ROMNYU 1

Kelu Keshü

1Paul, Jisu Khrista gogü Apostel thyülo tseo kejülo, lo Jolokegwa zolo tseo Sunggigü le kolo laso. 2Jolokegwa tsügü tsü Sunggigü le nduka sidyükeshanyu dan no kenshü lesü dan ka thu njü. 3Tsügü tsü le A-nyugü n gun Npugü Jisu Khrista rüla: A-thyümin kipon we David tsipwen ge nnyulo; 4lo a-kapu kenshün kipon we, kesi nyu rhünni solo-o, kvusa tse a-le Sunggigü Nyugü tsekethyü tsinshü. A-le n Npugü Jisu Khrista gü. 5Jisu Khrista genyu Sunggigü le a shwi njün-o Apostel tho pe a tsüshü, tsipwen aphu nyu temi no a-tenyen lo A-jo zenlo nrün genyu. 6A-jo zen kelonyu dan nyu hagun Rom nyu kebin nyu ai Jisu Khrista temi thyü titseo Sunggigü le kolo kelanyu dan.

7Tsügenyu ale lesü thu pe Rom nyu kebin Sunggigü le so kehü dan lo kenshün nyu thyü titse kolo kela dan ka shü bin nyo. Npvü Sunggigü lo Npugü Jisu Khrista no shwikenjün lo nyun kebwen pe hagun ketsü gü thyülo ndano.

Chenkeno Kehi Kethyü

8Ajo kerigü le, kazü aphu nyu hagun ketenyen sha gun kela genyu hagun aphu genyu ale Jisu Khrista zan nyu Sunggigü shwen bin nyo. 9Ale a kehi ka hagun rüla rüchün zin hü nyo tsekethyü, ale anyun aphu pe A-lo thyüo, A-nyugü rüla jolokegwa zokehü Sunggigü le sha bin nyo. 10Sunggigü no a-kendo letseo ano ryüo hagun zen kehyu shü nda tse hibin hünyo. 11Kechamvule hagun thyü nkolo nrün genyu ale Kapu jochü peha sen ryüo hagun zen kenjünlo nda tse hagun hyushü nyüri tsin bin nyo. 12Tsügü tsü le ngun khinyunyu ketenyen nyu hagun-e lo a-e thyü nkolo nrün genyu.

13Lo a pvünyu dan, Judakemvunyu kechanyu dan nyu hontse hagun dan nyu ko atha sha peha hyulo nyüo ale gwün kechon ki ryüo hagun shwishü titse ndo hü ai tha peha le a khin zin bin kehü hagun ko no shanyü. 14Kechamvule ale Griknyu lo rünyi kechanyu, tha keshanyu lo tha shakemvunyu, aphu pu pvü binla so. 15Tsügenyu ale jolokegwa gü pe hagun Rom nyu yhun kebin nyu dan ka ai zoshü nyü hobin nyo.

Jolo Kegwagü Kekvu

16Kechamvule ale Khrista Jolokegwa den zin we kejola hümvu, tsü le Judanyu genyu ri lo Griknyu ai sin, tse tenyen kelonyu aphu kenilo nrün Sunggigü kekvu gü genyu. 17Kechamvule Sunggigü le dihontse temi thyü njülo hüyo Jolokegwa gü le tsü yhenshwi shü, tsü le binzen ka gü keni keti ketenyen genyu nti. Tsügü rüla hihontse thu njü nyo, “Ketenyen genyu Kentsen nyu le rhün loti.” (Heb:2:4).

Temi Nshünkemvu

18Temi serikemvu sen-o ketsin tson khin kebin dan, anyugun kemu lo ntsen serikemvu aphu genyu tsangge Sunggigü nyu kekhü le tsüdan teshashü bin laso. 19Sunggigü le shaja pe anyugun tsü bin laso, kechamvule temi no Sunggigü shalo kegwa Sunggigü le A npvü tsin tsentsü pe anyugun hishü kelasi genyu. 20Kazü nyhun kelo gerhonyu a-kegwa kethonthen a-kekvu lo a-jvü a-rüla le hyu tsentsü bin laso. Tson-o temi le Sunggigü le thyü keshü dan ge a-shalo gwa, tsügenyu thame ka-e anyugun kemvu jüshü loho. 21Anyugun le Sunggigü sha bin nyo, ai zan kechwi pe Sunggigü tsü, lo A-cheno lomvu laso. Tson kethyügü mvule anyugun le thakon kemvu kerüchün lo kezün le anyugun nyun kesü thyü laso. 22Anyugun npvü anyugun le thasha letse hü nyo, ai anyugun le kennunyu. 23Lo anyugun le zankechwi kethyü, sila lo keho Sunggigü lope sila kehü temi, lo tegü lo nyukhu lo kazü nyu nyon kehü nme hontse laso. 24Temi le nnu pe hihontse tinkela genyu, Sunggigü le anyugun no kentsükenchen kethyü dan thyü hü nyülo thyü hü lotse anyugun kheshü la, tson-o anyugun le khinyunyu zen-o kejokemvu tho dan thyü tin laso. 25Kechamvule anyugun le Sunggigü ketsin gü lope kenku thyüo, n nyhun keshü gü mvule nyhun kelo dan rüshvu lo a-lo thyü tinkela genyu, ai Sunggigü we no kethonthen kengvü gü thyülo! Amen.

26Hi genyu Sunggigü le anyugun khe pe kejokepvü kenyü nyu shüla, tson-o tenunyu dan ai anyugun jvü khelao tenunyu jvü kemvu dan thyü tinla. 27Lo tsühontse pechenyu ai tenunyu ge a-jvü gü khelao khinyunyu kenyü tin laso, tson-o pechenyu npvü pechenyu zen-o kejokemvu thyüo anyugun kemu chün anyugun no shaja hyulo.

28Lo temi le Sunggigü rüla ketsin gü lope a-nyun nyu shünyü mvu kela genyu, a-le anyugun khe pe ntsen serikemvu nyun kepvü kipon shü la, tsügenyu anyugun le thyüzü kemvu dan thyü tin laso. 29Tson-o serikemvu, gwakemvu, tha ketepen, me shwikerüchün, me shwipe a-yhü kethyü, kedushvu, kega, lo me kesa hi aphu pe anyugun süpvü bin laso. 30Lo selü, me zokenshvu, Sunggigü shwikerüchün, kemakin, ketekho lo keteri kethyü, nduka sha hü kemvu gwakemvu aphu anyugun le thyü hünyo, lo a-pepvünyu jo zen kemvu. 31Lo anyugun le tha rüchün hümvu, a-npvü a-jo lope jo thyü hümvu, lo me so nmvue me njü hü kemvu dan me. 32Sunggigü tejvü nyu zokeshü le temi hihontse thyü kehünyu le sila zü tsekethyü tsü anyugun le shabin nyo, anyugun le tsüdan thyü kehü nti mvule me kechanyu ai no tsühontse thyü kehü anyugun kenyü hünyo.

Currently Selected:

ROMNYU 1: REGSBSI

Highlight

Copy