ROMNYI 13

Kidhan Kekhang kesenthu Tuwi Kekuli

1Anyi tsüdila kidhan wi kekhang kesenthu jüh nkinathu yishü. Kepaghenanye Anyiza nkenye tsü thola kedi saya nben, nu kedikesa tsüna Anyiza na khuchi. 2Tsalina anyi thowa na kedisa kebenwa shunten khe Anyiza na khukechi ahza tsü shunben; nu thowa na tsüti saten khe ma ketanla kemeten-kemesha sen nu ma miwi gho yaben. 3Kepaghenanye anyi kemehai kuli ketenthu nyela nkemehai kuli ketenthu na kekhang sen kebenthu tsü messiden. Nthu na anyi kekhang kesenwa tsü nmessila mvu ben kwe? Isalethu, kemehaiwa kulilo, ma nthu seng ben na, 4kepaghenanye ma Anyiza maghawa nu nthu ghena kemehaiwa kuliben. Isala keujüla nthu na nkemehai kuli lethu, ma messiyalo, kepaghenanye ma nthu meten cü keten kekhang tsüna ntsakhiwa. Ma Anyiza maghawa nu Anyiza wi kemeten-kemesha tsü sengho nkemehai kuli ketenthu miwi chiden. 5Anyiza wi kemeten-kemesha ghena ketan nye, isala kemeshen kemetha ghena la, nthu na ha jjügi ghena kekhang kesenthu jüh nkinathu yishü.

6 # Mat 22.21; Mrk 12.17; Luk 20.25 Ha jjügi ghena nthu khajana la pi cüben, kepaghenanye kekhang kesenthu na mathu kekuli tsü sacenchi lethu, mathu na Anyiza kekuli tsü saben. 7Tsalina nthu pi kecü-u wi pi cülo; nthu ghena nu nthu keben ghena la khajana pi cü, nu nyuwakekü pi mathu tsüdila ccücalo.

Kesü Kesü Tuwi Kekuli-u

8Anyi kesü men la npvüla, isala khokho ketizenli tenlo; kepaghenanye thowa na nyu tizenten khe ma Ayenwa tsü nieben. 9#Bvü 20.13,14,15,17; Aye 5.17,18,19,21; Lev 19.18 Ayenkhukechithu wi “Nqhezala; nyu npathila; n-ghanfüla; nyu ji ntepaghala” —hathu ha tsüdi, nu kepathu la pi ayenkhukechi kesü wi saghuben, “No ketanla no ketizen ti njenshüjenphon tizenyalo.” 10Keujüla nthu nyu tizenten lethu, nthu na khiela ma tuwi sazzi nben; tsalina ketizen tsüna Ayenwa mabenla nie keten tsü.

11Nthu na ha nsathu yishü, kepaghenanye nthu jencan keshagha matsü na nthu wi ghodha kesa nthu na chüben. Kepaghenanye ithu hangshaya keten matsüwa hana kheni ithu nondi tegü miwi khiliwa tetsaki bendha. 12Aghaja cen wa tendha, nu aghanan tetsaki bendha. Ithu kejang kekuli sa keten tsü teshi nu kewegü wi ssi kesalile aghitsanqai pvüya nalo. 13Aghanan kewegü wi hang ketenthu ti ithu yencüki mehaitsü saya nalo —pongca-pongqhe nyelela adina nsala, kahang nkemetha nyelela ayen nkemehai nsala; kitagha nyelela anyonghopvü nsala. 14Isala Apvüwa Jisu Khrista wi aghitsanqaithu khuya, nthu kesami yencüki nu asajjü kesa mvuwa tsü teshi yilo.

Currently Selected:

ROMNYI 13: RENGNBSI

Highlight

Copy