EPHISIAMEI 5

Gaanhmei khou Lunghmei

1Nangniw hei Ravguangc rui heidikamv nzianmei nac nunc di thena, kata luih khang sw nina e. 2Khrista rui aniu ta nzianna, Ravguangc ta tipianloumei namhgaymei agaw nteina katlou kumc, kapanty aniu khang tiipatloumei tei kumcna, nangniw ni khat khat ta nzianna lungc o.

3Nangniw Ravguangc mei nunc pang khou thu lungcmaanv lungcmowmei, mphuam mphamei, agaamv agahmei; mi guay hei lat na sini satow bam lak nina e. 4Nkhuc nroucpui lat samei, chapav chalaw swmei, mphuam mphamei kiaula, mi guay hei kazi mak khe; sw lak nina e. Mi phaan tei Ravguangc ta thuancku bam nina e. 5Lungcmaanv lungcmowpui mei, mphuam mphapui mei, agaamv agahpui mei (agaamvmei hei ravmaengc kalummei e) tei Khrista khatni Ravguangc guangcdic khou kadam maek ge twmei nangniw thay nina e.

6Mpangmei lat rui nangniw ta tiguat riu. Mi guay zaeng rui latliammei nunc ruc khou Ravguangc lungpuam keylou puni. 7Hei zaeng rui, mi kumhmei nunc ta tei nangniw duang sw riu. 8Nangniw ni kahunungc zinghmei sw bam khwan e; tiki ntaw thu Poubauhmei khou gaanhmei di thena, gaanhmei nac nunc kumcna lungc o. 9Kalam thu, gaanhmei#gaanhmei: baanhhy baibal asaekc khou Bumaengh twna hylou e. thai thu gaymei, ravchaptatmei, khatni nchumhmei e. 10Poubauhmei rui kahawmei tabui tei cho twmei thay khang karamc o. 11Zinghmei tuang gaeng makmei taanv guay tei lay taanh riu. Mi phaan tei, simei tuang simei taanv guay tei ndauhpat ro. 12Kaniw rui nkamhna taanc bammei taanv guay tei sa bam khang sini zakpui tuang e. 13Gaanhmei rui tigaanclou pwkhou ramh guayna kalingmei tei how ngam e. 14Kalam thu ramh guayna tihowlou kanmei tei gaanhmei e. Hei zaeng rui mi kumcna sa e:

“Zip bammei nang, zipthau tho;

theihmei khou rui thau tho;

Khrista rui nang khou gaanclou puni the.”

15Nangniw akumhna lungc bam tu cho twmei zaucchuy o. Mpangmei nunc kumcna lungh riu, ningtyngmei nunc kumcna lungc o. 16Kaganv hei gaytaanv khang asutna piu o; ntaw ganv hei sipui ganv e.#Kol 4.5 17Mpang ri tho, Ravguangc rui ningmei tei phu tho.

18Zouh mba riu; hei tei rui nang ta sw kasic puni. Mi phaan tei Bumaengh rui padikna lungc o. 19Nangniw khat khat khou kalumlu, hymthuanhlu khatni bumaengh lu lat tei sa suan kary o; khatni nangniw lungsyng rui thuancna kalumlu khatni hymthuanhlu Poubauhmei khou suanlou o.#Kol 3.16-17 20Aniu Poubauhmei Jisu Khrista zanc khou, ramh guayna khang kaganv kathuicna Pu Ravguangc ta thuancku bam o.

Now lev Gaanv

21Khrista ta chakhwang swna nangniw khat khat bangc bam o. 22Nowthiu, nangniw Poubauhmei bangc khou bammei kumcna, nangniw gaanv bangc bam o.#Kol 3.18; 1 Pi 3.1 23Khrista hei kamei rui kanpatloumei kapumc phwamling tuang py swmei kumcna, gaanv hei ni now tuang py e. 24Hei zaeng rui phwamling rui Khrista bangc bammei kumcna, now rui ni kalam katana khou gaanv bangc bam nina e.

25Gaanvthiu, Khrista rui phwamling ta nzianna mi khang kapanty tiipatmei kumcna nangniw now ta nzian o.#Kol 3.19; 1 Pi 3.7 26(Mi hei lat khatni dui rui low nthanna reicpatlouna, 27phwamling ta mi mphuam tanacmei, tarat taruaihmei, khatni nthuih makmei maekna, nthanmei, khanvbamv maekmei, howgaymei swna kamei rui kakhang tiilou khang e.) 28Gaanv rui now ta kapumc ta kumcna nzian nina e. Kanow ta nzianpui mei tei kata nzian tuang e. 29Meic gaanv khat na sini kapumc ta karaeng mak ge. Karaengmei phaan, Khrista rui kapumc swmei phwamling khang swloumei kumcna, kamei rui kakhang titu tizangv e khatni kadanlou e. 30Kalam thu aniu hei kapumc nanw the 31“Hei zaeng rui, nggaanvmei rui kapui kapu ta mpatlouna kanow khou kariu nina e, kumna kaney gaanv nei tei akhatna sw nina e.”#Tha 2.24 32Mi khou hei meic thay tangh makmei nthukmei kabac nai e, kumna mi hei Khrista lev phwamling lam khou sa tuang e. 33Tiki mi hei nangniw khang ni sa tuang e: gaanv rui now ta kapumc ta kumcna nzian nina e, khatni now rui gaanv ta chakhwang sw nina e.

Currently Selected:

EPHISIAMEI 5: RONGBSI

Highlight

Copy