NDAUHLOUMEI 5
5
Latrikzy khatni Lauziu Nac
1Guanghbamvpaeng khou dungc bammeipu tei kabaanzat khou latrikzy sin bammei ta how e. Hei tei kathei kahu hy padiklou e, kumna hei tei kabamv chanei khou seal nap binlou e.#Eze 2.9-10; Isa 29.11 2Khoutei “Mi nap binlou bammei guay hei laa ganc lana mi latrikzy hei ric pat ngammei thow nai cho?” twna tanhmei kauh baanchara khat rui kauc ranvna kauc bammei ta ai how e. 3Tiki mi latrikzy tei ric patna kalungc khou hyloumei tei zauc ngammei tingkauh thangc ni, kandih khou ni, kandih bangc#kandih bangc: Mi hei taruaihram ta e. thangc ni gaanv khat na sini maek khwan e. 4Mi latrikzy tei ricpatna pac ngammei meic maekpui zaeng rui ai kap ranvna kap khwan e. 5Khoutei gaanvthaih pang khou tei gaanv khat rui, “Kap rio! Juda kaikhwang tuang kamangliangpui, David kikta kamei rui rihngamlou kan the, kumna kamei rui mi seal guay tei swbak patna mi latrikzy tei ricpat nuh the,” twna sa the.#Tha 49.9; Isa 11.1,10
6Khouringh padeih khatni gaanvthaih nchuihna padeih rui guangh bamvpaeng ta bam haengv bammei chung khou tei Lauziu Nac ding bammei ta how e. Hei tei swluai kanmei Lauziu Nac kumc e. Hei tei kachei chanei khatni kamik chanei nai e. Hei tei mbaanv kapwm khou ndiulou kanmei Ravguangc tuang bumaengc chanei tei e.#Isa 53.7; Zek 4.10 7Khoutei guangh bamvpaeng khou dungc bammeipu tuang baanczat khou tei rui latrikzy tei kamei guang laa kan the. 8Kamei rui hei tei laa kan pwkhou, khouringh padeih khatni gaanvthaih nchuihna padeih tei Lauziu Nac hu khou tei nkhum laamv key the. Kaniw guayna tei nrah khatni kachaekc tuang agawkuak khat khat sin e. Mi kuak nunc khou lou padik bammei agaw tei nthanmei nunc tuang huayneymei ravsuai e.#Kal 141.2 9Kaniw tei mi kumcna luthanh suan bam e:
“Nang hei mi latrikzy hei laana,
napbinloumei seal guay tei ric pat khang biuhmei e.
Kalam thu nang ta swluai the,
kumna nang zei rui kaikhwang kathuic, zaatc kathuic, lat kathuic khatni guanghdic kathuic khou rui;
Ravguangc mei khang thuakpatlou the.#Kal 33.3; 98.1; Isa 42.10
10Nang rui kaniw ta guanghdic,
aniu Racguangc tuang amuc nunc tiswlou the,
kumna kaniw kandih khou guanghtu puni.”#Tat 19.6; Nda 1.6
11Kumna ai zauc dat pw ki, kauh baanchara nunc khwan chu e. Kasing kaling thay makmei kauh baanchara nunc, khouringh padeih khatni gaanvthaih nchuihna padeih tei lev guangh bamvpaeng daeng khou tei ding huamcna,#Dan 7.10 12suan ranvna mi kumna suan bam khwan e:
“Swluai kanmei Lauziu Nac hei,
ngamv, lanv, ningting, khatni pumtan,
champouhmei, hymdaihmei,
khatni thuanhmei laa biuc e!”
13Khatni tingkauh, kandih, kandih bangc, khatni duipui khou naimei katana— tingpuk kandih khou naimei katana rui mi kumna suan bammei ta ai chu e:
“Thuanhmei khatni chakhwang champouhmei,
hymdaihmei khatni pumtan hei,
Guanghbamvpaeng khou dungc bammeipu,
khatni Lauziu Nac khang hei tingsaeng sw diu!”
14Khoutei khouringh padeih tei rui, “Amen!” twna daw e khatni gaanvthaih nunc tei nkhum laamv keyna kalum e.
Currently Selected:
NDAUHLOUMEI 5: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
