NDAUHLOUMEI 7
7
Isaraelmei Meic 144,000
1Mi tangv, kauh baanchara padeih kandih kwn padeih khou dingna, kandih ruc khou, duipui ruc khou, hamh e thei thingbang khou mpwan aliulou mak khang mpwan padeih ta khaamding bammei ta how e.#Jer 49.36; Dan 7.2; Zek 6.5 2Khoutei ringhmei Racguangc tuang seal sinna kauh baanchara akhat neihpat thangc rui guangmei ta how e. Kandih khatni duipui ta sw kasic khang pumtan tiiloumei kauh baanchara padeih khou tei kamei rui kauc ranvna sa the, 3“Aniu Racguangc tuang bangc nunc ta kaniw sanpiang khou seal namlou mak saanv, kandih, duipui hamh e thei thingbang guay tei sw kasih rio.”#Eze 9.4,6 4Kasanpiang khou Ravguangc tuang seal namloumei meic sing 144,000 e twmei ai chu e. 5-8Mi khou tei Isaraelmei kaikhwang ruhna kanei: Juda, Reuben, Gad, Aser, Naptali, Manase, Simeon, Levi, Isakhar, Zebulun, Josep khatni Benjamin—kaikhwang kathuic khou meic ching ruhna kanei ruhna kanei khou mi sil tei namlou khwan e.
Kasing Kaling Thay Makmei Meic Kangdai
9Mi tangv, ai zauc pw ki, meic kangdai akhat how e. Hei tei kasing kaling thay dat mak khe! Kaniw tei kaikhwang guay, zaatc guay, guanghdic guay khatni lat guay khou rui guangmei nunc e. Kaniw pheychuanh mphwanmei piuna tadanv nuy kuang sinna Lauziu Nac tuang guangc bamvpaeng hu khou tei ding bam e. 10“Aniu ta kanloumei hei guangh bamvpaeng khou dungc bammei aniu Racguangc khatni Lauziu Nac rui e,” twna kaniw kauc bam e. 11Kauh baanchara guay tei guangh bamvpaeng, gaanvthaih guay khatni khouringh padeih daeng khou tei ding huamc bam e. Kaniw tei guangh bamvpaeng hu khou tei nkhum laamv keyna Ravguangc ta kalumna, 12“Amen! Thuanhmei, hymdaihmei, ningting, thuanckumei, chakhwang champouhmei, pumtan khatni baantan hei tingsaeng aniu Racguangc khang e! Amen!” twna sa e.
13“Mi pheychuanh mphwanmei piumei nunc hei tabui swmei nunc cho? Kaniw tabui khou rui guangmei nunc cho?” twna gaanvthaih nunc pang khou tei gaanv khat rui akhou thanv khwan e.
14“Ai thay mak ge. Nang rui thay khang di the,” twna ai rui daw the.
Khoutei kamei rui akhou sa the, “Kaniw hei ryanra daihmei khou tei rui duak patmei nunc e. Kaniw hei kaniw tuang pheychuanh Lauziu Nac zei rui sou mphwanmei nunc e.#Dan 12.1; Met 24.21; Mrk 13.19 15Hei zaeng rui, kaniw Ravguangc tuang guangc bamvpaeng hu khou ding bam tuang e, khatni katuang ravkai khou zingbangc kalaanv siamruai sw bam tuang e. Guanghbamvpaeng khou dungc bammeipu rui kaniw ta kasung khou gaeklou puni. 16Kaniw ndaapc dat lak khe, tari dat lak khe; neih thiu suhmei rui hamh e thei baihmei suhmei rui pw ni kaniw ta raw dat lak khe.#Isa 49.10 17Kalam thu guangh bamvpaeng chung khou bammeipu tei rui kaniw ta gaengclou puni, kumna kaniw ta ringhmei duipuakckai khou zaylou puni, khatni Ravguangc rui kaniw mikdui guay roulou puni.”#Kal 23.1; Eze 34.23; Kal 23.2; Isa 49.10; 25.8
Currently Selected:
NDAUHLOUMEI 7: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
