ROMNYU 3

1Tsonlo Judanyu kethyü le nyu kegwa le bin nla? Nmvu ai gikerü genyu nyu kechwi le bin nla? 2Ligühigü ai a-kechwi le bin sa; keda tsingü le hi: Sunggigü jo gü pe anyugun tenyen shü kela genyu. 3Tsonlo tsüdan peha le joketsin zomvu kela genyu Sunggigü we thyü pe no joketsin zomvula logwa ole? 4Tsonlo nrün ndi, temi aphu kenkunyu thyü hü yatse ai Sunggigü we no joketsin gü thyülo mvulo shvu. Tsü rüla hihontse thu njü,

“Njo kezo nyu meno nle joketsin zohü

nletse mvuloshvu;

lo mele njün kera kegun ka nle me nyeki

kvulo mvuloshvu.”

5Ai n ntsenseri kemvu genyu Sunggigü kentsen sha petsülo yatselo, nle nyu zo semon? Sunggigü le shaja pe me ketsü tsüle a-zümvu ole? (Ale temi kerüchün hontse zoti.) 6Tsonlo nrün ndi, kechamvule tson yatselo dihontse Sunggigü le temi jün keralo ti la?

7Ai a kenku genyu Sunggigü joketsin kezo sha ntsen pe a-zankechwi thyülo hü yatselo, tsonlo nyu genyu meno a nmu hü nla? 8Lo thakegwa no chwiryülo nrün genyu gwakemvu thyü nu, tse ale zo letseo pehale aka zo kehü hontseo jo tsühontse kethyü zo kehünyu nmu zü.

Temi kentsen mi nme ndi

9Tsonlo dihontse mon? N gun Judanyu le me nyeki gwakvu ole? Nmvu shü, ale n güka Judanyu metse lo Griknyu metse aphu kemu hensin binla sele tse zoshü so. 10Ketsinlesü le hihontse thu njü nyo:

“Temi kentsen mi ndi laso;

nme ai ndi laso

11temi thakerüchün me ndi,

Sunggigü kefü mi ndi laso.

12Anyugun aphu tson gwünzü laso;

temi thakegwa kethyü mi ndi so;

nme-e ndi laso.

13Anyugun jo dan le sika kepe kü hontse;

lo anyugun yi le me kesa jozo hünyo,

lo anyugun mün nyu peri tseyi le bin;

14Anyugun mün nyu shochün shokhü le

süpvü.

15Me dushvu titse kethyü anyugun pha

shwe whüwhü tse gwünzin;

16anyugun le kehü tson nyu kenke kenmhü

lo kenjün kethyü nti.

17Lo anyugun le nyun kebwen tsongü

shamvu;

18lo anyugun mhundyü ka Sunggigü

shye kenshvu ndi.”

19Tejvü gü nyu tha zokeshü dan le tejvü hensin kebin nyu dan ka zo kebin gwünzin tse kethyü ngun le shabin nyo, tsügenyu temi aphu jo (mün) khinla hünyo, tson-o kazü temi aphu no Sunggigü mhundyü nyu kemu nyu thyüla nrün genyu. 20Tsügenyu tejvü kezen genyu temi nme-e a-mhundyü nyu kentsen nyu thyülo hümvu; kechamvule tejvü genyu kemu rüla shalo kehü gwünzin.

Sunggigü Le Temi Thyü Ntsenlo Kehü

21Ai ntsoka we Sunggigü le temi thyü ntsenlo kehü tesha shü laso, lo tsüle tejvü genyu mvu. Tejvü gü tsüle sidyükeshanyu ko tsü jünzo ryü. 22Tsügü tsü le Sunggigü kentsen le Jisu Khrista ketenyen genyu tenyen kelonyu aphu ge ryü hünyo. Kechamvule temi ligühigüe kecha thyü loho. 23Temi aphu mu laso, lo Sunggigü zankechwi gü timvu laso. 24Ai Jisu Khrista ge kenikelo khikeshü Sunggigü le n shwikenjün genyu kenrun nyu kentsen nyu thyülo hü nyo. 25Temi ligühigü ai tenyenlo yatselo tsü hyulo titse kethyü genyu Sunggigü le Jisu zi pe kerüshvu nme thyüshü. Tsügü tsü le Sunggigü le a-nyunthon-o nduka mu kehü dan jüshüo a-kentsen tsinshü. 26Tsühontse ntsoka ai a-le ntsen letse kethyü tsinshü hünyo. A-le ntsen lo Jisu Khrista tenyen kehünyu dan thyü ntsen shü kehü gü tse kethyü meno shalo nrün genyu.

27Tsonlo n gun le ketekho keloi bin le dikipon bin nla? Ndi! Tejvü genyu ole? Ntho genyu la? Nmvu, ai ketenyen jvü gü genyu. 28Tsügenyu temi le tejvü genyu mvule ketenyen genyu kentsen nyu thyülo hü nyo tsekethyü n gun le sha tsentsü laso. 29Sunggigü le Judanyu dan nti Sunggigü ole? Judakemvunyu we sin mvu ole? E, Judakemvunyu-e Sunggigü le. 30Sunggigü le nme, lo a-le gikerünyu metse lo girü kemvunyu metse tenyenlo yatselo tsünyu thyü ntsenlo hünyo. 31Tson yatselo nle ketenyen higü genyu tejvü gü khela se ole? Nmvu, nne tejvü gü thyü nkoshü kehü gwünzin.

Currently Selected:

ROMNYU 3: REGSBSI

Highlight

Copy