ROMNYI 14

Nyu Kesami Nbhala

1 # Kol 2.16 Anonkeghe sa kenondi wi nkekhang nyi tsü ssiya, isala ma kemeshenwa tsü ssinu nkeccücanlila. 2Anyi kesü ma kenondi ghena pala tsüdi dsaden, isala ma kenondi nkezüwa na aghang-wenjja ketan dsaden. 3Anyi pala tsüdila dsa ketenwa na anyi aghang-wenjja ketan dsa ketenwa nkhichi nsala, nu aghang-wenjja ketan dsa ketenwa la pala tsüdi dsa ketenwa nmeshensala, kepaghenanye Anyiza na ma yayadha. 4Nthu na thowa lenu nyu kepa wi maghawa kesami bhaten nu? Tsüna ma mehaiya le ncenla lela ma Pvüwa ketanla südhe ben. Nu ma mehai yaben, kepaghenanye Apvüwa na ma sa pi mehai thsüya mehai.

5Anyi kesü na ghanan kesü pi ghanan kepa miwi mechanki le meshenden, nu anyi kepa na ghanan tsüdila makesü le meshenden. Anyi kesüsü ma ketanla ma kemeshen tsü ghansen khvu benyalo. 6Thowa ghanan kesü meshen pi mehai ntsa saten khe ma Apvüwa kinyikü wina tsüti satenlo; thowa na pala tsüdila dsaten khe ma Apvüwa kinyikü wina tsüti satenlo, kepaghenanye ma kedsakejjü ghena keseng pi Anyiza cüden. Thowa pala pahan ndsa mvuten khe ma Apvüwa kinyikü wina tsüti saden, nu ma keseng pi Anyiza cütenlo. 7Kepaghenanye ithu thola ma ketanla ma ghena ketan hang nten, nu thola ma ketanla ma ghena shü nten. 8Keujüla ithu na hang lela tsüna Apvüwa ghena hangben, nu shü lela tsüna Apvüwa ghena shüaben. Tsalina ithu na shü le hang lela Apvüwa ji sadha. 9Kepaghenanye Khrista na keshü nu kahang wi lela Apvüwa sale kesalina ma shü nu hangneng-shagha. 10#2 Kor 5.10 Tsalina nthu aghang-wenjja ketan dsa ketenthu — mangkesa ncünyuwa meshensaten nu? Nu nthu pala tsüdila dsa ketenthu — mangkesa na ncünyuwa nkhichi saten nu? Ithu tsüdila Anyiza jühkekaghakhi tuwi ngan benle. 11#Isa 45.23 Kepaghenanye Ntsawajüh na khiben,

“Apvüwa na khi, hi hang keben tsüti

tsüdila ituwi akhhutsüben,

nu tsüdila hi Anyiza le khishiben.”

12Tsalina ithu tsüdila Anyiza tuwi papa kekuli cüki tsü khiben.

Ncünyuwa sa pi Nkhuli Thsüla

13Isalethu, ithu khokho nkemeshensali la nalo. Isala no khiela pala katsüha lela kuli pi ncünyuwa ccümeshü nyelela kesami wi khulidu thsü yishü. 14Hi Apvüwa Jisu wi keben ghena hi kemeshen tsü kedsakejjü ha mangla nkemetha nmi kesa chütiben, isala keujüla anyi kesü na kedsakejjü pahan na nmetha le meshen lethu, tsüna ma ghena nmetha. 15Keujüla no pala pahan kedsakejjü ghena ncünyuwa ccümeshü lethu, no nanketizen wi nkuli ladha. No kedsakejjü pahan tsü kedsajjü ghena Khrista na ma ghena shü ketheng ncünyuwa tsü meyasa lalo. 16No metha le kesawa tsü nyu yala nkhisa thsü lalo. 17Kepaghenanye Anyiza Kadiyyi tsüna kedsa nu kejjü ghena nye, isala ketsatan, kecca, nu anonkeghe Kemetha Ghamu na khuchi keten tsü. 18Thowa na hati nu Khrista kekuli saten khe ma Anyiza kaghali pvüya nu anyi kenen la sayaden.

19Tsalina ithu na keshüthangla kecca sengho nu khokho satezüya kesa kekulithu tsü nmitsüthu yishü. 20Kedsakejjü ghena Anyiza kekuliwa tsü meyasala. Kedsakejjü tsüdila dsajjüya mehai, isala katsüha lela kedsajjü ghena nyu sa pi kesami wi khulidu thsü lethu, tsüna kesazzi. 21Kemeshon ntsawa na asa ndsala, kisengtssü njjüla, nu ncünyu sa pi khuli thsüa kesa kekuli tsü nsala. 22No ha jjügi ghena kenondiwa tsü pi Anyiza nshinyi jüwi thengya. Anyi thowa na ma kekuli wi meshon le meshen nu ma ketanla ma nmeshensala saya khe kemihhi ntsawa! 23Isala keujüla ma kesütu nu dsa lethu, Anyiza na ma meshensa den, kepaghenanye ma kekuliwa tsüna kenondi miwi na nye. Nu katsüha lela kenondi miwi nkenye tsü tsüna kesami.

Currently Selected:

ROMNYI 14: RENGNBSI

Highlight

Copy