EPHISIAMEI 6

Nah nunc khatni Pui Pu

1Alaucthiu, Poubauhmei khou nangniw pui pu lat piu o. Mi hei sw nipui thouc e.#Kol 3.20 2“Nang pui nang pu ta chakhwang sw o,” twmei hei rey liangmei latdanv e; kum pwkhou,#Tat 20.12; Ria 5.16 3“Nang dwan gay puni khatni panty lungsing puni,” twmei latryan nai e.

4Puthiu, nangniw nac nunc lung tipuamclou riu. Mi phaan tei ncham ncheilouna Poubauhmei khou makuatthau o.#Kol 3.21

Bangh khatni Kaipouc nunc

5Banghthiu, nangniw tuang kandih khou tuang kaipouc nunc ta ni ping kadunhna kaniw lat piu o; khatni Khrista tuang siamruai sw tu kumcna kalungc kapaengc nai makna taanc o.#Kol 3.22-25 6Kaniw zauc bam khou na kaniw pian nuh khang swmei tei sw riu; tiki Khrista tuang bangc akhat swna nangniw lung kapwm rui Ravguangc rui kahawmei tei taanc o. 7Maansei siamruai na sw tuang e twna ning makna, Ravguangc siamruai sw tuang e twna ningna lungh gutna taanc o. 8Bangh pw ni, bangh hamhmei pw ni, kamei kamei rui taancloumei gaymei taanv khang tei Poubauhmei rui swan tii puni twmei thay o.

9Kaipoucthiu, nangniw ni nangniw bangc nunc ta hei tei kumcna sw o. Kaniw ta kadungna sw riu. Nang ruc khou kaipouc tingkauh thangc nai e, kamei nang bangc nunc kaipouc nii e, kamei rui meic kathuicna ta nchamcna latzan sw puni twmei ningtow o.#Ria 10.17; Kol 3.25; 4.1

Ravguangc tuang Ricpwan

10Nkhamh khou, nangniw Poubauhmei khou bamna, katuang tanhmei pumtan tei laana, nangniw pumtan tancthau o. 11Diabol tuang rouc raengc guay khou tei rui ding ngam khang Ravguangc tuang ricpwan kapwm tei piu o. 12Kalam thu aniu rui adow bammei hei zei lev zanh pumc ta hamh e; tiki tingpukkauh bamv guay tuang kheihsimei ravsic nunc kaipouc nunc, ngamvsinmei nunc khatni mi zinghmei mbaanv tuang pumtan guay ta adow bam tuang e. 13Hei zaeng rui, Ravguangc tuang ricpwan kapwm tei piu o. Kum e thei, simei ganv guang pwkhou zauczihmei rui adow guangmei ta nangniw akhangv ngam puni, khatni katwan nganvna adowna nangniw ding ngam puni.

14Hei zaeng rui, nchumhmei rui siangiat swna, ravchaptatmei rui ngaengvthuapc swna,#Isa 11.5; 59.17 15chuzaenghmei gaychamv rui phaythuapc swna ding ntip bo.#Isa 52.7 16Mi ruc khou rui, lwmmei rui nggih swna sin o. Kum pwkhou Simeipu rui kaap guangmei maibwang pailu guay tei sw amit ngam puni. 17Ringhbamv rui rihpyrun sw o, khatni Bumaengh tuang baengsaeng— Ravguangc lat hei sin o.#Isa 59.17 18Kum lana, huayney o, nkhavlou khang ney o. Kaganv kathuic Bumaengh paan rui huayney o. Ntak nrak bam o; khaengvthay o; Ravguangc mei nunc khang huayneylou tanh tan bam o. 19Akhang ni huayneylou o: i sa nipui ganv khou sa nimei lat tiilou khang, kumna baucna thay mak khwanmei gaychamv hei dinclou ngam khang huayneylou o. 20Ai hei thu, ntaw kangriang ntalouna bam sini, mi gaychamv hei dinh khang ndiuloupui mei e. Gaychamv hei ai baucna dinc ngam khang huayneylou o.

Kady Kanavmei

21Poubauhmei tuang siamruai taanv khou lwmnuhmei, aniu nzianmei chana Tukhika rui ai akumh bam tu cho khatni ai tabui sw bam tu cho twmei nangniw khou raclou puni.#Lat 20.4; 2 Ti 4.12 22Aniw akumhna bam tu cho twmei nangniw khou dinclou khang khatni nangniw ta katiulou khang ai rui kata nangniw khou ndiulou tuang e.

23Pu Ravguangc khatni Poubauhmei Jisu Khrista rui chuzaenghmei khatni lwmmei kazauhna nzianmei chana punav guay khou tiiloumei sw diu. 24Aniu Poubauhmei Jisu Khrista ta maan dat lakmei ramzian nzianmei guay khou Ravguangc tuang chuzaenghmei nai diu!

Currently Selected:

EPHISIAMEI 6: RONGBSI

Highlight

Copy