2 Pẽẽtũrũ 1
1
ꞌThaainit hĩ laiinit cĩ Pẽẽtũrũ
1Aku waraga ciee hĩ nganĩĩt ꞌThimõõnẽ Pẽẽtũrũ dticciannioohit hĩ ꞌthooyyiahit cĩ Yeesu Krĩstõ.
Hẽhẽẽdakuung naa waraga icci ngagiit eet ꞌcĩg hõthõl lemiinit ꞌcĩ haꞌnyak naag ko. Baa aaꞌnyĩhoothĩkeet lemiiniti ciee ngagĩĩt, hĩnĩngĩtĩ bũnnai cĩ Yeesu Krĩstõ, ꞌcĩ ĩĩn Nyekuc nẽ ĩĩ Ellioohit cĩnaac.
2Halayyi naa, hátĩ hĩĩ Nyekuci tarbal hĩ ngagiit nẽ aaꞌnyuung aaut ganõõna ꞌcĩ abũnnaa gẽrrẽẽt! Aallattia agaac ꞌtirrian cĩ Nyekuci hĩ cĩ Makayyioohit cĩnaac Yeesu Krĩstõ hõdõõkõthĩ.
ꞌGõõl ꞌcĩ occa aattiyyi nuyyiooha cĩg Makayyiooktak
3ꞌTirriaanaa cĩnnĩ, aaꞌnyeet Nyekuci ngagĩĩt hẽlẽggĩ vẽlẽk ꞌcĩg hadiim naag haautti rũgẽtaa ꞌcĩ aaꞌnyĩk Nyekuc haccamanoothĩk. Hammũda naag hẽlẽggĩ iccig vẽlẽk ngaatĩ hau hagaĩ ĩnõõnnõ, baa aũũyyeet nẽẽ ngagĩĩt hiita hĩ ĩnõõnnõ bulẽẽttaa cĩnnĩ ĩcĩ ĩllõõan nẽ ẽllẽẽm gẽrrẽẽt. 4Nẽ hĩnĩngĩtĩ bulẽẽnĩt hĩ bũnnai ꞌcĩ ẽllẽẽmĩth gẽrrẽẽt ko, ikia uduhaaheet nẽẽ ngagĩĩt thooꞌthiok ꞌcĩg obbitig ꞌcĩg tiirik. Adukiaa thooꞌthioha cieeg, hátĩ haanytuung ngagiit otholit authet cĩnnĩ nẽ iliittiau thooꞌthiok ꞌcĩg abathĩ cĩg looc nicci, ꞌcĩg ĩkõõtha thooꞌthioha ꞌcĩg abathĩ ꞌcĩg abũraneek eeta.
5Hĩnĩngĩtĩ thooꞌthiok ꞌcĩg ĩdĩmaneeheet Nyekuci ngagĩĩt ko vẽlẽk, ĩttĩmanit gẽrrẽẽt ngaatĩ athiknu thooꞌthiok ꞌcĩg aduha Nyekuci. Ittoorrik lemiinit cunuung bũnnai nẽ ittoorrihu bũnnai ꞌgẽẽnyĩth; 6nẽ ittoorrihu ꞌgẽẽnyĩth authet cĩ haꞌthũũnnĩ eleeti jurrung nẽ ittoorrihu authet ꞌcĩ haꞌthũũnnĩ eleeti temeethi nẽ ittoorrihu temeethi ꞌgõõl ꞌcĩ haaꞌnyĩkĩ Nyekuc haccamanoothĩk; 7nẽ ittoorrihu ꞌgõõl ꞌcĩ haaꞌnyĩkĩ Nyekuc haccamanoothĩk ꞌgõõl ꞌcĩ hĩĩgĩnnĩ tarbalĩg hĩ ꞌgotoonogeet hĩ ngoonogeet, nẽ ittoorrihu tarbalꞌthẽẽt hĩ ꞌgotoonogeet hĩ ngoonogeet mĩnnan cĩ eet vẽlẽk. 8Má aalla aliꞌthu niig ꞌgõõlaa cĩ, ẽtẽrꞌtha hatĩ aĩ eeluung ngagiit thõõth ꞌcĩ agayyu Makayyioohit cĩnaac Yeesu Krĩstõ nẽ aaꞌnyĩk rũgẽt cunuung hĩĩ tiir. 9Má hõllõngaa aliꞌthu niig ꞌgõõlaa cĩ, aattiyyu hinnia hĩ eeta ꞌcĩg rubettẽẽgĩ nẽ ataarrioꞌthu thõõth ꞌcĩ aĩ, ũtũngtoothĩk ꞌthẽccanẽẽta cugguung baag ꞌrẽẽttẽẽgĩ.
10Nẽẽthĩ ꞌyioko ꞌgotoonoga hĩ ngoonoga, ĩttĩmanit gẽrrẽẽt ngaatĩ ẽtẽrꞌthaannu aĩ aattiyyu niig hõrggẽẽnaa cĩ eet baag avvaa nẽ ẽbẽra Nyekuci. Má aallannu adĩmannu thõõth icci, aitiõõ hatĩ hõllõngaa ũũnnĩku lemiinit cunuung. 11Nẽ hatĩ elemuung ngagiit Makayyioohiti Ellioohiti cĩnaac Yeesu Krĩstõ bulẽẽtta nẽ aaꞌnyuung uduhunit habuccieetaa cĩnnĩ ĩĩcĩ aalla ooo.
Thõõth ꞌcĩ horumwa cĩ ꞌBuuk cĩ Nyekuci
12Nẽẽthĩ hoti ho, hammuhaakuung hatĩgõõng naa ngagiit thooꞌthiok iccig, tananga agayyu niig ĩhõõggõ ẽlẽk nẽ okomtu thõõthaa ꞌcĩ ĩĩn dĩdĩ, ĩĩ baa allimanoothikuung ngagiita. 13Nẽ dĩdĩ, hammuhi occa abũnnaa ngaatĩ hammuhaakuung ngagiit thõõth icci, nga harugi naa ho. 14Hĩnĩngĩtĩ eteretheeha Makayyioohiti cĩnaac Yeesu Krĩstõ ẽlẽk, ngaatĩ hidiim hũtũngẽẽhĩ naa rũgẽt cĩ looc nicci. 15Nẽ hattĩmani hatĩ gẽrrẽẽt ngaatĩ haaꞌnyuung ngagiit ummukta thooꞌthiok iccig hõdõõkõthĩ, urutaa ꞌcĩ hũũhĩ naana.
Bulẽẽnĩt cĩ Krĩstõ
16Baa hõllõngaa haduhaakuung naag dtẽẽllẽn ꞌcĩg haddangaanna thõng korrioohĩĩ baag haduhaakuung makaaꞌthĩt hĩ bõdaanĩt cĩ Makayyioohit cĩnaac Yeesu Krĩstõ nẽ ngagĩĩt ꞌcĩg hĩĩgĩnna hẽbẽrĩ cĩg makaaꞌthĩt cĩnnĩ ho. 17Ma baa aggam nẽẽ dĩhĩthẽẽnĩt hĩ bulẽẽnĩt ꞌcĩ aaꞌnyĩk Nyekuci Maaꞌnyia, ikia õthõõth mõlõõhĩ cobbi cĩ bulẽẽnĩt cĩ Nyekuci ĩĩ, “Loholeec caannĩ ꞌcĩ hamĩna cieeni, haccamanoothihi naa gẽrrẽẽt, hĩnĩngĩtĩ ĩnõõnnõ.”#Tigiil ꞌBuuk cĩ Maatteeo 17:5; Maarko 9:7; ꞌLuuka 9:35 18Hĩthĩkta naag dẽẽdẽ molook ꞌcĩ aku hẽẽtahujjieen ko, baa harũmeenna hĩ ĩnõõnnõ muuraa ꞌcĩ aꞌngirannii.
19Nẽẽthĩ hoti ho, haga naag jurrung, ngaatĩ haarĩkĩ ꞌthinneeti cĩggaac nyeemuutaa cĩ Nyekuci ĩĩ baa irrioon põrõvẽtaaꞌnya. Aaĩ nyeemuut ciee hĩ ꞌloomo ꞌcĩ attũllĩ muguuratõõ, alanyĩt ĩꞌthõng haal lõõcĩ nẽ attũllĩ lanyit cĩ Krĩstõ ꞌthinneetinii cugguung, haau hĩcĩ attũhũl cõõbõõcĩ cĩ ngerrenito looc. Adticannu hatĩ ꞌgii ꞌcĩ abũnnaa, hatĩ athiknu nyeemuut icci jurrung. 20Nẽẽthĩ, adiim occa agayyu niig jurrung ainnu, aitiõõ ẽẽtĩ umwaa ꞌcĩ occa aga thõõth ꞌcĩ aduha põrõvẽtaaꞌnya ꞌBuuhaa cĩ Nyekuci ẽmmẽn tõõ. 21Baa hõllõngaa addanga põrõvẽtaaꞌnya thooꞌthiok iccig ẽmmẽn, baa ẽtẽrẽth ĩhõõggõ Lorii ꞌcĩ Ẽllẽẽmĩth hĩ Nyekuc.
Currently Selected:
2 Pẽẽtũrũ 1: did
Highlight
Share
Compare
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
