2 Pẽẽtũrũ 3

Kõr ꞌcĩ hatĩ õbõdaanĩ Makayyioohiti

1ꞌGotoonoga hĩ ngoonoga, waraga ꞌcĩ hẽhẽẽdakuung naa ngagiit ꞌcĩ ĩĩn ꞌramma cieeni. Hẽhẽẽdakuung, hátĩ hũkũtanuung haaꞌnyuung aꞌnyahit muhẽẽnĩt ꞌcĩ ĩĩn dĩdĩ. 2Hadiimmuung naa ngagiit ummuhuttooth thooꞌthiok baag aduha põrõvẽtaaꞌnya baag ẽllẽẽmĩth baag baarkit, hĩ tilooinit cĩ Makayyioohit Ellioohit cĩnaac baa allimaneekuung ꞌthooyyiaha cugguung.

3Ĩĩcĩ oou, abũnnaa agayyu ainnu, kõr cĩ decciaanĩt cĩ lootu, au hatĩ eeta ꞌcĩg arannuung ngagiit nẽ ũnnẽẽcõ thooꞌthiok ꞌcĩg abũraneek nẽẽgĩ. 4Õthõõth hatĩ nẽẽg aĩ, “Aau thõõth baa aĩ, õbõda hatĩ Yeesu tarĩ hutuno? Nganĩngĩtĩ adaaknĩ hĩbaangĩ, aalla ꞌgii vẽlẽk nganĩngĩtĩ ẽhẽnytaanĩ Nyekuci looc.” 5Aduha hatĩ nẽẽg thõõth icci, hĩnĩngĩtĩ adiim ataarrothi ngaatĩ baa ẽhẽnytaanĩ Nyekuci hẽẽtkujjieen hĩ looc thõõthaa ꞌcĩ aduha nẽẽnĩ. Baa ẽhẽnytaa lõõcĩ maamĩ nẽ irriamatteek maama looc. 6Nĩngĩtĩ aku acũdaanĩ Nyekuci looc baa baarkit tawaanaa cobbi gẽrrẽẽt. 7Nẽ thõõthaa nĩĩca dioo, aduhaak Nyekuci hẽẽtkujjieen hĩ looc hereeyyio ĩꞌthõng kõr cĩ decciaanĩt cĩ lootu. Nẽẽthĩ, adhuhoothĩk hatĩ nẽẽg ꞌgwoyyiatõõ nẽ urukti eeta ꞌcĩg hõllõngaa athĩhĩ nyeemuut cĩ Nyekuci.

8Nẽẽthĩ, ꞌgotoonoga hĩ ngoonoga, ma hataarroꞌthu thõõth icci. Hĩ Makayyioohit, aduhõõ kõrra hõdẽẽthõng hĩ irkiꞌnyia aalib hõdẽĩ thõng nẽ irkiꞌnyia aalib hõdẽĩ, aduhõõ hĩ kõr hõdẽẽthõng thõng. 9Hõllõngaa iidoceek Makayyioohiti ngaatĩ adĩmanĩ thõõth baa aduha nẽẽnĩ, hĩcĩ ammuk eeta ũgẽẽgĩ. Maka ꞌthĩnĩt cĩ Makayyiookto hĩ ngagiita, ngaatĩ hõllõngaa adiimi eet umwa hadaak, adiim nẽẽ eet vẽlẽk hũtũngteek ꞌthẽccanẽẽt cĩggĩĩng.

10Anĩhaakeet hatĩ kõrra cĩ Makayyiookto hĩ igorriaahiti. Aꞌnginoothi hatĩ hẽtkujjieen moloohaa cobbi nẽ hatĩ õbõ ꞌgwaa loonyin vẽlẽk. Nẽẽthĩ hatĩ ũtũũthĩ lõõcĩ hĩ hẽlẽggĩ vẽlẽk ꞌcĩg aattĩg loota.

11Má atũũthĩ hatĩ hẽlẽggĩ vẽlẽk hoti, adiim occa iiginnu niig eet ꞌcĩg aattiyyu hutuno? Adiim aꞌnyaku niig authet ꞌcĩ ẽllẽẽmĩthĩ ꞌcĩ athiknu Nyekuc, 12hĩcĩ nga ereeyyu hikia kõrra ꞌcĩ akuuni Nyekuci nẽ ũbũratteek ngaatĩ occa akuuni hĩdĩĩkoothong. Kõr niccia, atũũth hatĩ nẽẽ hẽẽtkujjieen ꞌgwoyyia nẽ hatĩ obooyyi hẽlẽggĩ vẽlẽk abuurꞌtheta. 13Nẽẽthĩ, hẽrẽ naag hẽẽtkujjieen hĩ looc ꞌcĩ ĩĩn ngeju, baa aduha Nyekuci, looc ꞌcĩ abbĩꞌthĩĩ bũnnai cĩ Nyekuci.

14Nẽẽthĩ hoti ho, ꞌgotoonoga hĩ ngoonoga, hĩcĩ nga ereeyyu thõõth icci ho, idticanit thõõth vẽlẽk ꞌcĩ aaꞌnyuung ngagiit ĩĩtõ tẽllĩg, hiꞌthihi thõõth ꞌcĩ abathĩ nẽ aauttu lõꞌngõõc hĩ ĩnõõnnõ. 15Má hataarroꞌthu ngaatĩ ereeini Makayyioohiti, hĩnĩngĩtĩ adiim nẽẽ eet vẽlẽk heellia. Thõõth baa aduha ꞌgõtõõnẽẽtĩ cĩnaac Paaulo buúk ciee, baa ẽhẽẽdakuung waraga ꞌgẽẽnyĩthaa baa aaꞌnyĩk Nyekuci ĩnõõnnõ. 16Õthõõth Paaulo thooꞌthiok iccig vẽlẽk waragẽẽtĩĩ cĩgĩnnĩg nẽ õkõmĩ thooꞌthioha ũgẽẽgĩ ꞌcĩg aduha nẽẽnĩ. Aruk eeta ũgẽẽgĩ ꞌcĩg aggiithi eleeti cĩggĩĩng, ngaatĩ õꞌngõõtanĩ thõõth ꞌcĩ aduha Paaulo. Adĩman nẽẽg hoti hĩ thooꞌthiok cĩg ꞌBuuk cĩ Nyekuci ũgĩ buúk.

17Nẽẽthĩ hoti ho, ꞌgotoonoga hĩ ngoonoga, hĩcĩ agayyu niig thõõth icci ẽlẽk ko, aaut dĩkĩĩm, hátĩ hiittiõõ hõllõngaa idiahannuung eeta ꞌcĩg adĩman thooꞌthiok ꞌcĩg abathĩ nẽ ũtũngteehu authet ꞌcĩ abũnnaa. 18Aꞌnyĩĩk bũnnai hĩ gaiinit ꞌcĩ aku hĩ Makayyioohit hĩ Ellioohit cĩnaac Yeesu Krĩstõ, heelluung ngagiit ĩtĩlĩthĩt. Ĩdĩhĩthĩt Yeesu ꞌyioko hĩ ooo! Aamẽn.

Currently Selected:

2 Pẽẽtũrũ 3: did

Highlight

Compare

Copy