ooti cĩggĩĩng muhẽẽnĩtĩ ꞌcĩ aĩnnĩ ngaam ngaam diooni. Nẽẽthĩ, ĩccĩĩn Nyekuci ĩhõõggõ ẽlẽk. 15Ũtũngteek nẽẽg ꞌgõõl ꞌcĩ abũnnaa nẽ edecit ꞌgõõl ꞌcĩ abathĩ ꞌcĩ anũĩ ꞌlimman cĩ põrõvẽtaac ꞌcĩ haĩ Balaam ngeertĩ eet ꞌcĩ haĩ Beor, baa ammĩnan hẽlẽggĩ ꞌcĩg ammũda nẽẽ ꞌgõõlaa ꞌcĩ abathĩ. 16Nẽẽthĩ, baa eggerenyeek thigiri ĩnõõnnõ hũtũngeek thõõth icci abathĩ ho. Baa aduhaak thigiri ĩnõõnnõ thõõth moloohaa cĩ eeto nẽ aaꞌnyĩk ĩnõõnnõ hĩbĩlĩ ꞌgiithẽnĩt cĩ põrõvẽtaacõ ho.

17Aattĩg eeta cieeg hĩ hẽbẽrĩ cĩg hidiowwaak ꞌcĩg odohohit vẽr nẽ tarĩ, aauto hĩ diiꞌthioha ꞌcĩg uuhan ngõõtĩ. Baa ũkũmanẽẽhĩ Nyekuci ĩhõõggõ nĩngĩtĩ ĩĩn muguur ꞌcĩ hollitup. 18Athĩngõõnyan nẽẽg, hĩnĩngĩtĩ ꞌgiithẽnĩt cĩnĩĩng ko. Nẽ alũllũũman eet ꞌcĩg baag nga ũũnnĩk thooꞌthiok ꞌcĩg abathĩ thõng, ngaatĩ allimanĩ ĩhõõggõ annẽẽkĩ, aitiõõ thõõth ꞌcĩ ĩĩn ꞌriiring hõllõngaa abathĩ hatĩ adĩmannu niig thooꞌthiok ꞌcĩg adiim eleeti cugguung. 19Ĩggõõl nẽẽg ĩhõõggõ anneek haaꞌnyuung aaut lõꞌngõõc nẽ ĩĩn nẽẽ nẽẽg appahacaaꞌnya cĩg ꞌthẽccaanak, hĩnĩngĩtĩ ĩĩn eeta appahacaaꞌnya cĩg hẽlẽggĩ ꞌcĩg aggam ĩhõõggõ. 20Nẽ ma iliittia eeta bathi cĩ lootu ꞌgõõlaa ꞌcĩ agaĩ Makayyioohit Ellioohit cĩnaac Yeesu Krĩstõ nẽ ĩĩtõ appahacaaꞌnya cĩg ꞌthẽccaanak tarĩ, au hatĩ abathoothi nẽẽg hĩllõõanit authet cĩnĩĩng baa ĩĩcĩ oou. 21Occa baa mẽẽn hĩ ĩhõõggõ ngaatĩ hõllõngaa agaĩ ꞌgõõl cĩ bũnnaiitto, hĩllõõan ngaatĩ au agaĩ ꞌgõõl dĩdĩ, ma uruta nẽ ũtũngĩt tilooinit ꞌcĩ ẽllẽẽmĩth baa allimanoothĩk ĩhõõggõ. 22Aku hatĩ edeeꞌnyiak ĩhõõggõ thõõth ꞌcĩ ĩĩn dĩdĩ ꞌcĩ aĩ, “Aduk ũthũrĩ ꞌthaha cĩgĩnnĩg tarĩ.”#Tigiil ꞌBuuk cĩ ꞌGẽẽnyĩthõõ 26:11 Abubbuulaniini ꞌngõõhĩtĩ ꞌcĩ ũtũũnyĩ ẽlẽk tõrrõny.

Currently Selected:

2 Pẽẽtũrũ 2: did

Highlight

Compare

Copy