NDAUHLOUMEI 6
6
Lauziu Nac tei rui Seal Guay tei Swbak Patmei
1Lauziu Nac tei rui seal chanei khou tei reymei tei swbak patmei ta ai how the. Khoutei khouringh padeih pang khou tei rui akhat rui ganhkeymei khwan kumcna “Pat tho!” twna samei ai chu the. 2Khoutei ai zauc the, kumna takuanh mphwanmei akhat pat the. Mi khou tei tuanghmeipu tei sauhpai sin e khatni kakhou guanghpyrun tiilou kan e. Kamei ngammeipu swna ngam khang tat pat kan the.#Zek 1.8; 6.3,6
3Lauziu Nac tei rui kaneimei seal tei swbak pat pwkhou, kaneimei khouringc tei rui “Pat tho!” twna samei ai chu the. 4Khoutei takuanh haenghmei akhat pat the. Mi khou tei tuanghmeipu khou tei kandih khou rui chuzaenghmei laa pat khang tiilou kan the. Mi kiu maansei guay khat rui khat ta swluai khang e. Kakhou baengsaeng daihmei tiilou kan the.#Zek 1.8; 6.2
5Mi tangv Lauziu Nac tei rui kathumhmei seal tei swbak pat pwkhou, kathumhmei khouringc tei rui “Pat tho!” twna samei ai chu the. Ai zauc the, khoutei takuanh miwmei pat the. Mi khou tei tuanghmeipu tei duh sin e.#Zek 6.2,6 6Khouringh padeih pang khou tei rui meic khwan kumcna, “Zaeng neih khat phy gehu haandwang akhat, khatni neih khat phy siupian haandwang kathumh. Tiki Olive bang lev drakha bang guay tei thu sw kasih rio!” twna samei ai chu e.
7Lauziu Nac tei rui padeihmei seal tei swbak pat pwkhou, padeihmei khouringc tei rui, “Pat tho!” twna samei ai chu the. 8Ai zauc pw ki takuanh nzinh ndavmei akhat pat the. Mi khou tei tuanghmeipu zanc tei Theihmei kaw e, kumna kathei khou Taruaih#Mi hei theic kanmei nunc bampui bamv ta e. lay guang e. Suc rih rui, nap nkowmei rui, ravpyan rui, khatni nwmbangc khouringc rui, kandih kadam padeih khou akhat ta swluai khang kaney khou ngamv tiilou kan the.#Eze 14.21
9Lauziu Nac tei rui panguhmei seal tei swbak pat pwkhou, Ravguangc lat piupui zaeng rui khatni dinhpui zaeng rui swluai kanmei bumaengc nunc tei ravchabamv bangc khou bammei ta how e. 10“Ngamparimei Poubauhmei, nthanmei khatni nchumhmeipu! Kandih khou lungc bammei nunc ti hei latzan sw makna khatni aniu zei tuang khwm laa makna asaanh lou bam ni hena cho?” twna kaniw kauc bam e. 11Kaniw kathuic khang tei pheychuanh mphwanmei tiilou the, kumna siamruaimei khatni chana nunc ta tei kaniw ta kumcna swluai nimei sing tei swluai ntangh mak saanv nkhwan kanaklou khang kaniw khou kadylou kan the.
12Lauziu Nac tei rui charukmei seal tei swbak pat pwkhou, baengla dai zaymei ta ai how e. Neihmik pheymiw kumc miw kan the khatni bw zei kumc haengc kan the.#Nda 11.13; 16.18; Isa 13.10; Jol 2.10,31; 3.15; Met 24.29; Mrk 13.24-25; Luk 21.25 13Puanzingh rui tadutthai kanuk key kumc gaanchuangcna guay kandih khou taekkey the.#Isa 34.4 14Latrikzy kazih kumc tingpuk kazih gut kan the, chyngbut khatni duipui kandic guay maan ngam the.#Nda 16.20 15Kandih tuang guangc guay, dihsinpouc guay khatni rihpy guay, lungcgaymei khatni ngammei guay, bangh khatni nyngswmei guay, meic katana chyng tuang khowlang tauhlang khou dup the.#Isa 2.19,21 16Kaniw rui chyngbut khatni khowlang khou, mi kumna kauc the, “Aniu ta pangv binlouna guangh bamvpaeng khou dungc bammeipu hu khou rui khatni Lauziu Nac lungpuam khou tei rui nkamhlou o!#Hos 10.8; Luk 23.30 17Kaney tuang lungpuamdai keylou nimei tingmik kiu guang pw the, meic gaanv khat na sini dingchaek ngam ni tu hamh the.”#Jol 2.11; Mal 3.2
Currently Selected:
NDAUHLOUMEI 6: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
