ROMNYI 12

Anyiza Kekulikesa wi Kahang

1Tsalina icünyuthu, Anyiza nanketizen na di ntsa kesalina hi nthu wi khieben: Nthu ketanla nthu pi kahang hhansha sa pi Anyiza cülo, ma kekuli ghena satemethachi, nu ma kenenwa satenlo. Hawa ha atsentsa kekinyi nthu na nsathu yishü. 2Nthu ayyi ha wi kahangyen ti nsala, isala nthu kemeshen ketheü kesa wina Anyiza yala nthu kahang sa pi kemilitha sa thsülo. Isathu nthu na Anyiza kemeshenwa, mangwa na mehai nu ma kenenwa nu mehai cencu khe tsü chüyaben

3Nu Anyiza nanketizen pi hi kecü ghena hi nthu tsüdi wi khiben: Nthu ketanla nthu meshen pi misi ntsa nsa lalo. Isala Anyiza na kenondi pi nthu meshu kesüsü cü ketheng qei wina sati nmeshenthu yishü. 4#1 Kor 12.12 Ithu gwo kesü wi alen kepapa kesa kejonla ben, nu alen hathu tsüdila kepapa kekuli na ben. 5Tsü makesü, ithu na kejon lela Khrista wi tsü ithu na agwo kesütan, nu agwo kesü wi alen kepapa keben tsüti ithu tsüdila khokho kizanghuli pvüben. 6#1 Kor 12.4-11 Tsalina Anyiza na nanketizen pi ithu kecü tsü kenie wina ithu aju kepapa tsü senten na. Keujüla ithu ju tsüna Anyiza ketsijüh kekhi lethu, ithu kenondi qei wina tsü kesa-u; 7keujüla tsüna nyu kekuli kesa lethu, ithu na nyu kekuli kesa-u; keujüla tsüna nyu kesansi lethu, ithu na nyu kesansi-u; 8keujüla tsüna nyu kechü-kenong kesa lethu, ithu na tsüti kesa-u. Thowa na pala pi nyu cüten khe mohho ntsa pi kecü-u; thowa na kekhang senben khe apiketsü sa kekuli-u; thowa na nyu tuwi ccatssüten khe anonghethi kesa-u.

9Nanketizen tsüna leben tsentsa nsathu yishü. Nkemehaiwa nanmeghü nu kemehaiwa tsü ghansenya. 10Khristanyi yen wina khokho ketizenliya, nu khokho nyuwakeküli tenlo. 11N-nontssüla nu apiketsü sa kuli. Nleben tsüdi pi Apvüwa kekuli sa tenlo. 12Kenondi wi anonghethi sa, agükeccü wi kethankehiya, nu matsü tsüdi wi kekhie sa tenlo. 13Nthu keben pi Khristanyi kahhatuthu gishü sen, nu nthu jjen wi kijünyi thu ssiyalo.

14 # Mat 5.44; Luk 6.28 Anyiza wi sawegü pi nthu meten-mesha ketenthu cülo khie - anle, nkishencüla nu sawegü pi cülo. 15Anonghe ketenthu gweghe anonghe, nu qai ketenthu gweghe qailo. 16#Kem 3.7 Nthu jawi ajühjja meceqe hanglo. Nkapvüla, isala anyi ma satemeni ketenthu ssinu apvüshang sa. Nthu ketanla nthu metsa benle nmeshenla.

17Keujüla nyu nthu tuwi nkemehai sa lethu, ma wi nkemehai nsa nengla. Anyi tsüdila mehaile kesawa tsü sa tenlo. 18Nthu saya kemehai chu anyi tsüdi ssinu kecca wi hanglo. 19#Aye 32.35 Ipvüshangthu, khiela ajukhi meyala, isala Anyiza lebenkekha ya tsü sa thsülo. Kepaghenanye Ntsawajüh na khiben. “Apvüwa na khiben, hi ajukhi yaden, nu akutimen pi cüden.” 20#Kem 25.21-22 Ntsawajüh na hati khineng ben, “Keujüla nghinyi na ghama ben lethu, ma ghanja cü; nu ma dighe ben lethu, ma ya jjüya thsülo. kepaghenanye no tsüti kesa wina ma sa pi jüghewa thsüaben.” 21Nkemehai yala nmiwi nkhang thsüla; isala kemehai sen nu nkemehai miwi khang yalo.

Currently Selected:

ROMNYI 12: RENGNBSI

Highlight

Copy