EPHISIAMEI 4

Chwnchamcna Lungc o

1Hei zaeng rui, Poubauhmei khang rui kang bammei ai rui nangniw khou huay e: Ravguangc rui nangniw ta kawloumei panty lwnlung khou tei lungc o. 2Kaganv kathuicna niamhna, lungh zaenghna, khatni khaengvthayna bam o. Khat khat khou akhaengvlou karyna nzianmei lyanlou o.#Kol 3.12-13 3Chuzaenghmei paan rui nangniw ta bang kariulou bammei, Bumaengh rui tiimei akhatna swmei tei nai tanh tan bam khang ngammei kasang karamc o. 4Nangniw ta kawloumei tuang rigwnmei hei akhatnamei kumcna, pumh akhat nade, Bumaengh ni akhat nade. 5Poubauhmei akhat de, lwmmei akhat nade, duilupmei akhat nade; 6Ravguangc akhat nade. Kamei hei aniu guayna pu e, aniu guayna kaipouc e, aniu guayna khou taanv taanclou e, khatni aniu guayna khou bam e.

7Tiki Khrista rui aniu khou dam swna nzanhlouna aniu kathuic khou kaipat tiilou e. 8Nthanmei latrik rui sa e:

“Kamei kauh thangc kupui ganv khou kangmei mpeyna ta nduangh ku kan e;

kamei rui meic nunc khou kaipat tiilou the.”

9“Kamei ku kan e” twmei kiu tabui kabac cho? Mi kabac thu kamei kandih kabangc kasyng thangc key the twmei tuang e. 10Kumna key kanmeipu tei tingpuk kandih khou bam lik sik khang tingpuk ruc kauh thangc ku kan the. 11Kaipat tiimeipu kiu kamei hei e. Gaanvsaekc ta latdiutatmei khang, gaanvsaekc ta muhzwng khang, gaanvsaekc ta gaychamv dinh khang, gaanvsaekc ta gaenghpouc khatni dinhpouc khang kamei rui tiilou the. 12Mi hei kaniw hei kaniw rui Ravguangc mei nunc ta siamruai taanv khang kasiamhthaulouna Khrista tuang pumc tidaic thau khang e. 13Kum pwkhou, aniu lwmmei khou khatni Ravguangc Nac Mpouh ta thaymei khou akhatna swna nchamcna guang tangclou khang, aniu meicphamei swna Khrista tuang hyang ryan daic tangh khang e. 14Kum pwkhou, kaniw rouc rui meic nunc ta nchumh makmei khou zay mbianghlou tat bammei meicguatmei nunc tuang latdyn rui dui kamuatc kumc, pwanzingh kumc, kaniw ta phungc pat, phungc gut tat bammei alauc nunc kumhmei tei aniu sw dat mak khang e. 15Mi phaan tei, nzianna nchumhmei lat sana, aniu kalam katana khou kapyswmei Khrista khou daicthau khang e. 16Kapumc nanw guay tei kapy Khrista khou nsuk alamvlouna, nanw kathuic kathouc kathouc taancna, kapumc tei daicthau khang nzianmei paan rui kasiamh thau khang e.#Kol 2.19

Khrista khou Panty Kathanc

17Poubauhmei zanc khou ai rui nangniw khou sa e: gaeng makmei chwn khou rui patmei thei layna lungc bammei ravning makmei nunc tei kumcna lungc dat ri tho. 18Kaniw lungning zingc the; Ravguangc tuang ringhmei tei kaniw khou maek ge. Kalam thu kaniw lung tanhmei rui kaniw ramhkhat sini thay mak khe. 19Kaniw khou zakmei nai dat mak khe. Nthah boulahmei khou luplou lana kasut tuang nai dat makna simei, mphuammei taanv guay taanc the.

20Khrista khou rui nangniw khou nchamloumei tei thu mi kumhmei tei hamh e! 21Nangniw Khrista lam khou chu kan the khatni kakhou naimei nchumhmei tei nangniw khou dinclou kan the. 22Guatmei tuang kahawmei rui sw kasicloumei nangniw tuang meic raan tuang lwnlung tei luak ganc o.#Kol 3.9 23Nangniw lung khatni lungning tei tikalaic patna, 24Ravguangc ta luicna kasiamhloumei, kalingmei khou rui ravchaptatmei khatni nthanmei panty lungc ndauhpatmei meic thanh tei pheybaan piu kumcna piu o.#Tha 1.26; Kol 3.10 25Hei zaeng rui, saraamc dat ri tho! Khat khat khou latling sa o. Kalam thu aniu pumh akhat tuang nanw nchamc di the.#Zek 8.16 26Nangniw lungh puamc sini paapc taanh riu; neihmaryn puamc zingh rio.#Kal 4.4 27Diabol khang bam tii riu. 28Kaihouhmei nunc tei houc dat ri tho; maekmei nunc khang tiipat ngam khang, alinghna kabaanc rui taanc dat kan di tho. 29Nangniw mwang khou rui sw kasic nimei lat sapat riu; tiki chuloumei nunc khang suaihiam sw nimei, kaniw ta kasiamhthaulou nimei kage naimei lat tei sa o. 30Nangniw hei Ravguangc tuang di the twna thuakloumei tingmik nganv khang nangniw khou tiiloumei Ravguangc tuang Bumaengh Nthanmei tuang lung tikabiu riu. 31Lungning nkhucmei, reihsimei khatni lungh puamhmei hei ganc o. Kaudu kaudangmei, sakasic karoucmei, karaengmei lungning, mi kumhmei guay hei ganc o. 32Mi phaan tei khat khat khou nzianthayna, lungh niamhna, Ravguangc rui Khrista khou nangniw ta kuakloumei kumcna khat khat ta kuaklouna lungc o.#Kol 3.13

Currently Selected:

EPHISIAMEI 4: RONGBSI

Highlight

Copy