EPHISIAMEI 3
3
Zentelmei khang Paul rui Taancloumei
1Hei zaeng rui, Zentelmei nangniw khang rui Khrista Jisu zaeng rui kangkai khou bammei Paul akhou, 2mi Ravguangc zauzian taanv hei nangniw khang taanclou khang nsinlou the twmei nangniw chu kan the twna laa the. 3Ravguangc rui katuang meic thay mak bam khwanmei raeng tei ndauh patna akhou tithaylou the. Mi lam khou tei samna ai hylou kan the. 4Kumna ai rui hylou kanmei tei nangniw pac e thei Khrista tuang meic thay mak bam khwanmei, ai thaymei hei nangniw ni thay puni.#Kol 1.6-27 5Kahunungc thu hei tei meic nunc khou tithaylou mak bam khwan e, tiki ntaw thu Ravguangc rui Bumaengh paan rui katuang nthanmei latdiutatmei nunc khatni muhzwng nunc khou ndauhlou the. 6Mi kiu thu, gaychamv paan rui Zentelmei ni, Jihudimei lev Ravguangc suaihiam laa nchamc puni the. Kaniw hei ni pumh khat di the, kumna Khrista Jisu paan rui tiilou nimei nrianhloumei tei lay laa puni the.
7Ravguangc rui katuang zauzian kaipat swna akhou katuang kaipat tiilouna gaychamv tuang siamruai taanv hei akhou nsinlou the. 8Ai hei Ravguangc mei nunc pang khou nthyammei khou rui nthyam liangmei bam khwan sini, kanganv nai dat makmei Khrista tuang lanv tuang gaychamv hei Zentelmei nunc khou dinc ndauh khang, 9khatni Ravguangc rui taanclou nimei meic thay bam mak khwanmei raeng hei meic guay khou dinc ndauh khang akhou nsinlou the. Ramh katana damcloumeipu Ravguangc rui mi hei kahunungc thu ndauh pat makna lou bam khwan e. 10Mi kiu ntaw hei, phwamling paan rui, kalam katana thay ngammei Racguangc ningting tei tingkauh kandic tuang kaipouc nunc khatni ngamvsinmei nunc thay kan khang e. 11Mi kiu Ravguangc rui reynungc rui raengc guangmei raeng thei layna, Poubauhmei Jisu Khrista paan rui taanc pat kanmei taanv e. 12Khrista khou bammei paan rui khatni kakhou lwmmei paan rui, aniu baucna, rouh tuang maekna Ravguangc daeng khou guang nuh the. 13Hei zaeng rui, ai nangniw khang rui ryanra khaengv bammei khou hei nangniw lungh tangkhyn mak khang huay e. Mi hei nangniw hymdaih khang e.
Khrista ramzian
14-15Hei zaeng rui kandih khou ni, tingkauh thangc ni, kalingmei kaikhunc guay tuang zancphuakh tiiloumeipu, Pu hu khou ai khuksun key e. 16Gaat tuang nai dat makmei katuang hymdaihmei khou rui, kabumaengc paan rui, nangniw khou pumtan tiilouna, nangniw tuang kalungcmei mei ta tei titanc thau khang ai Ravguangc khou ney e. 17Lwmmei paan rui nangniw lung khou Khrista lungclou bam khang ai huayney e. Nangniw nzianmei khou kamaan zangc ntip keyna ding ntipna, 18Khrista ramzian kasaanv, kadiat, kathukh, kakau Ravguangc mei baihmei guay lev nangniw ni thay ngam khang ai huayney e. 19Ngguay, kasyng thay tangc ngam makmei Khrista ramzian hei thay khang, kumna Ravguangc tuang lwnlung nangniw khou padik sikh sik bam khang e.
20Aniu khou taanv sw bammei katuang pumtan paan rui, aniu rui neymei suangc khatni ning tanghmei suangc mbuna taanclou ngammeipu, 21Ravguangc hei phwamling khou khatni Khrista khou tingsaengzaeng hymdaic bam kan diu! Amen.
Currently Selected:
EPHISIAMEI 3: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
