ROMNYU 4

Abraham Le Ketenyen Genyu Ntsenkelo

1Lo n gun le n gun bon Abraham rüla nyu zo mon? A-le nyu hyulo la? 2Kechamvule Abraham le a-npvü a-tho genyu ntsenlo yatselo, a-le a-npvü ketekho lo gwa; ai Sunggigü we a-shwen loho. 3Ketsinlesü le nyu zohü nla? “Abraham le Sunggigü tenyenlo, tsügenyu a-lope kentsen nyu letse kolo.” 4Lo tha kethyünyu le tha hyulo ai tsüle a-shwikenjün genyu tse hümvu, ai tsü le a-shün. 5Tson ai tha nme thyü keshü genyu mvu, ai ntsen kemvu nyu thyü ntsenshü kehü gü tenyenlo yatselo a-ketenyen genyu a-le ntsen letselo hünyo. 6Tsühontse ntho genyu kemvu ai Sunggigü le nthyü pe kentsen nyu thyülo kehünyu phou kengvü rüla David ai nduka hihontse so:

7“Sunggigü le a-thyükezü jü pe tsü

kelanyu,

lo a-kemu henlo kelanyu le aphou kengvü ketsin le!

8Sunggigü le a-lope kemunyu letse lo kehonyu

le aphou kengvü ketsin!”

9Kengvü ketsin higü hile gikerünyu genyu nti le girü kemvunyu genyu ko sin la? Abraham le ketenyen genyu a-lope kentsen nyu letse kolo. Tson yatselo dihontse a-lope kentsen nyu letse kolo la? A-girü kelo siki le a-girü kemvuka la? Tsüle a-girü kelo siki mvu ai a-girü kemvu ka. 10Lo a-le a-girü kemvuka nyu ketenyen genyu ntsen kelo mohor hontse kethyü gikerü hyulo. 11Tson-o a-no girü kemvuka ai tenyenlo-o ntsen kelo hontse girü kemvunyu aphu bon thyülo nrün genyu. 12Tsüntimvule a-no a-girü kelo dan bon gü thyü sin; tsüdan le a-girü kelo ntimvule n gun pvü Abraham le a-girü kelo mhundyü ki tenyen-o yhun kehü hontse yhun kethyü genyu.

Ketenyen Genyu Sunggigü Le Zope Bin Kenjü Hyukelo

13Tson-o Abraham lo a-tsipwen dan no kazü gü lolo titse zope bin kenjü le tejvü gü genyu mvule tenyenlo-o ntsen kelo genyu hyulo. 14Tson mvuo tejvü zen kehü dan nti no kazü tsügÜ gwen ti yatselo, ketenyen le a-kon ndi laso, lo zope bin kenjü güe tha ja thyü lati. 15Kechamvule tejvü gü le nyunkekhü senryü hünyo; ai tejvü kendi bin nyu we tejvü gwünkerho-e ndi.

16Tsügenyu kenrun nyu shwikenjün ka tsekethyü shalo nrün genyu tsüle ketenyen genyu le. Lo nduka zope bin kenjü jo tsügü tsüle Abraham tsipwen aphu genyu zo tsentsü; lo tsüle tejvü zen kehü dan nti genyu mvule ngun aphu bon gü Abraham ketenyen hontse tenyen kehünyu dan ko sin. 17Tsügenyu hihontse thu njü, “Ale nthyü pe nno tsipwen kechon pvügü thyüshü laso.” Tson-o Abraham le a-le tenyen kehü gü kesi ai pe kerhün thyülo kehü, lo kendi ai pe kebin thyülo kehü gü Sunggigü mhundü nyu n gun bon thyülo. 18Ketsinlesü le kezo hontse, “Ntsi npwen no chonsa ti,” tsekethyü zo pe bin kenjü hontse a-no temi kechon bon gü thyülo nrün genyu thame tenyenlo nrün kendi ka ai a-le Sunggigü jo tenyenlo. 19Tson-o a-keyhun chen le chen tsi pen güzhü la lo Sara (a-nu) ge nyu yhunlo hoso tsekethyü siki ai a-ketenyen sünila mvu. 20A-le Sunggigü jo gü tsü rüchün pe kenyunhvuo tenyenmvu lamvu, ai tenyen tsentsü tseo Sunggigü shwen bin. 21Lo Sunggigü le zoshü kela gü a-le thyü penshü tsentsü tse tenyen ton bin. 22Tsügenyu a-ketenyen genyu a-le ntsen letse la. 23Lo tsügü tsü le a-npvü a-genyu nti mvule n gun genyu ko thu njü. 24N gun ai kesi nyu Npugü Jisu thyü nrhün kelogü tenyen hü yatselo n ketenyen genyu a-le nthyü ntsen loti. 25N kemu genyu a-no si lo nthyü ntsenlo nrün genyu a-thyü nrhün nilo.

Currently Selected:

ROMNYU 4: REGSBSI

Highlight

Copy