ROMNYU 2

Sunggigü Le Me Jün Kekera

1Tsügenyu, hire temi, nle segü yole, me nmu kehü nle thame kezoi bin ndi, kechamvule nle me kechanyu nmu hü yatselo n npvü n nmu kehü gwünzin, nle me nmu kehü gü n npvü ai me hontse thyü kehü genyu. 2Lo Sunggigü le temi tsühontse kethyünyu nmu zü tsekethyü nle shabin nyo. 3Tsügenyu, hire temi tsühontse thyü kehünyu nmu kehügü nle n npvü tsühontse thyü hüo Sunggigü jo kekera gü nrhilo titse rüchün hü nle? 4Nmvue nle Sunggigü shwikenjün kegon lo nyhenhi kethyü lo A-nyun kethon tsü shamvu ole? A-shwikenjün gü tsüle ntson tsin pe nno nnyun kelulo nrün gü shamvu hü le? 5Ai nnyun kerü le nnyun kenjünthyülo kemvu genyu Sunggigü le kenjü nyu me nmu kesoka, nyunkekhü tsangkeben gü genyu n npvü nyunkekhü kequen kebin gwünzin. 6Kechamvule Sunggigü le temi nme me tse a-tho hontse a-chün thyü pe tsü nrün genyu. 7Nyhenhio zankechwi, ndila lokeho lo teshwe füo thakegwa thyü kehünyu le kethonthen kerhün pe tsüti. 8Ai a-npvü a-so lo ketsin gü jo zen mvuo ketsin kemvu jo zen kehü dan we nyunkekhü lo nyunkenta pe tsüti. 9Judanyu no ri lo Griknyue sin tseo temi ligühigüe gwakemvu thyü kehünyu kenjün kethyü lo nyungwakemvu no a-chün thyü pe tsüti. 10Ai Judanyu no ri lo tsüsika Griknyue sin tseo zankechwi lo teshwen lo nyukebwen pe thatho kegwa thyü kehünyu tsüti. 11Kechamvule Sunggigü le temi aphu so ketun kehü genyu.

12Temi ligühigüe tejvü kendinyu kemutho thyü kehünyu le tejvü kendi nyu anyugun no nkela ti, lo temi ligühigüe tejvü le bin ai mu hü yatselo tejvü nyu anyugun jokera ti. 13Kechamvule Sunggigü mhundyü nyu we tejvü jo nyü kehü dan mvule tejvü jo thyü lo zen kehünyu nti le kentsen nyu thyü kehü genyu. 14Lo Judakemvunyu tejvü kendinyu dan le anyugun nyunki tejvü nyu thyü mvulokeshvu dan thyü kehü, tejvü ndi ai tsüle a-jvü thyü laso. 15Tson-o anyugun le tejvü nyu sen kezü dan pe anyugun nyun ge thu kenjü tsinshü hünyo, anyugun nyun le tsü lope jünzoshü hünyo, tson-o anyugun kerüchün nme le anyugun nmu lo kecha nme le anyugun le njü letse hü. 16Tsangkeben jon tsünyü tsü ale jolokegwa gü nyu kezo hontse, Sunggigü le Jisu Khrista no temi rüla tesü tebu kebin dan tsü kera ti.

Judanyu Lo Tejvü Gü

17Hire, nle Judanyu letse-o tejvü gü tenyen hü lo Sunggigü temi letseo ketekho bin logwa. 18Lo nle tejvü gü nyu thashalo-o Sunggigü kendo sha, lo thakegwa dan tsüle gwa letse hü ado; 19lo nle a-yhütyü keponyu tsonketsin nme letse lo kezün nyu kehünyu dan mah kenben nme thyü, 20lo nle tejvü gü nyu ketsin gü shalo-o kepin nyu dan no thasha kelo nme thyü lo nyuhonyu dan senkethyü nme thyü hü ado. 21Tsügenyu me senthyü kehü gü, nle n-npvü nsenthyü hü mvu ole? Nle meno, “Rühu nyalo,” tseo me ka zokehü gü nle rühu hü ole? 22Nle meno, “Keyüla nyalo,” tseo me ka zokehü gü nle keyüla hü ole? Nle teromen kezü ntsü kehü gü, nle teromen kerüshvu kanyu tha rühu hü ole? 23Nle tejvü sen hü nle tseo ketekho kehü gü, nle tejvü gwünrho-o Sunggigü rühvu kemvu tho thyü hü le? 24Kechamvule ketsin lesü le zo, “Hagun genyu Judakemvunyu dan nyu Sunggigü zan ntsü tin laso.”

25Lo nle tejvü gü zen kehü we nge gikerü le a-kechwi le bin nyo, ai nle tejvü gwünrho hü yatselo n gikerü le girükemvu thyüla hünyo. 26Tsügenyu girü kemvunyu nme le tejvü nyu thyümvulo keshvu dan thyü, lo zen hü yatselo a-girü kemvu lope gikerü hontse mvu ti ole? 27Lo nle thu pe bin kenjü tejvü le bin, lo girü pvülo tse ai tejvü gü gwünrho hü yatselo, a-girü kemvu tejvü zen pen kehünyu nme le n nmu lati. 28Kechamvule tegwen ki nti Judanyu kethyü le Judanyu ketsin mvu, nmvu ai thyü ge gikerü nti we gikerü ketsin kemvu genyu. 29Ai nnyunki Judanyu le Judanyu ketsin, lo a-nyun ki gikerü le gikerü ketsin, tsüle thu pe bin kenjü tejvü gü nyu mvule Kapu kipon, temi tsünyu kegwa le temi ka nyu kemvu, ai Sunggigü kipon hyulo.

Currently Selected:

ROMNYU 2: REGSBSI

Highlight

Copy