1 PITAR 1
1
1Jisu Khrista tuang latdiutatmei Pitar rui—Ponta, Kappadokia, Asia, khatni Bithunia kandic khou ginswna lungc bammei Ravguangc rui kapahloumei mei nunc, 2Jisu Khrista lat piu khang khatni kazei rui sw nthanlou khang Pu Ravguangc tuang raeng thei layna kapahlouna Bumaengh rui nthanmei mei tiswloumei nunc khou hymei:
Zauzian khatni chuzaenghmei nangniw khou padikna tiilou mbu hay hay bam kan diu.
Khristian Rigun
3Aniu Poubauhmei Jisu Khrista Racguangc khatni Pu ta aniu thuanc kho! Kalam thu kamei rui aniu ta heidikamv nzianna, Jisu Khrista ta tiringcthaulou datmei paan tei rui, maan dat lakmei rigwn khou aniu ta puanclou the. 4Kum thena Ravguangc rui tingkauh thangc nangniw khang lou bammei maan dat lakmei, kasic dat lakmei khatni kamv key dat lakmei ringhmei tei nangniw laa puni the. 5Hei tei nkhamhmei tingmik nungc ndauh pat punimei kanloumei tei tangh mak saanv lwmpui paan rui Ravguangc pumtan rui gaeklou bammei nangniw khang the.
6Nchanvmei kazaat azuh ariwna matak khat khang nangniw ryanra bam pwsini, mi khang hei rui nangniw neihla bam o. 7Mi nchanvmei hei thu nangniw ramlum tei kalyng bammei tuang e. Maan kan nimei kachaekc ta sini kalingmei pat khang mai ntei e. Hei tei kumcna kachaekc khang suangc kunghmei nangniw ramlum tei kalingmei sw khang kalyng ni tina di the. Mi hei Jisu Khrista ta ndauh patpui nungc kiu thuanckuloumei, hymdaihmei khatni champouhmei nangniw laatow khang e. 8Nangniw kata how mak he, tiki nangniw kata nzian the, khatni ntaw nangniw kata how mak sini nangniw kakhou lwm the, kumna sa pat khang thay makmei hymdaihmei ramneila nangniw neihla bam e. 9Kalam thu nangniw kakhou lwmmei thai nangniw bumaengc ta kanloumei nangniw laatow the.
10Nangniw khang tiilou nimei kaipat lam hei dinc kasuakcloumei muczwng nunc mi kanloumei lam hei phu mincna kathai khwan e. 11Khrista ryanra khaengv nimei khatni hymdaic nimei lam khou kaniw lungc khou bammei Khrista Bumaengc rui dinc kasuakclou pwkhou, mi kiu thow puni cho khatni tabui ganv khou pat puni cho#mi kiu thow puni cho khatni tabui ganv khou pat puni cho: hamh e thei mi kiu tabui ganv khou akumhna guang puni cho. twmei kaniw kathai khwan e. 12Tingkauh thangc rui ndiu keymei Bumaengh Nthanmei paan rui, gaychamv dinhmei nunc rui ntaw nangniw khou dincloumei chamv hei, kaniw dinc kasuakc bammei tei kaniw khang hamh e, nangniw khang e twmei Ravguangc rui kaniw khou ndauhlou khwan e. Tingkauh baanchara nunc thay niimei kiu ni mi hei the.
Nthanmei Panty khou Lungh khang Kawloumei
13Hei zaeng rui nangniw lungning sianlangv langv o; ntak nrak bam o; Jisu Khrista guangpui nungc kiu nangniw khang tiilou nimei suaihiam khang tei rigwn bam o. 14Nangniw latpiumei nac nunc sw o; ramhthay makna bammei douc tei kumcna meic pumc rui kahawmei rui nangniw kheiliak kasiamh dat ri tho. 15Nangniw ta kawloumeipu hei thu nthanmeipu e. Hei zaeng rui nangniw kheiliak guay hei ni nthan nina e. 16“Nangniw nthan nina e, kalam thu ai hei nthanmei e,” twna hylouna nai e.#Lev 11.44-45; 19.2
17Zawkhu zawru zauh makna, meic guayna ta kataanv kataanv thei layna latzan swmeipu ta nangniw rui “Apu” twna kaw e thei, nangniw mi mbaanv khou ginswna lungc bammei panty khou hei kata pingna lungc o. 18Nangniw ta, nangniw pupouc nunc khou rui laamei tuang gaeng makmei panty lwnlung khou rui thuakpatloumei hei maan kan nimei daandi kachaekc rui hamh e twmei nangniw thay e. 19Mi hei khanvbamv maekmei, hiaksuimei lauziunac kumhmei Jisu Khrista tuang kunghmei zei rui e. 20Mbaanv damh mak khou rui kata kadahlou tang the; tiki nangniw khang rui mi nkhamhmei ganv khou hei ndauh patpui tuang e. 21Kata tiringcthaulouna kahym tidaicloumeipu Racguangc khou nangniw kapaan rui lwm the. Kum thena nangniw lwmmei khatni rigwnmei Ravguangc khou nai the.
22Ntaw thu nchumhmei lat tei piupui paan rui nangniw ta sw nthanlou the. Kumna nangniw chana punav khat khat ta nzian changhna lungc nipui tuang di the. Kum thena, nangniw lungsyng khou rui#nangniw lungsyng khou rui: baanhhy baibal asaekc khou nangniw lung kapwm rui twna hylou e. khat khat ta nzianna lungc o. 23Kalam thu ringhmei khatni maan dat lakmei Ravguangc lat paan rui, nangniw ta theic dat makna ringc bammeipu nac nunc swna puanclou the. 24Kalam thu,
“Maansei hei thu pucbwan kumh tuang de,
kaniw tuang tik gunc guay tei ni
mwnpwang na kumh tuang de.
Pucbwan guay tei theic e,
mwnpwang guay tuai e;
25tiki Ravguangc lat thu tingsaeng nai bam e.”#Isa 40.6-8
twna nthanmei latrik rui samei lat kiu nangniw khou dincloumei gaychamv hei the.
Currently Selected:
1 PITAR 1: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
