JAKOB 5
5
Lungcgaymei nunc ta Kakhimloumei
1Lungcgaymei nunc, nangniw nking o! Nangniw ruc khou keylou punimei ryanra ryanriumei khang tei rui kangiuhna kap la tho. 2Nangniw tuang lanv guay raam ngam the khatni nangniw tuang pheybaan nthumc tu ngam the.#Met 6.19 3Nangniw tuang daandi kachaekc sauc ngam the. Kumna mi sauhmei raamv tei rui nangniw khuay ndauh puni, kumna hei tei rui nangniw ta mai kumcna tu puni. Mi nkhamhmei ganv khou hei nangniw lanv peic mpunglou bam the. 4Nangniw lau tay phihmei nunc tuang phy tii makna lou bammei lanv tei rui nangniw khuay kauc ndauh bam e, khatni nangniw lau taymei nunc rui kauhmei khwan tei Ngamparimei Poubauhmei nukuanc chu tangc the.#Ria 24.14-15 5Nangniw mbaanv khou mathac malacna, ramh ningtow makna lungc the. Nangniw rana nangniw ta dowluai nimei khouringc gy kumc bam the. 6Nangniw rui nkhuai makmei nunc ta kakhuay nkhamlouna swluai the; kaniw nangniw ta akhangv mak ge.
Khaengvthaymei khatni Huayneymei
7Hei zaeng rui, achanathiu, Poubauhmei guang mak saanv khaengv thayna bam o. Zauclo, lautaanhmei nunc rui kathai laa khang khaengvthayna tingseimun khatni lauphwnswan ting ta nkhwan bam e. 8Nangniw ni khaengvthay nina e. Ding ntip bam o; Poubauhmei guang nimei tingmik ana the.
9Chanathiu, nangniw ta latzan sw mak khang, nangniw chana punav khat khat ta khanc lanc bam rio. Zauclo, latzanpouc chaengmun khou ding bam the. 10Chanathiu, Poubauhmei tuang muczwng nunc ta tei ningtow o. Ryanra khaengvmei khou kaniw kumcna khaengvthay o. 11Aniu rui kaniw ta sangaymei nunc twna kaw e; kalam thu kaniw khaengvthaymei nunc e. Job rui khaengv kanmei tei nangniw chu kan the, khatni nkhamh khou Poubauhmei rui kakhang tiilou dat kanmei tei nangniw thay the. Poubauhmei thu nzianthaymei khatni zauzianthaymeipu e.#Job 1.21; 2.10; Kal 103.8
12Achanathiu, nangniw tingkauh ta pw ni, kandih ta pw ni, baih baihmei ta pw ni zay saancna syangdyng sw rio. Nangniw Ravguangc latzan khou keylou mak khang, kum ni thei “kum ni” khatni kum lak ge thei “kum lak ge” twna sana taan o.#Met 5.34-37
Huayney o
13Nangniw pang khou thowkumhmei ryanra bammei nai tu cho? Kamei huayney kan diu. Thowkumhmei neihla bammei nai tu cho? Kamei Ravguangc ta thuancna suan kan diu. 14Nangniw pang khou thowkumhmei nnau bammei nai tu cho? Poubauhmei zanc khou kakhou thauh teylouna kakhang huayneylou khang phwamling tuang gaanthaic guay ta kaw kan diu.#Mrk 6.13 15Lwmna huayneymei tei rui kata tigaylou puni; kumna Poubauhmei rui kapumc tigaylou dat puni khatni kamei nkhuaimei taanclou tuang nai e thei kuaklou puni. 16Nangniw ta suc numei khou rui tigaylou khang, nangniw tuang khuay khat khat khou kalauhna khat khat khang huayney kary o. Ravchaptatmeipu tuang ravsuai rui taanvdaih taanc ngam e. 17Elija hei ni aniu kumhmei maansei de; tiki kamei rui ting riu mak khang lungh gutna huayney pwkhou, tingkwm kathumh bw charuk ting riu keylou mak khwan e.#1 Ki 17.1; 18.1 18Kamei rui huayneylou dat pwkhou tingpuk rui ting tikey dat the, kumna kandih khou phunling nthai dat the.#1 Gu 18.42-45
19Achanathiu, nangniw thowkumhmei chaeng maanvna nchumhmei khou rui ducna tat kanmei ta phungc guanglou dat re thei, 20thow pw ni paapcmei ta katuang nchumh makmei chaeng khou rui phungc guanglou datmei kamei tei rui paapcmei bumaengc#paapcmei bumaengc: hamh e thei kabumaengc. ta tei theihmei khou rui kanlou puni khatni kapaap heizumei tei kuaklou puni twmei kamei thay kan diu.#Lkd 10.12; 1 Pi 4.8
Currently Selected:
JAKOB 5: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
