1 PITAR 2
2
Ringhmei Tauc khatni Nthanmei Zaat
1Hei zaeng rui karaeng zauczihmei, rouh raengh simei, gaypui khe swmei, howtimei khatni meickai ta sakasicmei kapwmna ganc o. 2Nangniw ngasatna nunc rui noucdui kahawmei kumcna nthanmei bumaengh tuang taektw ta kahaw o. Kumna mi paan tei rui nangniw kanloumei nganv daic thau khang e. 3Kalam thu Poubauhmei zauzian nangniw mbap kan the.#Kal 34.8
4Meic nunc rui thu gancpatloumei, tiki Ravguangc khang thu kadahloumei khatni kunghmei ringhmei tauc Poubauhmei daeng khou ana guang o. 5Nangniw ni ringhmei tauc swna guangna bumaengh tuang ravkai swthaumei tauc tei tisw o. Mi khou tei nangniw nthanmei amuc nunc swna Ravguangc rui laalou nuhmei, bumaengh tuang khaengpui taanv Jisu Khrista paan rui taanc bam khang e.
6“Zauclo, kadahloumei kunghmei tauc
Zaion khou kaikwnpy tauc swna ai rui lou e.
Kakhou lwmpui mei ta tei zakmei ti-ariw lak ge,”#Isa 28.16
twna hylouna nai e. 7Mi tauc hei lwmmei nangniw khang kunghmei tauc e; tiki lwm makmei nunc khang thu,
“Kai swmei nunc rui ganc patloumei
tauc tei kaikwnpy tauc sw the.”#Kal 118.22
8Kumna,
“Hei tei meic nunc ta tiphaysuy nipui tauc e,
kaniw ta tibow nipui tauc e,”#Isa 8.14-15
twna hyloumei kumcna, kaniw lat tei lwm makpui zaeng rui mi khou tei phaysuy the. Hei tei kaniw dam the.
9Tiki nangniw thu, nangniw ta zinghmei khou rui katuang charynmei gaanhmei khou kaw patloumeipu Racguangc tuang charynmei taanv guay dinc ndauh khang rui, Ravguangc rui kadahloupui mei nunc e; guangh tuang amuc nunc e; nthanmei zaat re; Ravguangc tuang mei nunc e.#Tat 19.5-6; Isa 43.20,21; Ria 4.20; 7.6; 14.2; Tit 2.14; Isa 9.2 10Kahunungc nangniw Ravguangc tuang mei nunc hamh bam khwan e; tiki ntaw thu nangniw kamei nunc di the. Kahunungc nangniw Ravguangc zauzian laatow makmei nunc sw bam khwan e; tiki ntaw thu nangniw kazauzian laatow the.#Hos 2.23
Ravguangc Bangc nunc
11Nzianmeithiu, mi mbaanv ramc khou gin swna lungc khanv bammei ai rui nangniw khou zaenghuay e! Bumaengh ta adow bammei meic pumc rui kahawmei khou rui karei pat ro. 12Zentelmei nunc hu khou nangniw khei liak gayna lungc o. Kaniw rui nangniw ta meicsimei nunc de twna sa bam pwsini, kaniw nangniw tuang gaymei taanv guay tei howna katuang latzan nungc kiu Ravguangc ta thuanc kan diu.
13Nangniw Poubauhmei khang rui kandih tuang ngamv phunghmei guay bangc khou bam o. Ngamv karucsyngmei guanghdaihmei bangc khou ni bam o. 14Kataanv simei nunc ta dandi tii khang khatni nchumhmei taanhmei nunc ta thuanckulou khang ngamv tiiloumei guanghkhyn nunc bangc khou ni bam o. 15Mpangmei nunc rui thay makna sakasic bammei lat guay tei nangniw tuang taanv rui munthimloumei hei Ravguangc rui kahawmei e. 16Nangniw nyngswmei nunc swna lungc o; tiki nyngswmei tei simei taanh khang thu sinsw rio. Ravguangc bangc nunc swna lungc o. 17Meic guayna ta chakhwang sw o; chana punav ta nzian o; Ravguangc ta ping o; khatni guanghdaihmei ta kangam kaziu sw o.
Khrista Kumcna Khaengv o
18Banghthiu, nangniw kaipouc nunc bangc khou chakhwang champouhna bam o. Nzianthaymeipu bangc khou ni, meicsimeipu bangc khou ni bam chuyna bam o. 19Meic nunc rui nchumh makna sw kasicna swmei tei nangniw Ravguangc ta thayna khaengvlou e thei, hei tei suaihiam de. 20Tiki nangniw khuay zaeng rui nangniw ta baimei zam suhmei tei thu nangniw khaengv bam sini tabui gaeng tuang naina cho? Tiki nangniw nchumhmei taancna ryanramei khaengvlou e thei, mi khang tei Ravguangc rui suaihiamlou puni. 21Ravguangc rui nangniw ta kawloumei hei mi kumcna lungh khang the. Khrista kamei nangniw khang ryanra khaengvlou the kumna kathei lay nzeic khang taanclou the. Mi kiu kakaamv lay kaamh khang the. 22Kamei paapc taanh mak ge; kamwang khou rui saraamhmei lat khat sini sa pat mak ge.#Isa 53.9 23Karuc khou latsic latrouc salou tisini kamei latsic latrouc sa khangc dat mak ge. Kata rai riu tisini, khwm khangc ni twna sa mak ge. Mi phaan tei nchumhmei latzanpouc khou kata nsinlou e.#Isa 53.7 24Aniu paap khou rui duak patna ravchaptatmei khou lungh khang kamei kahak rui thing ruc khou kapumc khou aniu paap phungclou the. Katuang zam guay tei rui aniu ta tigaylou the.#Isa 53.5 25Nangniw hei ruan maan tat kanmei lauziu nunc kumc bam khwan the; tiki ntaw thu nangniw bumaengc ta gaengclou nimei khatni gaeklou nimeipu khou guang dat the.#Isa 53.6
Currently Selected:
1 PITAR 2: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
